काठमाडौं– नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले आफूलाई मन्त्रिमण्डल पुनर्गठनबारे नसोध्न पत्रकारहरुलाई आग्रह गरेका छन्।
'मलाई मन्त्रिमण्डल पुनर्गठनबारे नसोध्नुस्। यसले मलाई हैरान पारेको छ। यो प्रधानमन्त्रीले चाहेको बेलामा मन्त्रिपरिषद् पुनर्गठन हुन्छ। नचाहँदासम्म पुनर्गठन हुँदैन', थारु समुदायको जितिया पर्वमा सहभागी हुन सुनसरी पुगेका प्रचण्डले विराटनगर विमानस्थलमा पत्रकारहरुलाई भने।
प्रचण्डले अहिले नै व्यवस्थालाई खतरा आयो भन्ने कुरा सत्य नभएको बताए। तर केही उछृंखल गतिविधि भने बढेको देखिएकाले राजनीतिक दल र सरकारले त्यसको प्रतिवाद गर्नुपर्ने बताए।
उनले भ्रष्टाचारका विरुद्ध पार्टी र सरकार अघि बढिरहेको दाबी गरे। 'यसका परिणामहरु विस्तारै देखिन थालेको छ', उनले भने।
उनले संघीय लोकतान्त्रिक गणतन्त्र र संविधान रक्षाका निम्ति सबै राजनीति दलहरु सबै एक ठाउँमा भएको बताए।
प्रचण्डले सरकार र पार्टीको कामको समीक्षा गरिरहेको बताए। 'यसलाई नयाँ शिराबाट गति दिनेबारे कुरा भइरहेको छ। मलाई लाग्छ, आउने समयमा कामहरु देखिन थाल्छन्', उनले भने।
उनले सरकारले काम नै गरेन भन्ने कुरा सत्य नभएको बताए। 'थुप्रै मौलिक हक सम्बन्धी कानुन बने, छिमेकीसँगको सम्बन्धमा सुधार आयो', उनले भने, 'भारतसँगको पेट्रोलियम पदार्थको पाइपलाइन ठूलै उपलब्धि हो। चीनसँग राम्रो सम्बन्ध र आधारहरु बनेका छन्।'
आधाआधा सरकार चलाउने कुरामा प्रचण्डले पार्टीले निर्णय गरे अनुसार हुने बताए। 'अहिले पार्टीमा त्यसबारेको छलफलमा हामी प्रवेश नै गरेका छैनौं', उनले भने।
उनले संविधान दिवसलाई कालो दिवस भन्नेहरु न समर्थन, न विरोधको स्थितिमा आइपुग्नु सकारात्मक भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
