नेपालगन्ज- चिट्ठाको लोभ देखाई फोन, भाइबर तथा ह्वाट्सएपको माध्यमबाट लाखौं ठगी गर्ने गिरोहलाई बाँके प्रहरीले पक्राउ गरेको छ।
'चिट्ठामा तपाईंलाई २५ लाख रुपैयाँ तथा कार परेको छ। त्यो चिठ्ठाको रकम र कारको कर बापतको रकम बुझाएर उपहार लिनुहोस्' भन्ने खालको मेसेज पठाएर उनीहरुले ठगी गर्दै आएका थिए। उनीहरु भारतीय तथा पाकिस्तानी नम्बरबाट समेत फोन गर्ने गर्थे।
पक्राउ पर्नेहरुमा भारत लखनऊका २२ वर्षीय अब्बु सैयफ खान, नेपालगन्ज ५ का २२ वर्षीय अकिव इद्रिसी, २१ वर्षीय अमिरबाबु कसगर र नेपालगन्ज ६ का १९ वर्षीय मोहम्मद फाहाद हलुवाई रहेका छन्।
ठगी गिरोहका सदस्यहरुले पछिल्लो एक महिनाको अवधिमा मुगु घर भई काठमाडौं बस्दै आएकी सुमन सुनार तथा कपिलवस्तु वाणगंगा बस्ने गणेश घिमिरेबाट ५ लाख १० हजार लिई ठगी गरेको प्रहरीको प्रारम्भिक अनुसन्धानबाट खुल्न आएको छ।
आफूहरु डिडी कम्पनीको प्रतिनिधि भएको बताउँदै उनीहरुले प्रलोभन देखाई चिठ्ठामा परेको रकम तथा कारको करबापतको रकम तिर्नुपर्ने सर्त राखेका थिए।
प्रहरीको प्रारम्भिक अनुसन्धानमा ठगी गिरोहका मुख्य नाइके पाकिस्तानमा रहेका छन्। उनले भारत र नेपालमा नेटवर्क बनाएर ठगी गर्दै आएको जिल्ला प्रहरी कार्यालय बाँकेका प्रहरी निरीक्षक रणबहादुर बिष्टले बताए।
पाकिस्तानी तथा भारतीय गिरोहका व्यक्तिको नेपालमा पैसा झिक्न लागि माध्यम नभएपछि नेपालीलाई प्रयोग गर्ने गरेको बिष्ट बताउँछन्। उनीहरुको नाममा आइएमई मार्फत रकम मगाएर लिने गरेको अनुसन्धानमा समेत संलग्न बिष्टले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
