काठमाडौं– २८ वर्षीया थाई युवती मिस खुवान्जाई खानारातलाई गोरा केटाहरु खासै मन पर्दैन।
बैंककमा फुक्काफाल रात्रिजीवन बिताउने उनी त्यहाँ प्राय: अफ्रिकन युवाहरुसँगै रमाउँछिन्। उनीसँगै रमाउने एक सेरालियन युवक छन्। उनी खुवान्जाईकी प्रेमी पनि हुन्।
उनकी अर्की एक साथीको ब्वाइफ्रेन्ड पनि अफ्रिकन नै छन्। गत महिना ती साथीका ब्याइफ्रेन्डले उनलाई नेपाल जाने प्रस्ताव राखे। एउटा सुटकेश बोकेर जाने र त्यस्तै अर्को सुटकेश बोकेर फर्कने उनको प्रस्ताव थियो। उनले त्यो प्रस्ताव सहजै स्वीकारिन्। साथीकै ब्वाइफ्रेन्डले प्लेन टिकट काटिदिए। केही पकेट खर्च पनि भरिदिए।
त्यही योजनामा उनी बुधबार नेपाल आइपुगिन्। उनको लागि ठमेलको होटलमा पहिले नै कोठा बुक भइसकेको थियो। त्रिभुवन अन्तराष्ट्रिय विमानस्थलबाट ट्याक्सी लिएर त्यही होटलमा पुगिन्।
होटलमा उनले बैंकक लैजानुपर्ने अर्को सुटकेश तयार थियो। बिहीबार दिउँसो एक बोलिभियन युवकसँग उनी त्यो सुटकेश लिँदै थिइन्। ठिक त्यही बेला 'हामी प्रहरी हौं' भन्दै केही व्यक्ति त्यहीँ पुगे। सुटकेश दिने बोलिभियन युवकसहित उनको हातमा हतकडी लाग्यो।
उनले बैंकक पुर्याउनुपर्ने सुटकेश सामान्य थिएन। थियो त, १ केजी ९ सय ५८ ग्राम लागुऔषध कोकिन। जसको मूल्य करिब ४ करोड रुपैयाँ पर्छ। प्रहरीले पक्राउ गरेपछि मात्र आफूलाई त्यसबारे जानकारी खुवान्जाईको दाबी छ।
‘उनले आफूलाई साथीको ब्वाइफ्रेन्डले फसाएको बताएकी छिन्,’ लागुऔषध नियन्त्रण ब्युरो (एनसिबी) का प्रमुख डिआइजी ठूले राईले शुक्रबार आयोजित पत्रकार सम्मेलनमा भने, ‘बोलिभियाको एक समूहले थाइल्यान्डमा रहेका अफ्रिकन युवकमार्फत उनलाई लागुऔषध ओसारपसारमा प्रयोग गरेको देखिन्छ।’
सुटकेशमा कोकिन हुनेबारे उनलाई पहिले नै जानकारी भएको पनि हुन सक्ने प्रहरी भनाइ छ।
वर्कशपको जागिर छाडेर कोकिन कारोबारमा
थाई युवतीसँगै प्रहरीले बोलिभियका २८ वर्षिय फ्रेडी मामानी एन्डियालाई समेत पक्राउ गरेको छ। डिआइजी राईका अनुसार उनी बोलिभियाको एक मोटरसाइकल वर्कशपमा काम गर्थे। एक साथीले उनलाई कोकिन माफियासँग चिनजान गराइदिएका हुन्। उक्त कोकिन नेपाल पुर्याइदिए ३ हजार अमेरिकन डलर दिने प्रस्ताव गरिएको थियो। प्लेन टिकट र पकेट खर्चको व्यवस्था समेत गरिएको थियो। सोही लोभमा फस्दा उनी प्रहरी हिरासतमा पुगेका छन्। थाई युवती र बोलिभियन युवक दुवैलाई १५ वर्षसम्म कैद सजाय हुने कानुनी प्रावधान छ।
दिल्लीबाट छिरेर नेपालमा पक्राउ
बरामद कोकिन दक्षिण अमेरिकन देश बोलिभियाबाट ल्याइएको हो। त्यहाँबाट ब्राजिल, इथियोपिया, भारत हुँदै नेपाल ल्याइएको डिआइजी राईले बताए। उक्त कोकिन भारतसहित ४ वटा देशको विमानस्थलबाट सजिलै छिराउन फ्रेडी सफल भएका थिए।
तर, नेपाल प्रहरीलाई भने उनले झुक्याउन सकेनन्।
गत शुक्रबार विमानस्थलमा खटिएको ब्युरो टोलीले उनको झोलामा कोकिन रहेको पत्ता पाइसकेको थियो। तर, विमानस्थलमै उनलाई प्रहरीले पक्राउ गरेन। उनको पिछा गर्दै उनी बस्ने होटलसम्म प्रहरी पुग्यो।
डिएसपी प्रेम शाहीको कमान्डमा प्रहरी टोली अपरेसनमा खटियो। उक्त कोकिन लिन अर्को कोही व्यक्ति आएपछि मात्र पक्राउ गर्ने प्रहरीको योजना थियो। सोही अनुसार प्रहरीले ५ दिनसम्म निरन्तर उनको पिछा गरिरह्यो। छैंटौं दिन मात्र प्रहरीलाई सफलता हात लाग्यो।
नेपालमा पक्राउ परेपछि अन्य देशको तुलनामा थोरै मात्र सजाय हुने भएकाले यसरी नेपाललाई ट्रान्जिटका रुपमा प्रयोग गरिएको हुन सक्ने प्रहरी अधिकारीहरु बताउँछन्।
कोकिन तस्करीको नयाँ रुट
नेपाललाई ट्रान्जिट बनाएर कोकिनको कारोबार सुरु गरिएको केही वर्ष मात्र भएको छ। बोलिभियाबाट ब्राजिल, दुबई हुँदै कोकिन केही वर्षयता नेपालमा कोकिन भित्रँदै आएको थियो। तर, त्यसको गन्तव्य युरोप हुन्थ्यो।
बिहीबार बरामद भएको कोकिनको गन्तव्य भने थाइल्यान्ड थियो। पहिलो पटक थाइल्यान्ड पठाउन लागिएको कोकिन बरामद भएको प्रहरीले जनाएको छ। कोकिन विश्वकै सर्वाधिक महँगो लागुऔषधमा हो। जुन एक किलोको करिब २ करोड रुपैयाँसम्ममा बिक्री हुन्छ।
‘यो कोकिनको मूल्यभन्दा पनि असर ठूलो छ,’ डिआइजी राई भन्छन्, ‘यसबाट सयौंको जीवन र परिवार बर्बाद हुन सक्थ्यो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
