राजविराज- राजविराज नगरपालिका–२ निवासी चन्द्रनारायण यादवको एक लाख नगद सोमबार दिउँसै लुटियो। भारतको रायवरेलीमा पढ्दै गरेका छोरा सञ्जीवलाई खर्च पठाउन राजविराज ७ स्थित एसबिआई बैंक पुगेका यादव बैंकको भर्याङ चढ्दाचढ्दै लुटिए।
गोजीबाट नोटको बन्डल झिक्दै गर्दा हातबाटै खोसेर लुटेराहरु बा३२प ९२६२ नं को मोटरसाइकल चढेर भागेको उनले बताए। तत्कालै जिल्ला प्रहरी कार्यालयमा जानकारी गराए पनि लुटेराको हालसम्म पहिचान हुन सकेको छैन।
त्यसको एक दिनअघि आइतबार राति छिन्नमस्ता गाउँपालिका–३ सखडा बजारमा रहेको अञ्जनी ज्वेलर्समा चोरी भयो। पसलको ताला फुटाई १५ लाख २८ हजार मुल्य बराबरको चाँदी, ८ लाख मूल्य बराबरको सुनको गरगहना र १ लाख ८८ हजार नगद गरी २६ लाख ४० हजार बराबरको चोरी गरेको भन्दै पीडित राजेश्वर साह सोनारले जिल्ला प्रहरी कार्यालयमा उजुरी दर्ता गराएका छन्।
सोही दिन राजविराजको मुटु मानिने गजेन्द्र चोकमा बनौली डिमनकी जैतुन खातुनको ५४ हजार रुपैयाँ दिनदहाडै लुटियो। साउदीमा रहेका छोराले ऋण तिर्न पठाएको रकम आइएमईबाट झिकेर फर्कंदै गर्दा लुटेराले ब्यागसहित धुतेर लगेपछि उनी बिलौना गरिरहिन्। तर अहिलेसम्म पनि प्रहरीले त्यो घटनाको वास्तविकता पत्ता लगाउन सकेको छैन।
शनिबार मात्रै राजविराज–७ निवासी योगेन्द्र यादवको घरबाट ४ लाख मूल्य बरावरको सुनचाँदीका गहना चोरी भयो। पूर्वमन्त्री उमेशकुमार यादवका पिएसमेत रहेका योगेन्द्र पत्नी रिंकुलाई राजविराज १३, जोगिनियाँस्थित मुल घरमा छोडेर काठमाडौं गएका बेला घरमा चोरी भएको हो।
यसको लगत्तै आइतबार स्थानीय रामनारायण मण्डलको घरमा दिउँसै चोरी भयो। गहना, कपडा, इलेक्ट्रोनिक्स समानसहित करिब ४ लाख मूल्य बराबरको चोरी भएको भन्दै उनले पनि प्रहरीमा उजुरी गरेका छन्। योसँगै त्यस क्षेत्रमा दिनहुँजसो चोरीका घटना भइरहेका छन्।
पछिल्लो पटक सोमबार राति पनि गोविन्द साह र जिवछ सिंहको घरमा चोरी भएको पीडित छ।
यति मात्रै होइन, पछिल्लो समय सप्तरी सदरमुकाम राजविराज लगायत जिल्लाका ग्रामीण भेगमा लुटपाट र चोरीका घटना तीव्र रुपमा बढेका छन्। दिउँसै पैसा सहितको ब्याग धुतेर भाग्नेदेखि रातिराति गाउँ पसेर चोरी गर्ने घटनाले सर्वसाधारण आतंकित छन्। तर, प्रहरीले भने शंकास्पद व्यक्तिलाई नियन्त्रणमा लिने सोधपुछ गर्ने र छोडनेबाहेक केही गर्न नसकेको पीडितहरुकै गुनासो छ।
चोरी र लुटपाटका घटना वृद्धि भएपछि घर छोडेर कतै जानसमेत समस्या भएको स्थानीयहरु बताउँछन्। सर्वसाधारण नागरिकलाई आतंकित बनाउने गरी भइरहेका चोरी र लुटपाटका घटनामा संलग्नलाई नियन्त्रणमा लिई सार्वजनिक गर्न र कारवाही गर्न नागरिक सञ्जालका अध्यक्ष सुखराम यादवले माग गरेका छन्।
जिल्ला प्रहरी कार्यालय सप्तरीका निमित्त प्रमुख डिएसपी ध्रुवकुमार श्रेष्ठले ती घटनालाई प्रहरीले हेरिरहेको प्रतिक्रिया दिएको छन्। चोरी र लुटपाटका घटना बढेको विषयमा श्रेष्ठ भन्छन्, ‘हामी हेरिरहेका छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
