काठमाडौं– गत मंसिर ४ गते सुन्धारास्थित केन्द्रीय कारागारबाट नाटकीय शैलीमा एक कैदी बेपत्ता भए। जर्बजस्ती करणी मुद्दामा जेल परेका जुम्लाका पुन्नबहादुर शाही मध्यराति जेलको छतबाट हामफालेर भागेका थिए। डेढ महिना हुन लाग्दा पनि उनी भेटिएका छैनन्। राजधानीमा पटक–पटक यस्तै किसिमका ‘जेलब्रेक’का घटना दोहोरिँदै आएका छन्।
१. पुन्नबहादुरको दोस्रो जेलब्रेक
मंसिर ४ गते भागेका पुन्नबहादुर शाहीको यो दोस्रो जेल ब्रेक हो। यसअघि ०६८ सालमा उनी सुर्खेत कारागारबाट सुरुङ खनेर भागेका थिए। त्यसपछि उनलाई पक्राउ गर्न तीन वर्ष लागेको थियो।
जिल्लाका कारागारहरुमा राख्दा फेरि भाग्न सक्ने भएकाले उनलाई केन्द्रीय कारागारमा ल्याइयो। केन्द्रीय कारागारबाट पनि उनले प्रहरी र जेल प्रशासनलाई सजिलै झुक्याउन सफल भए। रातको समयमा जेलको भित्री गेटबाट निस्कन पाइन्न। तर, उनी गेटबाट निस्कने मात्र होइन, प्रहरी ब्यारेक भएको भवनको छत हुँदै भाग्न सफल भए। घटनाका प्रहरी र जेलको आन्तरिक प्रशासनको कमजोरी देखिएको कारागार व्यवस्था विभागको छानबिनमा खुलेको छ। विभागका महानिर्देशक कृष्णचन्द्र घिमिरेकै संयोजकत्वमा छानिबन भएको थियो। कैदी शाही भागेका बेला ड्युटीमा रहेका तीन जना प्रहरी निलम्बनमा परिसकेका छन्। उनको खोजीमा प्रहरी टोली खटिएको छ।
२. मनबहादुरले यसरी झुक्याए
म्याग्दीका मनबहादुर पुन प्रहरी र जेल प्रशासनलाई झुक्याएर साउन २८ गते फिल्मी शैलीमा केन्द्रीय कारागारबाट भागेका थिए। मानव बेचबिखन मुद्दामा अदालतले साढे १२ वर्ष कैद सजाय सुनाएकोमा उनी अर्का कैदीको कागजपत्रका आधारमा छुटेका हुन्। जेलबाट छुटेलगत्तै एक साताबीचमा उनले तीन महिलालाई बिहे गर्ने भनेर ठग्दै शारीरिक शोषण समेत गरेका थिए।
मनबहादुर जेलकै अर्का कैदी दर्पण थापा मगरको नाममा छुटेका थिए। थापालाई आर्थिक प्रभावमा पारी कैदीपूर्जी साटेर उनी छुटेका हुन्। अर्काको कागजपत्र देखाएर उनी भागेको खुलेपछि प्रहरीले पोखराबाट उनलाई पक्राउ गरेको थियो।
दर्पण थापा र उनको भीमफेदी कारागारबाट केन्द्रीय कारागारमा सरुवा भएको थियो। जसका क्रममा दर्पण थापा मनबहादुर र मनबहादुर दर्पण थापा बनेर जेलमा बसेका थिए। दर्पण थापा जेल भुक्तान गरी साउन २८ गते छुट्ने भएकाले उनले थापाको कैदीपूर्जी आफूले लिएर जेल प्रशासनलाई झुक्याउँदै उम्किन सफल भएका हुन्। पोखराबाट पक्राउ परेपछि हाल उनलाई केन्द्रीय कारागारभित्रको गोलघरमा राखिएको छ। जेलभित्रै बसेर अपराध गर्नेलाई गोलघरमा राखिने गरिएको छ।
३. ढलबाटै छिरेर भागे सुरज
२६ मंसिर ०७० मा केन्द्रीय कारागारकै ढलबाट एक कैदी भागेका थिए। लागूऔषध मुद्दाका कैदी सुरज सिंह कारागारको ढलभित्रबाट भागेका थिए। करिब २ सय मिटर लामो ढल हुँदै उनी कारागारको दक्षिणतर्फ निस्किएका थिए। करिब तीन घन्टा लगाएर उनले ढल पार गरेका थिए। कारागारको दक्षिणतर्फको उद्योग विभागको छेउमा उनी निस्किएका थिए। तर, उनी भागेकै दिन पक्राउ परे।
जिउभरि ढलको फोहोर लागेकाले प्रहरीले उनलाई पागल भन्दै लखेटेका थिए। नजिकैको धारामा गएर नुहाई स्थानीयसँग कपडा मागेर भाग्न खोज्दा उनी पक्राउ परेका थिए।
४. श्रीमती भेट्न कैदी फरार, इन्सपेक्टर जेलमा
०७१ फागुन २६ गते अर्का कैदी उपत्यकामा फिल्मी शैलीमा भागे। लागूऔषध मुद्दामा डिल्लीबजार जेलमा सजाय काट्दै आएका पासाङ शेर्पा अस्पताल जाने बहानामा डेरामा गएर भागेका थिए। आँखा चेकअपका नाममा त्रिपुरेश्वर आँखा अस्पतालमा पुगेका उनले आफूसँग रहेका प्रहरीलाई समेत ट्याक्सीमा जोरपाटीस्थित डेरामा लिएर गएका थिए। प्रहरीलाई बाहिरी कोठामा राखेर श्रीमतीसँग शारीरिक सम्पर्कका लागि भनेर अर्काे कोठामा छिरेका उनी झ्यालबाट भागेका थिए। भागेको एक महिनापछि उनी ललितपुरमा पक्राउ परेका थिए।
अनुसन्धानका क्रममा प्रहरीलाई आर्थिक प्रभावमा पारी अस्पताल जाने बहानामा श्रीमती भेट्न उनी पटकपटक डेरा जाने गरेको खुल्यो। जुन घटनामा डिल्लीबजार कारागारका इन्सपेक्टर रविन्द्र रञ्जितलाई कैदी भगाएको अभियोग मुद्दा चलाएर जेल चलान गरिएको थियो।
५. शौचालयबाटै पाकिस्तानी टाप, अहिलेसम्म रहस्यमै
०६८ साल चैत १३ गते पाकिस्तानी कैदी मोहम्मद जमिल अस्पतालबाट नाटकीय शैलीमा उम्किए। मुटुको बिरामी भएपछि गंगालाल अस्पतालमा भर्ना भएका जमिल शौचालयको झ्यालबाट भागेका थिए।
नक्कली भारतीय रुपैयाँ कारोबारमा संलग्न भएको आरोपमा जेल परेका उनी दुई वर्ष बित्न लाग्दा पनि हालसम्म पक्राउ परेका छैनन्। उनको सुरक्षामा खटिएका सई यज्ञबहादुर केसी लगायतका प्रहरी कारबाहीमा परेका थिए।
प्रहरीकै कमजोरीले सो घटना भएको थियो। शौचालय जाने बेलामा उनको हतकडी खोलिएको थियो। शौचालयको झ्यालमा जाली मात्र थियो, उनी जाली च्यातेर भागेका थिए। ६ वर्ष बित्दा पनि जमिल पक्राउ परेका छैनन्। उनी विरुद्ध इन्टरपोलमार्फत रेड कर्नर नोटिस समेत जारी भएको थियो।
६. प्रहरीलाई बियर खुवाएर भागे डेनी
०६८ साउन ११ गते उपचारकै बहानामा एक कैदी फरार भएका थिए। डाँकाचोरी, ज्यान मार्ने उद्योग जस्ता मुद्दामा जेल परेका ‘टेन्सन’ भनिने डेनी लामा हतकडीसहित नै फरार भएका थिए। वीर अस्पतालमा चेकअप गराउन जाने बहानामा उनी प्रहरीलाई लिएर श्रीमती भेट्न कालिमाटीस्थित डेरामा पुगेका थिए। त्यहाँ प्रहरीलाई बियर खान दिई उनी भागेका थिए। घटनाको तीन दिनपछि प्रहरीले उनलाई काभ्रेको ठूलोपर्सेलबाट पक्राउ गरेको थियो। पक्राउ गर्न गएको प्रहरी टोलीलाई नै उनले ढुंगामुडा गरेका थिए ।
७. अस्पतालबाटै भागे चिनियाँ
६ असोज ०७१ मा पाटन अस्पतालबाट एक चिनियाँ कैदी फरार भए। जु योङ खा नाम गरेका ती कैदी उपचारको बहानामा अस्पताल गएकोमा प्रहरीलाई झुक्याएर भागेका थिए। वन मुद्दामा उनलाई १५ वर्ष कैद सजायको फैसला भएको थियो।
त्यो घटना पनि शंकास्पद बनेको थियो। उनी अस्पताल जाने बहानामा प्रेमिकालाई भेट्न होटल पुगेका थिए। पाटन अस्पतालबाट कागजपत्र बनाएपछि प्रहरीले उनलाई गेस्टहाउस पुर्याएका थिए, त्यहीँबाट उनी भागेको अनुसन्धानमा खुलेको थियो। त्यस घटनामा पनि प्रहरीहरु कारबाहीमा परेका थिए। भागेका चिनियाँ अहिलेसम्म पक्राउ परेका छैनन्।
घुसदेखि सेक्ससम्म
उपत्यकामा कैदी भाग्ने÷भगाउने घटनामा घुसदेखि यौनसम्म कारण भएको अध्यागमन विभागका अधिकारीहरु बताउँछन्। जेलमा बसेका कतिपय कैदीहरु प्रहरीलाई घुस खुवाएर श्रीमती तथा गर्लफ्रेन्डलाई भेट्न जाने गरेका छन्। अस्पताल जाने बहानामा जेलबाट निस्किएर प्रहरीसँग सेटिङ मिलाई उनीहरु होटल तथा गेस्टहाउस पुग्ने गरेका छन्। डेनी तामाङ र पासाङ शेर्पा त्यसैगरी भागेका थिए। दुवै घटनामा प्रहरीले कैदीबाट आर्थिक लाभ लिएको खुलेको थियो।
कतिपय अवस्थामा जेलको जीर्ण भौतिक अवस्थाका कारण पनि कैदीहरु भाग्ने गरेको कारागार व्यवस्था विभागका महानिर्देशक कृष्णचन्द्र घिमिरे बताउँछन्। गत महिना भागेका पुन्नबहादुर शाही जेलको कमजोर भौतिक अवस्थाकै फाइदा उठाउँदै भागेका उनले बताए। गल्तीहरुबाट सिकेर आफूहरुले सुधार गर्दै लगेको घिमिरे बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
