काठमाडौं– व्यवसायी अजेय सुमार्गीमाथि सम्पत्ति शुद्धीकरण अनुसन्धान विभागले गम्भीर छानबिन थालेको छ। विभागले सुमार्गीले भित्र्याएको सम्पत्तिको स्रोत नखुलेको र उनले आर्जन गरेको सम्पत्तिमा समेत वैधानिक स्रोत नदेखिएकाले त्यसमाथि छानबिन थालेको हो।
सम्पत्ति शुद्धीकरण विभागका एक अधिकृतका अनुसार सुमार्गीको १५ देखि २० अर्ब रुपैयाँको बारेमा गम्भीर अनुसन्धान भइरहेको छ। विभागले पहिलो चरणमा सुमार्गीको बैंक खाता रोक्का गरेर अध्ययन गरिरहेको ती अधिकृतले बताए।
विभिन्न वाणिज्य बैंक र अन्य वित्तिय कम्पनीमा सुमार्गीको नाममा रहेको रकम अध्ययन गर्नका लागि पहिलो चरणमा नेपाल राष्ट्र बैंकको अनुमतिमा वाणिज्य बैंकहरुको खाता रोक्का गरिएको छ। सुमार्गीले ट्याक्स हेवन देशबाट भित्र्याएको रकमका विषयमा यसअघि नै विभागले छानबिन थालेको थियो। सुमार्गीले आय आर्जन गरेको सम्पत्तिसँग विदेशबाट लगानीका लागि भन्दै भित्र्याएकाले रकमको विषयमा पटकपटक उजुरीसमेत परेको र नेपाल राष्ट्र बैंकले समेत रोक्का राखेर अनुसन्धान हुनुपर्ने सुझाव दिएपछि विस्तृत अनुसन्धान भइरहेको विभागले जनाएको छ।
सुमार्गीले मुक्ती श्री सिमेन्ट उद्योगका लागि भन्दै भित्र्याएको रकमका विषयमा हालै मात्र सर्वोच्च अदालतले सम्पत्ति शुद्धीकरण ऐन उल्लंघन भए नभएको विषयमा जानकारी माग गरेको थियो। त्यस्तै सर्वोच्चले विदेशबाट आएको रकमको वैधतासमेत जाँचबुझ गरी ६ महिनाभित्र विवरण पठाउने भनेको थियो।
सर्वोच्चका प्रधानन्यायाधीश चोलेन्द्र शमशेर राणासहितको इजलासले ३ बुँदे परमादेश जारी गरेको थियो। सर्वाेच्चको उक्त आदेशले पनि सुमार्गीमाथि विभागले अनुसन्धान गर्नुपर्ने थियो। सर्वोच्चको आदेशअगाडि नै सुमार्गीमाथि विभागले गोप्य अनुसन्धान अघि बढाएको ती अधिकृतले बताए। दोस्रो चरणमा सुमार्गीसँग विभागले बयान लिने उनको भनाइ छ।
विभिन्न व्यवसायमा संलग्न रहेका सुमार्गीले सिमेन्ट र सञ्चार क्षेत्रमा लागानी गर्न साइप्रस लगायतबाट लगानी रकम भित्राएको दाबी गर्दै आएका थिए। तर राष्ट्र बैंकले भने यस्तो रकमको स्रोत नखुलेको भन्दै रोक्का राखेको थियो। सुमार्गीले आफ्नै कम्पनीबाट आफ्नै नाममा रकम सारेको भन्दै राष्ट्र बैंकले रकम रोक्का राख्दै आएको थियो। तर उक्त निर्णयमा सर्वोच्चले अन्तरिम आदेश दिएपछि फुक्का भएको थियो।
सुमार्गीको लगानीमा सञ्चालित मुक्तिश्री सिमेन्ट उद्योग प्रालिको खातामा विदेशबाट जम्मा भएको ७५ लाख अमेरिकी डलर भुक्तानी पनि सर्वोच्चको आदेशपछि भएको थियो। सम्पत्ति शुद्धीकरण विभागको पत्रले सुमार्गीको रकम राष्ट्र बैंकले रोक्का राखेपछि तत्कालीन न्यायाधीश दीपकराज जोशीको अन्तरिम आदेशले खुल्ला गरिदिएको थियो। सर्वाेच्चको उक्त आदेश सुमार्गीले ८३ करोड २५ लाख र यसअघि २ अर्ब २५ करोड रुपैयाँ झिकेका थिए। सुमार्गीको खातामा पटकपटक रकम जम्मा हुने भएको मध्ये २ अर्ब रुपैयाँभन्दा अदालतको आदेश देखाउँदै झिकेका थिए।
सुमार्गीले सुर्खेतमा सिमेन्ट उद्योग सञ्चालन गर्न ४ करोड ५० लाख अमेरिकी डलर (करिब ५ अर्ब रुपैयाँ) खातामा वैदेशिक लगानी भन्दै जम्मा पारेका थिए।
खातामा जम्मा भएको रकममध्ये ७५ लाख अमेरिकी डलर (करिब ८३ करोड २५ लाख रुपैयाँ) राष्ट्र बैंकले रोक्का गरेको थियो। उद्योगका लागि जम्मा गरेको रकम भुक्तानी दिन बैंकले रोकेकाले उद्योग धरासायी हुन लागेको दाबीसहित उनले सर्वोच्चमा रिट निवेदन दायर गरेका थिए।
नेपाल स्याटलाइट कम्युनिकेसनका लागि भन्दै उनले रकम भित्र्याएका थिए। उक्त विवादमा पनि सम्पत्ति शुद्धीकरण विभागले रोक्का राख्न राष्ट्र बैंकलाई पत्र लेखेको थियो। तर सर्वोच्चले अन्तरिम आदेश जारी गरेपछि उक्त रकम सुमार्गीले झिकेका थिए। उक्त मुद्दा सर्वोच्चमा विचाराधीन रहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।