जनकपुर- प्रदेश २ सरकारले आगामी आर्थिक वर्ष ०७६/७७ का लागि ल्याएको बजेटमा निर्वाचित सांसदलाई ३ करोड र समानुपातिकका लागि १ करोड दिने घोषणा गरेको छ।
सांसदहरुले आफ्नै इच्छाले खर्च गर्ने गरी बजेट पाउने भएका छन्। आइतबार प्रस्तुत गरिएको बजेटमा निर्वाचित र समानुपातिक दुबै सांसदले आफ्नो इच्छा अनुसार खर्च गर्ने गरी बजेट विनियोजन पाउने उल्लेख छ।
प्रदेशका निर्वाचित सांसदले करोडका दरले पाउनेछन्। यसमध्ये १ करोड आफ्नै इच्छाले र बाँकी २ करोड संसदीय विकास कार्यक्रमअन्तर्गत पाउने भएका छन्।
समानुपातिकबाट आएका सांसदले १ करोडका दरले बजेट पाउने भएका छन्। यो बजेट समानुपातिक सांसदहरुले आफ्नै इच्छा अनुसार खर्च गर्न पाउनेछन्।
प्रदेश २ मा ६४ प्रत्यक्ष निर्वाचित र ४१ समानुपातिक गरी १०७ जना सांसद छन्।
यस्ता छन् कार्यक्रम
प्रदेश सरकारले गत वर्षबाटै सुरु गरेको ‘बेटी पढाऔं, बेटी बचाऔं’ कार्यक्रमका लागि ३९ करोड ३३ लाख बजेट छुट्टयाइएको छ।
मुख्यमन्त्री स्वच्छता अभियानका लागि ३१ करोड ३३ लाख, मुख्यमन्त्री किसान उत्थान कार्यक्रमका लागि रु २० करोड छुट्टयाएको छ। आठै जिल्लामा मझौला तथा साना सिंचाईका लागि १ अर्ब बजेट प्रदेश सरकारले विनियोजन गरेको छ। प्रदेश सरकारले मठमन्दिर, मस्जिद, गुम्बाको संरक्षण र सम्वर्द्धनका लागि रु ४० करोड विनियोजन गरेको छ।
प्रस्तुत बजेटमा कृषि तर्फ प्रधानमन्त्री कृषि कार्यक्रमका लागि ४० करोड, मुख्यमन्त्री कृषि कार्यक्रमका लागि २० करोड, प्रदेशका सबै आठ जिल्लामा शीतभण्डार निर्माणका लागि ४० करोड, कृषि सुपरजोन कार्यक्रमका लागि १० करोड विनियोजन गरिएको छ।
यसैगरी, कृषि व्यावसायिक व्यवस्थापनका लागि ५ करोड, कृषि कारखाना तथा जैविक मल उद्योगका लागि २ करोड र 'खेतखेतमा पानी हातहातमा काम'को लागि एक अर्ब ११ करोड बजेट विनियोजन गरेको छ।
नदी नियन्त्रण तथा वृक्षरोपणमा ३ करोड, जनता आवासका लागि १ अर्ब ३८ करोड ७० लाख छुट्याइएको छ। जनकपुर अञ्चल अस्पताललाई प्रादेशिक अस्पतालमा विकास गर्न २३ करोड, हरेक जिल्लामा प्रादेशिक नमूना सामुदायिक विद्यालय व्यवस्थापनका लागि १६ करोड विनियोजन भएको छ।
बजेटले कृषि, स्वास्थ्य, शिक्षा र भौतिक पूर्वाधारमा जोड दिएको मन्त्री यादवले बताए।
पारवहन सेवाका लागि ४ बस खरिद गर्ने
प्रदेश सरकारले पारवहन सेवा संचालनका लागि ६ करोड विनियोजन गरेको छ।
जनकपुरबाट वीरगंज र राजविराज बस संचालन गर्न ४ वटा बस खरिदका लागि ६ करोड विनियोजन गरिएको हो।
समग्रमा बजेट
सरकारले आगामी आर्थिक वर्षका लागि ३८ अर्ब ७२ करोडको बजेट ल्याएको छ। आर्थिक मामिला तथा योजनामन्त्री विजयकुमार यादवले आइतबार प्रदेशसभामा ३८ अर्ब ७२ करोड ५६ लाख ६१ हजारको बजेट पेश गरेका हुन्।
चालूतर्फ १९ अर्ब ११ करोड, ९७ लाख ३८ हजार अर्थात ४९.८१ प्रतिशत र पूँजीगततर्फ १९ अर्ब २६ करोड, ५४ लाख ६४ हजार अर्थात ५०.१९ प्रतिशत विनियोजन गरिएको छ।
बजेटको स्रोतका रुपमा आन्तरिक राजस्वबाट १३ अर्ब, ५४ करोड, ३१ लाख, ६९ हजार, नेपाल सरकारबाट प्राप्त बिभिन्न अनुदानबाट १६ अर्ब १७ करोड, ७४ लाख र चालू आव बाट नगद मौज्दात हुने ७ अर्ब ७० करोड, ७२ लाख, ९२ हजार प्राप्त हुने १ अर्ब ३० करोड आन्तरिक ऋण लिइने छ।
गत वर्ष एक अर्ब ऋण लिने घोषणा गरेपनि नलिएको बताउँदै उनले यस पटक ऋण लिइने मन्त्री यादवले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
