काठमाडौं- काठमाडौंको तीनकुनेस्थित बागमती नदीमा निर्माणाधीन पुल निर्माणमा ठेकेदारले चरम लापरबाही गरेको विकास तथा प्रविधि समितिले ठहर गरेको छ। पुल निर्माण रोक्न निर्देशन दिँदादिँदै पनि निर्माण कार्यअगाडि बढाउने ठेकेदार कम्पनी पप्पु कन्सट्रक्सनलाई कारबाही गर्नुपर्ने समितिको स्थलगत अध्ययन रिपोर्टमा उल्लेख छ।
केही दिनअघि समितिका सदस्यहरुले पुलको स्थलगत अध्ययन गरेका थिए। अध्ययनपछि समितिले प्रतिवेदन सार्वजनिक गरेको छ।
बागमती नदीमा निर्माणाधीन पुल ‘डिजाइन र निर्माण’ पद्धतिबाट २०७५ असार ५ गते निर्माण सक्ने गरी सम्झौता भए पनि निर्माणले गति लिन नसकेको प्रतिवेदनमा उल्लेख छ।
काठमाडौं उपत्यका सडक विस्तार आयोजनाले पुल निर्माणका लागि पप्पुसँग २०७१ पुस ४ गते सम्झौता गरेको थियो। पुल निर्माणको लागत अनुमान ३० करोड ८५ लाख भए पनि निर्माण कम्पनीसँग २१ करोड ३३ हजार (करबाहेक) मा सम्झौता भएको थियो।
समितिको स्थलगत अध्ययन प्रतिवेदनमा २९.५ मिटर गहिरो (लम्बाइ) का १६ वटा एक २० एमएमको पाइल्स निर्माण गर्ने गरी डिजाइन स्वीकृत भए पनि निर्माण व्यवसायीले एउटा पाइल्स १६.५ मिटरको मात्र निर्माण गरेको र २ वटा पाइल्स क्रयाक भएको प्राविधिक परीक्षणबाट देखिएको आयोजना सम्बद्ध कर्मचारीबाट पाएको जनाकारी भन्दै उल्लेख गरको छ।
निर्माण व्यवसायीलाई फाउन्डेसनमा रहेको पाइल्सको समस्या समाधान गरेर मात्र काम अगाडि बढाउन निर्देशन भएको तर व्यवसायीले उक्त निर्देशनको पालना नगरी पुलको सब–स्ट्रक्चर निर्माण गरी स्ल्याब ढलानको तयारी गरेको समेत प्रतिवेदनमा उल्लेख छ।
सडक विस्तार आयोजनाले तत्काल इन्जिनियरिङ अध्ययन संस्थानसँग समन्वय गरी परिमार्जित डिजाइन प्राप्त गरी सोही अनुसार निर्माण अघि बढाउने व्यवस्था मिलाउनुपर्ने समितिको निष्कर्ष छ। यही पद्धतिबाट निर्माण भइरहेको अन्य सडक तथा पुलहरुमा उत्पन्न हुन सक्ने समस्याको तत्काल समाधानका लागि उचित व्यवस्था गर्न आवश्यक रहेको समेत प्रतिवेदनमा उल्लेख छ।
यसैगरी प्रतिवेदनमा आयोजना पूर्व तयारीको काम सम्पन्न गरेपछि मात्रै ठेक्का लगाउनुपर्ने, काम अघि नबढाउन निर्देशन दिँदादिँदै पनि अटेर गरी निर्माण अघि बढाउने निर्माण व्यवसायीलाई कारबाही गर्नुपर्ने उल्लेख छ। निर्माण कार्यको गुणस्तर कायम गर्न आयोजना सम्बद्ध पदाधिकारीहरुले आवश्यकता अनुसार पटकपटक प्राविधिक परीक्षणसहित गुणस्तर कायम हुने आधार सुनिश्चित गर्नुपर्ने पनि प्रतिवेदनमा जनाइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।