काठमाडौं- राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) मा बेथिति बढ्दै गएको पाइएको छ। निगमका कार्यकारी अध्यक्ष मदन खरेलले सञ्चालक बोर्डसँग छलफल नै नगरी एकलौटी निर्णय गर्दा काठमाडौं–ओसाका (जापान) उडान तालिका नै परिवर्तन गरेका छन्।
निगमले बैसाख २० गते विज्ञप्ति जारी गर्दै असार १९ देखि ओसाकामा नियमित उडान गर्ने जनाएको थियो। यसरी उडान तालिका तय गर्दा कार्यकारी अध्यक्ष खरेलले सञ्चालक बोर्डमा छलफल नै गरेनन्। उक्त दिनमा उडान सम्भव नभएपछि २६ दिन सारेर भदौ १२ देखि उडान गर्ने सेड्युल तय गरिएको छ।
‘वाइडबडी जहाज आएको झन्डै एक वर्षपछि निगमले जापान उडानको सेड्युल तय गर्दैगर्दा सञ्चालक बोर्डमा छलफल नभए पनि हामीले केही भनेको थिएनौं’, सञ्चालक बोर्ड सदस्य तथा संस्कृति, पर्यटन तथा नागरिक उड्डयन मन्त्रालयका सहसचिव बुद्धिसागर लामिछानेले भने, ‘उडान तालिका अनुसार ओसाका उडान गर्न नसकेपछि सेड्युल परिवर्तन गर्दा पनि कुनै छलफल भएन। यसले निगम सञ्चालक बोर्डलाई नै बहिस्कार गर्ने प्रवृत्ति हाबी भएको छ।'
निगमले जुनसुकै कामको थालनी गर्दा उक्त काम निगम र सरकारको हितमा रहे/नरहेको भनी बोर्डमा छलफल गरेर निर्णय हुनुपर्नेमा सञ्चालक बोर्ड सदस्यहरुलाई पनि थाहा नहुने गरी निर्णय हुन थालेको उनको भनाइ छ।
‘हामी सञ्चालक बोर्ड सदस्यहरुले समेत मिडियामा आएपछि थाहा पाउँछौं’, लामिछानेले भने, ‘सञ्चालक बोर्डलाई त खबर हुन्न भने विभागीय मन्त्रालयका सचिव तथा मन्त्रीलाई समेत थाहा हुँदैन।’
ओसाका उडानको विषय जिएसएसँग जोडिएर विवादित भएको सूचना आउने थालेको उनको भनाइ छ। यस विषयमा मन्त्रालय अध्ययनकै क्रममा रहेको उनले बताए।
बोर्डबाट अनुमति लिएर टेन्डर गरे पनि निगम व्यवस्थापनले सदस्यहरुलाई थाहा नै नदिई टेन्डर स्थगित गर्ने प्रवृत्ति पनि देखिएको लामिछाने बताउँछन्। उनले भनेझैं जहाजको इन्जिन मर्मत तथा पार्टपुर्जा मर्मतका लागि गरिएको टेन्डर प्रक्रिया संसदीय समितिले पत्र काटेपछि मात्रै थाहा भएको थियो। निगम अध्यक्ष खरेलले केही समय जहाजको इन्जिन मर्मतको टेन्डर स्थगित गर्दै पुनः टेन्डर गरेर कम्पनी छनोटको प्रक्रियामा लागेका थिए। तर, सार्वजनिक लेखा समितिले छलफलका लागि पत्र काटेपछि मात्रै यसबारे बोर्डका सदस्यहरुले जानकारी पाएका थिए।
‘निगम सञ्चालक बोर्डका कुनै पनि बैठकमा ओसाका उडानका विषयमा छलफल भएको छैन’, उनले भने, ‘ओसाका उडान निगमका लागि फाइदा छ कि छैन, त्यसको केही अध्ययन गरिएको छैन। केही सिमित व्यक्तिको स्वार्थ परिपूर्तिका लागि उडान तय भएको छ। निगमले जापान उडान गर्ने हो भने नारिता उचित उपयुक्त ठाउँ हो।’
निगमले १२ वर्षपछि जापानको ओसाकासम्म व्यावसायिक उडान सुरु गर्ने भन्दै प्रचार गरेको थियो। तर, एकाएक उडान सेड्युल परिवर्तन गरिएको छ। यसबारे निगमले गैरजिम्मेवारी जवाफ दिँदै आएको मन्त्रालयको भनाइ छ। निगमले भने घोषणा गरिएको मितिमा अत्यधिक न्यून बुकिङ भएका कारण उडान रद्द गरेको बताउँदै आएको छ।
संघीय संसदको सार्वजनिक लेखा समितिमा कार्यकारी अध्यक्ष खरेलले फेब्रुअरीमा जापान र मार्चदेखि चीनमा उडान गर्ने भनेका थिए। उनले बोलेको समयमा दुवै देशमा हालसम्म पनि उडान सुरु हुन सकेको छैन। त्यसअघि निगमले वाइडबडीबाट लामो दुरीको उडानबारे कात्तिक अन्तिम साता मुख्यालयमै पत्रकार सम्मेलनमार्फत समय घोषणा गरेको थियो। तर, तोकिएको समयमा उडान हुन सकेन।
काठमाडौं–ओसाकाको एकतर्फी हवाई भाडा कम्तीमा ४५ हजार रुपैयाँ तथा दुईतर्फी ८० हजार रुपैयाँसम्म कायम गरिएको थियो। तर, टिकट बिक्री सोचेअनुसार नभएपछि निगमले टिकट दर घटाएको छ। टिकट दर घटाउँदा पनि बिक्री नभएपछि असारमा तोकिएको समयमा सम्भव नभएपछि भदौ १२ देखि उडान गर्ने सेड्युल तय गरिएको छ। तर, यसमा पनि जापानको ओसाका उडान हुने कुनै निश्चित नभएको मन्त्रालयको दाबी छ।
१९९४ मा सुरु भएको काठमाडौं–ओसाका उडान २००७ देखि बन्द भएको थियो।
सम्बन्धित समाचार
पाँच महिनादेखि नेपाल एयरलाइन्सको बोइङ ग्राउन्डेड, १६० दिनमा ३५ दिन मात्रै उड्यो वाई–१२
नेपाल एयरलाइन्सको दिल्ली उडानमा हेलचेक्र्याइँ, 'पार्किङ वे'मा गर्नुपर्ने काम 'ट्याक्सी वे'मा
नेपाल एयरलाइन्समा बेथिति : ५५ दिनदेखि बोइङ, ४१ दिनदेखि वाई–१२ जहाज ग्राउन्डेड
नेपाल एयरलाइन्समा अध्यक्ष खरेलको मनपरी, ४ चिनियाँ वाई-१२ जहाज महिना दिनदेखि ग्राउन्डेड
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
