मेलम्चीपछिको दोस्रो ठूलो खानेपानी आयोजना निर्माण सुरु, पोखराका ४ लाख जनता लाभान्वित हुने

नेपाल लाइभ | २०७६ जेठ २९ बुधबार | Wednesday, June 12, 2019 ०८:४२:०० मा प्रकाशित

काठमाडौं- नेपाल सरकारको ऋण लगानी र जापान सरकारको अनुदान सहयोगमा पोखरामा देशकै दोस्रो ठूलो खानेपानी सुधार विस्तार आयोजना सुरु भएको छ।

खानेपानी क्षेत्रमा देशमा सञ्चालित मेलम्चीपछिको दोस्रो ठूलो आयोजनाको रुपमा लिइएको खानेपानी संस्थानअन्तर्गत सञ्चालन हुने सो आयोजनाअन्तर्गत पोखराबाट १२ किमीको दूरीमा रहेको मर्दी खोलाको मुहानबाट ल्याइएको पानी प्रशोधन गरी शुद्धीकरण गरेर पिउन योग्य बनाउने लक्ष्य राखिएको छ।

सो प्रयोजनका लागि पानी प्रशोधन केन्द्र निर्माण तथा २ हजार घनमिटर क्षमताका ३ वटा ट्याङकी निर्माण गरी नगरका विभिन्न क्षेत्रमा पाइप लाइनमार्फत विस्तार गर्ने योजना रहेको छ। आयोजनाको पोखरा महानगरपालिका–१९ पुरुनचौरमा मंगलबार आयोजित एक कार्यक्रमबीच सङ्घीय सरकारकी खानेपानीमन्त्री बिना मगरले शिलान्यास गरिन्।

कार्यक्रममा मन्त्री मगरले खानेपानी जनताको मौलिक अधिकारको रुपमा संविधानमा व्यवस्था भएबमोजिम देशका सबै जनतालाई प्रशोधित शुद्ध पिउने पानीको प्रबन्ध गर्न सरकार प्रतिबद्ध रहेको बताइन्।

दूषित पानीको कारणबाट नै मानिसमा विभिन्न प्रकारका रोगहरु लाग्ने गरेको र शुद्ध खानेपानीको प्रबन्ध गर्न सके रोगबाट समेत बचाउन सकिने र मृत्युदर पनि घट्ने बताउँदै उनले भनिन्, 'आम जनतालाई शुद्ध खानेपानी पुर्‍याउने गरी सरकार योजनाबद्ध हिसाबले अघि बढेको छ, आगामी वर्षको बजेटमा पनि त्यसलाई प्राथमिकतामा राखेका छौँ।'

मन्त्री मगरले सङ्घ, प्रदेश र स्थानीय तह गरी तीनै तहका सरकारबीच खानेपानी तथा सरसफाइको क्षेत्रमा समन्वय गरी कुन स्तरको आयोजना कसले सञ्चालन गर्ने भन्ने बारेमा समेत आयोजनाको वर्गीकरण गरिने बताइन्। खानेपानी सुधार तथा विस्तार आयोजना अहिलेसम्मकै महत्वपूर्ण आयोजना रहेकाले ढिलासुस्ती नगरी जनताको अपेक्षाअनुसार समयमै काम सम्पन्न गर्न उनले आग्रह गरिन्।

गण्डकी प्रदेशका भौतिक पूर्वाधार विकासमन्त्री रामशरण बस्नेतले प्रदेश सरकारको पहिलो निर्णयनै दुई वर्षभित्रमा प्रत्येक जनताको घरमा धारा पुर्‍याउने रहेको बताउँदै खानेपानी विस्तार तथा शुद्धीकरण योजनाले लक्ष्य हासिल गर्न सघाउने जानकारी दिए। उनले आयोजना अघि बढाउने सन्दर्भमा आइपर्ने समस्यालाई सरकारले हल गर्ने प्रतिबद्धता व्यक्त गरे।

नेपालका लागि जापानका राजदूत मासामिची साइगोले जापान सरकार नेपाल र नेपाली जनतालाई नजिकबाट सहयोग गर्न सदैव तत्पर रहेको बताए।

प्रदेशसभा सदस्य रामजी बरालले खानेपानीको बाँधका कारण मुहान आसपासका जनता वर्षेनी डुबानबाट पीडित हुँदै आएको उल्लेख गर्दै जमिन कटान र बस्ती डुबानको समस्याबाट पीडित जनतालाई आयोजनाले सम्बोधन गर्नुपर्ने जिकिर गरे।

जापान सरकारको ४ अर्ब ८१ करोड ३० लाख अनुदान सहयोगमा सन् २०१७ को फेब्रुअरी १५ मा सो आयोजनाको सम्झौता भएको थियो। सन् २०२२ को अन्त्यसम्ममा निर्माण गरिसक्ने गरी खानेपानी सुधार आयोजना अघि बढाइको हो। हाल अप्रशोधित पानी वितरण हुँदै आएकोमा आयोजना निर्माण सम्पन्न भएपछि आयोजनाले समेटेको क्षेत्रमा २४ सै घण्टा गुणस्तरयुक्त प्रशोधित पानी वितरण हुने बताइएको छ।

आयोजना निर्माणपछि पाइपलाइनमा पानीको चापमा सुधार भई पानी चुहावट नियन्त्रण हुनुका साथै आपूर्तिमा सुधार हुँदा महानगरको १ देखि १९ वडाका ४ लाख ५ हजार ८ सय ८९ जनसङ्ख्या लाभान्वित हुने अपेक्षा संस्थानको छ।

पानी शुद्धीकरणका लागि मर्दी मुहानमा दैनिक ४ करोड लिटर क्षमताका बालुवा हटाउने ४ वटा ट्याङ्की निर्माण गर्ने, सोही क्षमताको ४ वटा पानी थिग्रयाउने ट्याङ्की तथा पोखरा–१९ पुरुनचौरमा ६ वटा पानी छान्ने फिल्टर, दुई वटा सफा पानी सङ्कलन गर्ने ट्याङ्की र क्लोरिनेसन प्लान्ट निर्माण गरिने खानेपानी संस्थानले जनाएको छ।

खानेपानी भण्डारण गर्न २० लाख लिटर क्षमताका ३ वटा पानी ट्याङ्की पोखराको फूलबारी, पर्स्याङ र कोलपाटनमा निर्माण गरी त्यसमार्फत बजारका विभिन्न भागहरुमा वितरण गर्ने योजना बनाइएको छ। रासस