काठमाडौँ- हाल सञ्चालनमा रहेका ३७ वटा सार्वजनिक संस्थानमध्ये २६ वटा संस्थान नाफामा रहेको देखिएको छ।
अर्थमन्त्री डा. युवराज खतिवडाले सोमबार संसदमा प्रस्तुत गरेको आर्थिक सर्वेक्षण २०७५/७६ अनुसार हाल सार्वजनिक संस्थानहरुको संख्या ३९ वटा रहेकोमा २ वटा संस्थानहरु बन्द अवस्थामा छन्। बाँकी ३७ वटा संस्थाहरु मध्ये २६ वटा सार्वजनिक संस्थान नाफामा रहेको देखिएको हो।
सर्वेक्षण अनुसार हाल सार्वजनिक संस्थानहरुमा करिब ४ खर्ब रुपैयाँ बराबरको लगानी रहेको छ। आर्थिक वर्ष २०७४/७५ सम्ममा सार्वजनिक संस्थानहरुमा सरकारको सेयर लगानी २ खर्ब ३७ करोड र ऋण लगानी १ अर्ब ६४ अर्ब रुपैयाँ रहेको सर्वेक्षणले देखाउँछ।
अघिल्लो आवको तुलनामा चालु आवमा कुल लगानीमा शेयरको हिस्सा २५ दशलमव ५ प्रतिशत र ऋण लगानीको हिस्सा ७ दशमलव ८ प्रतिशतले बढेको छ।
नाफामा रहेका २६ वटा सार्वजनिक संस्थानको नाफा ४४ अर्ब ९ करोड रुपैयाँ बराबर रहेको देखिन्छ भने नोक्सानीमा रहेका ११ वटा सार्वजनिक संस्थानको नोक्सान ६४ करोड रुपैयाँ बराबर छ। यसरी हेर्दा हाल संस्थानहरुको खुद नाफा ४३ अर्ब ४५ करोड रुपैयाँ बराबर रहेको छ।
सर्वेक्षणअनुसार अघिल्लो आर्थिक वर्ष २०७४/७५ मा सार्वजनिक संस्थानको कुल सञ्चालन आय २१ दशमलव ३ प्रतिशतले बढेर ३ खर्ब पुगेको छ। जुन कुल ग्रार्हस्थ्य उत्पादनमा कुल सञ्चालन आय १२ दशमलव ९ प्रतिशत बराबर हो।
नाफामा सञ्चालन भईरहेका संस्थानहरुबाट आर्थिक वर्ष २०७४/७५ मा ९ अर्ब ८९ करोड रुपैयाँ बराबर नाफा भएको देखिन्छ। अघिल्लो आर्थिक वर्षमा सार्वजनिक संस्थानहरुले गरेको लाभांश आर्थिक वर्ष २०७३/७४ को तुलनामा २७ दशमलव ३ प्रतिशतले बढी हो।
यसरी सार्वजनिक संस्थानहरुबाट अघिल्लो आर्थिक वर्षमा ९४ अर्ब ७ करोड रुपैयाँ बराबरको राजश्व संकलन भएको देखिन्छ। कुल राजश्वमा सार्वजनिक संस्थानबाट संकलित राजश्वको योगदान १२ दशमलव ९ प्रतिशत बराबर हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
