काठमाडौं– भोटेकोशी र त्रिशूली नदीमा आएको विनाशकारी बाढीबाट प्रभावित समुदायको पुनःस्थापना र पुनर्निर्माणका लागि नेपालले २ करोड अमेरिकी डलर अर्थात् करिब ३ अर्ब रुपैयाँ अनुदान पाउने भएको छ।
जलवायुजन्य विपद्बाट भएको क्षति सम्बोधन गर्न स्थापित हानि–नोक्सानी कोषको अक्टोबर २२ मा बसेको विशेष बैठकले नेपाललाई अनुदान दिने निर्णय गरेको कृषि, वन तथा पर्यावरण मन्त्रालयले जनाएको छ।
गत भदौ १० गतेको बाढीले ठूलो मानवीय र भौतिक क्षति पुर्याएको थियो। बाढीबाट प्रभावित परिवारलाई राहत उपलब्ध गराउनुका साथै क्षतिग्रस्त संरचनाको पुनर्निर्माणमा अनुदान रकम उपयोग गरिनेछ।
यसअघि अर्थमन्त्री डा. स्वर्णिम वाग्ले र कृषि, वन तथा पर्यावरण मन्त्री गीता चौधरीले प्रभावित क्षेत्रमा तत्काल सहयोग पुर्याउन कोषसमक्ष विशेष अनुरोध गरेका थिए।
अब नेपालले बार्बाडोस कार्यान्वयन ढाँचाअन्तर्गत प्रस्ताव तयार गरी कोषमा पेस गरेपछि रकम परिचालनको प्रक्रिया अघि बढ्नेछ।
यसैबीच, कोषको ११औँ बोर्ड बैठक सन् २०२७ मार्च १७ देखि १९ सम्म काठमाडौंमा आयोजना हुने मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
