काठमाडौं- त्रिभुवन अन्तर्राष्ट्रिय विमानस्थलबाट ठूलो परिमाणमा भारतीय नक्कली नोटसहित पक्राउ पर्नेमा आपराधिक पृष्ठभूमिका युनुस अन्सारी पनि रहेका छन्।
कतार एयरवेजबाट भारु नोट भित्र्याउने ३ पाकिस्तानी र नोट लिन आउने ३ नेपाली आज पक्राउ परेको विमानस्थल कार्यालले जनाएको छ।
पक्राउ पर्नेमा पाकिस्तानी नागरिक नासिर उद्धिन, नादिया अनवर, महमद अक्तर रहेका छन्। यस्तै नेपाली नागरिक अन्सारीसहित सोयर खान र सुजन रानाभाट पनि पक्राउ परेका छन्।
केन्द्रीय कारागारभित्रै रहँदा अन्सारीमाथि गोली प्रहार भएको थियो। नक्कली नोटकै प्रकरणमा उनी सन् २०१४ मा पक्राउ परेका थिए। उनी नेसनल टेलिभिजन सञ्चालनमा समेत आबद्ध थिए।
विमानस्थल भन्सार कार्यालयका प्रमुख गजेन्द्र ठाकुरका अनुसार नेपालले प्रतिबन्ध लगाएका भारु २ हजारका नोट ठूलो मात्रामा बरामद भएको छ। कति रकम छ भन्नेबारे केहीबेरमा जानकारी दिइने उनले बताए।
को हुन् युनुस?
भारतीय नक्कली नोट र लागुऔषध मुद्दामा चार वर्ष कैद सजाय काटेर निस्किएका युनुस अन्सारीलाई भारतीय नककली नोटसहित २०७० माघमा नख्खुबाट पक्राउ गरिएको थियो। उनी २०७० असोजमा केन्द्रीय कारागारबाट छुटेका थिए। त्यसलगतै उनी नक्कली नोटसहित २०७० माघमा पक्राउ परे। त्यसबेला उनको साथबाट प्रहरीले ३४ लाख नक्कली भारतीय नोट फेला परेको थियो।
उनी पूर्वमन्त्री सलिम मियाँ अन्सारीका छोरा हुन्। अन्सारी पहिलोपटक २०६५ पुस १८ मा त्रिपुरेश्वरको ब्लुबर्ड होटलको कोठाबाट २५ लाख ४४ हजार नक्कली भारुसहित पक्राउ परेका थिए।
जेलमा हुँदा अन्सारीले बाबर भन्ने नाम प्रयोग गरी पाकिस्तान र दुबईबाट नक्कली भारु मगाउने गरेका थिए। उनी केन्द्रीय कारागारमा रहँदा उनकै योजनामा २०६७ असोजमा ल्याइएको ४० लाख ९० हजार जाली नोटसहित विमानस्थलबाट नेपाली नागरिक चोकट महतो पक्राउ परेका थिए।
अन्सारीलाई बयानका लागि अदालत लैजाँदै गर्दा जिल्ला अदालत काठमाडौं परिसर अगाडि र २०६७ फागुन २६ गते केन्द्रीय कारागारभित्रै गोली प्रहार भएको थियो।
उनलाई त्यसबेला भारत उत्तरप्रदेश लखनउ घर भएका जसजित भनिने मनमितसिंह भाटियाले गोली हानेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
