भैरहवा- राष्ट्रिय गौरवको आयोजनाको रुपमा रहेको निर्माणाधीन गौतमबुद्ध अन्तर्राष्ट्रिय विमानस्थलको निर्माण कार्य रोकिएको छ। विमानस्थलको ठेकेदार कम्पनी 'नर्थ वेस्ट सिभिल एभिएसन'ले गरेको कामअनुसार भुक्तानी नपाएपछि विमानस्थलको काम रोकिएको विमानस्थल आयोजनाका प्रमुख प्रवेश अधिकारीले जानकारी दिए।
लामो समयदेखि नदीजन्य पदार्थ आपूर्ति नहुँदा निर्माण कार्य प्रभावित हुँदै आएको विमानस्थलका लागि अर्को समस्या थपिएको छ। बुटवल उपमहानगरपालिकाले विमानस्थलका लागि नदीजन्य पदार्थ आपूर्ति गर्ने सम्बन्धमा निर्माण कम्पनीसँग गरेकाे सम्झौताअनुसारको मूल्यमा नदीजन्य पदार्थ दिन नमानेपछि विमानस्थल निर्माण कार्य प्रभावित हुँदै आएकाे छ।
विमानस्थलको धावनमार्ग बाहिर वरिपरिको सडक, पार्किङ, प्रवेश र निकासलगायतका संरचना बनाउनका लागि नदीजन्य पदार्थ आवश्यक रहेको विमानस्थल आयोजनाका प्रमुख अधिकारीले जानकारी दिए। तर, बुटवल उपमहानगरपालिकाले सम्झौताअनुसार नदीजन्य पदार्थ उपलब्ध नगराउँदा आयोजनामा थप समस्यामा परेको उनले बताए।
त्यसमाथि ठेकदार चिनियाँ कम्पनीले भुक्तानी नपाएपछि निर्माण कार्य नै ठप्प पारेको छ।
ठेकेदार कम्पनीले भुक्तानी नपाएपछि काम राेक्किँदा विमानस्थलको मुख्य मानिएकाे धावनमार्गको निर्माण कार्य नै अलपत्र परेकाे हाे। रकम अभावका कारण ठेकेदारले पेट्रोलियम पदार्थ खरिद गर्न नसकेपछि काम रोकेको बताइएको छ। विमानस्थलको धावनमार्ग पिचका लागि दैनिक २० लाख रुपैयाँ बढीको पेट्रोलियम पदार्थ आवश्यक पर्ने गरेको थियो।
सम्पन्न भएको कामको भुक्तानीका लागि आयोजनाले पटक-पटक संस्कृति, पर्यटन तथा नागरिक उड्डयन मन्त्रालयलाई ताकेता गर्दै आएपनि कुनै सुनुवाइ भएको थिएन। मन्त्रालयले एडिबीलाई पठाउनु पर्ने फाइल नपठाउँदा एडिबीबाट रकम आउन नसकेको हो। जसका कारण आयोजनाले भुक्तानी गर्न सकेको छैन। आयोजनाका अनुसार एडिबीले आयोजनालाई २० करोड बढी रुपैयाँ भुक्तानी दिन बाँकी छ।
एडिबीसँग भुक्तानीको लागि पर्यटन मन्त्रालयले समयमै समन्वय नगर्दा विमानस्थलमा काम रोकिएको प्रमुख अधिकारीले बताए। 'भुक्तानीको फाइल पर्यटन मन्त्रालयमा थन्किएको छ', उनले भने, 'समयमै फाइल सम्बन्धित निकायमा नपुग्दा काम बन्दको अवस्थामा पुगेको हो।'
ठेकेदार कम्पनीले भुक्तानी नपाउँदासम्म काम सुचारु नगर्ने अडान लिएको उनले बताए।
ठेकेदार कम्पनीलाई नेपाल नागरिक उड्डयन प्राधिकरणले आयोजना लागतको ३७ दशमलब ४ प्रतिशत रकम भुक्तानी गरेपनि एडिबीमार्फत पर्यटन मन्त्रालयले दिने रकम पटक-पटक रोकिँदै आएको छ।
प्राधिकरण अन्तर्गतको राष्ट्रिय गौरवको आयोजन निर्देशनालय स्रोतले पनि निर्माण कम्पनीले १९ दिन अगाडिदेखि नै निक्कै सुस्त गतिमा काम गरिरहेकाे जानकारी दिएकाे छ। ‘रकम निकासीमा ढिलाइ भएको अवस्था रनवे पिचको काम वर्षाअगाडि हुन सक्दैन। जसले विमानस्थल निर्माणको समय पनि थप्नुपर्ने हुन्छ’, स्रोतले भन्यो।
यसअलावा नदीजन्य पदार्थको अभावले आयोजना थलिने अवस्थामा पुग्ने आयोजनाका एक अधिकारीले बताए। 'वर्षायाम लागेपछि नदीजन्य पदार्थ चाहेर पनि निकाल्न सकिँदैन', ती अधिकारीले भने, 'जसले गर्दा आयोजना संकटमा पर्ने सम्भावना प्रबल देखिएको छ।'
विमानस्थलमा अहिले धावनमार्गको अन्तिम चरणको कालोपत्रे गर्ने काम भइरहेको छ। ३ किलोमिटरको धावनमार्गअन्तर्गतको ५ सय मिटर मात्र कालोपत्रे गर्न बाँकि छ। 'एकदिनमा १५ मिटर चौडाइ र ३ सय मिटर लम्बाइ पिच हुने गरेको थियो', आयोजना प्रमुख अधिकारीले भने, 'अब दुई/चार दिन मात्रै काम रोकिएमा आयोजना धेरै प्रभावित हुन्छ।'
अन्तिम समयमा रकम र नदीजन्य पदार्थ अभावको समस्याले आयोजना प्रभावित भएपछि स्थानीय तथा पर्यटन व्यवसायीमा निराशा छाएको छ। २०१९ जुन महिनाबाट सञ्चालनमा ल्याउने गरी विमानस्थलको काम भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
