काठमाडौं- प्रधानमन्त्री केपी शर्मा ओली साताव्यापी भ्रमणका लागि दक्षिणपूर्वी एसियाली मुलुकहरू भियतनाम र कम्बोडियाको भ्रमणका लागि प्रस्थान गरेका छन्।
प्रधानमन्त्री ओली नेपाल वायुसेवा निगमको चार्टर विमान 'एयरबस ए-३२०' को उडानमार्फत त्यसतर्फ प्रस्थान गरेका हुन्। उडान समय बिहान १०ः२५ का लागि तोकिएको भए पनि उनको उडानमा केही ढिलाई भएको थियो।
भियतनामका प्रधानमन्त्री गुयन सुआन फुक र कम्बोडियाका प्रधानमन्त्री हुन सेनको निमन्त्रणामा भ्रमणमा निस्कन लागेका ओलीको यो पाँचौ विदेश भ्रमण हो।
भियतनामबाट भ्रमणको सुरुवात गर्ने ओलीले भियतनामी समकक्षी गुयन सुआन फुकसँग द्धिपक्षीय वार्तासमेत गर्नेछन्। परराष्ट्रमन्त्रालयका अनुसार उनले त्यहाँको संसद् ‘नेसनल एसेम्ली’का अध्यक्षसँग पनि भेट्नेछन्। ओलीको सम्मानमा भियतनामी प्रधानमन्त्रीले रात्रिभोजको आयोजना गर्नेछन्।
भ्रमणकै क्रममा ओलीले बुद्धको सम्मान र सम्झनामा आयोजना गरिने अन्तर्राष्ट्रिय बेशाक दिवसको सभालाई सम्बोधन गर्नेछन्। संयुक्त राष्ट्र संघकाे आह्वानमा सन् २००० देखि मनाइँदै आएकाे यो दिवस यस वर्ष भियतनाममा मनाइँदैछ।
त्यस्तै उनले होची मिन्ह राष्ट्रिय राजनीतिक प्रतिष्ठान र नेपाल-भियतनाम व्यापार मञ्चकाे सभालाई समेत सम्बोधन गर्नेछन्।
भ्रमणकै बेला नेपाल–भियतनामबीच सिधा हवाई उडान गर्ने सम्झौतामा हस्ताक्षर हुनेछ। यद्यपि, सन् २०१५ मै दुई देशबीच सिधा हवाई उडान गर्नेबारेको प्रारम्भिक हस्ताक्षर भएको थियो। जसमा दुबै देशले सातामा १४ वटा उडान गर्न पाउने उल्लेख थियो। त्यसको कार्यान्वयन भने हुन सकेकाे छैन।
भियतनामको भ्रमण सकेर ओली कम्बोडियाको भ्रमणमा जानेछन्। कम्बोडिया भ्रमणका क्रममा ओलीले समकक्षी हुन सेनसँग द्धिपक्षीय वार्ता गर्नेछन्। प्रधानमन्त्री हुन सेनले ओलीको सम्मानमा रात्रिभोजको आयोजना गर्नेछन्।
त्यस्तै, ओलीले कम्बोडियाको दुबै संसद्का अध्यक्षसँग भेटवार्तासमेत गर्नेछन्। ओलीले त्यहाँको एउटा व्यापारिक सम्मेलनलाई समेत सम्बोधन गर्नेछन्।
भ्रमण टोलीमा प्रधानमन्त्री पत्नी राधिका शाक्य, परराष्ट्रमन्त्री प्रदीपकुमार ज्ञवाली, परराष्ट्रसचिव शंकरदास बैरागीलगायत छन्। यसबाहेक उनको भ्रमण टोलीमा सांसद, सचिव, उपमेयर, उद्योगीसहित ४२ रहेका छन्।
प्रधानमन्त्री ओली जेठ १ गते नेपाल फर्कने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
