काठमाडौं– यातायात व्यवस्था विभागले ट्याक्सी भाडादर समायोजन गर्ने भएको छ। भाडा बढाइनुपर्ने मागसहित ट्याक्सी व्यवसायीले लामो समयदेखि आवाज उठाउँदै आएका थिए।
व्यवसायीको मागबमोजिम सरकारले पनि उनीहरूको कुरा सुन्ने भएको हो।
सार्वजनिक मिटर जडित भाडाका ट्याक्सीले लामो समयदेखि भाडादर वृद्धिको मागमा विभाग सकारात्मक देखिएको हो। विभागले ट्याक्सीको भाडादरका सम्बन्धमा अध्ययन गर्न समिति नै गठन गरेको थियो।
समितिले विभागलाई प्रतिवेदन बुझाउन बाँकी नै भए पनि भाडादर बढ्नुपर्नेमा समितिको जोड रहेको विभागका महानिर्देशक कुमार प्रसाद दहालले जानकारी दिए।
भाडादर बढाइनुपर्ने तथा नयाँ ट्याक्सी दर्ता रोक्नुपर्ने माग राख्दै आएका ट्याक्सी व्यवसायीहरूले मंगलबार पनि महानिर्देशक दाहाललाई भेटेर आफ्ना कुरा राखेका छन्।
ट्याक्सी व्यवसायीहरूले भाडादर बढाउँदा फ्ल्याग डाउन अर्थात ट्याक्सी चल्न सुरु हुनेबित्तिकै १ सय ५० रुपैया बिल उठ्ने बनाइनुपर्ने भन्दै महानिर्देशक दाहाललाई जानकारी गराएका छन। तर दाहालले भने भाडादरका विषयमा छुट्टै प्राविधिक समितिले अध्ययन गरिरहेको भन्दै यति नै बढ्छ भनेर भन्न नसकिने बताए।
फ्ल्याग डाउन अर्थात ट्याक्सी चलाउन सुरु गर्नेबित्तिकै मिटरमा उठ्ने रकम हाल १४ रुपैयाँ रहेकोमा त्यसलाई कम्तीमा पनि एक सय ५० रुपैयाँ पुर्याउनुपर्ने व्यवसायीहरूको माग छ। यसो गरिँदा ट्याक्सी चढ्ने बित्तिकै यात्रुले १ सय ५० रुपैयाँ तिर्नुपर्ने हुन्छ।
‘भाडादर समायोजन हुन्छ। केही हदसम्म बढ्ला पनि। प्राविधिक समितिले प्रतिवेदन निर्माणको काम अन्तिम अवस्थामा पु¥याएको छ। मन्त्रालयसँग छलफल भएपनि भाडादर हेरफेर हुन्छ। तर, अहिले नै यति बढ्छ भनेर म भन्न सक्दिन,’ व्यवसायीहरुसँग कुरा राख्दै उनले भने।
उपत्यकामा नयाँ ट्याक्सी ल्याउँदा सोहीअनुसारका ट्याक्सी ट्याण्डलगायत संरचना बनाइनुपर्ने र सकभर नयाँ ट्याक्सी दर्ता खोल्नै नहुने विषयमा पनि ट्याक्सी व्यवसायीहरूको लबिङ गर्दै आएका छन।
उपत्यकाका विभिन्न क्षेत्रमा ट्याक्सी स्टेशन आवश्यक रहेको उनीहरुको भनाइ छ। त्यसैगरी, सरकारले नयाँ ट्याक्सी दर्ता खोलेकोप्रति पनि उनीहरूले विरोध जनाउँदै आएका छन।
यो पनि पढौं
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
