राजविराज- सप्तरीको सप्तकोसी नगरपालिकाका निमित्त प्रमुख प्रशासकीय अधिकृतको कार्यकक्षमा निर्वाचित जनप्रतिनिधिले नै तालाबन्दी गरेका छन्।
उपमेयर आशा चौधरीको नेतृत्वमा वडा नम्बर १ का अध्यक्ष नारायण आचार्यसहितका जनप्रतिनिधिको टोलीले आइतबार निमित्त प्रशासकीय अधिकृत रामदेव चौधरीको कार्यकक्षमा तालाबन्दी गरेका हुन्।
व्यक्तिगत अपेक्षा पूरा नहुँदा चौधरीले लामो समयदेखि काममा बेवास्ता गरी नगरपालिकाको काम प्रभावित बनाएकाले कार्यकक्षमा तालाबन्दी गरिएको उनीहरूले बताएका छन्।
‘हामीले पटक–पटक अनुरोध गर्यौँ, तर उहाँ कुनै पनि काम गर्न तयार हुनुभएन,' चौधरीले भनिन्,‘कामै नगर्ने भएपछि तपाईँ कार्यालयमा आउनुको अर्थ छैन भनेर हामीले तालाबन्दी गरेका हौँ।’
जनप्रतिनिधिलाई बेवास्ता गरेको र काम प्रभावित बनाएको विषयमा जिल्ला प्रशासन कार्यालय सप्तरीमा समेत मौखिक जानकारी गराइएको उनले बताइन्।
यसरी सुरु भयो समस्या
नगरपालिकाका प्रमुख प्रशासकीय अधिकृत वासुदेव रेग्मी कार्यालयमा हाजिर हुनासाथ बिदा बसेका छन्। संघीय मामिला तथा सामान्य प्रशासन मन्त्रालयबाट आएका रेग्मी चैत १८ गते कार्यालयमा हाजिर भएका थिए। पोखरामा तीन महिने तालिम लिने भन्दै बिदा बसेका उनी चैतको अन्तिम सातादेखि फर्केर आएका छैनन्।
त्यसअघिका कार्यालय प्रमुख राजकपुर चौलागाईं गत पुष महिनामा सरुवा भएपछि चौधरी नै निमित्त थिए। उपमेयर चौधरीका अनुसार रामदेव कार्यालय प्रमुख हुँदाका अधिकांश योजना र सम्झौता अधुरा छन्।
पुरानो जिम्मेवारी पनि आफूले बोक्नु पर्ने भएपछि चौधरीलाई निमित्त दिएर रेग्मी बिदा बसेको जनप्रतिनिधिहरुको ठम्याई छ। रेग्मीले आफू हाजिर भएपछिका फाईलको मात्रै जिम्मेवारी लिने र तामेलीमा रहेका फाईलको जिम्मा नलिने जवाफ दिइसकेका छन्।
‘३९ वटा फाइल अहिले पनि अड्किएर बसेका छन्,’ जनप्रतिनिधिको एकै स्वर छ,‘विकास/निर्माण, समाजिक सुरक्षालगायतका कुनै पनि काम अगाडि नबढेपछि हामीसँग अर्को विकल्प भएन।’
काठमाडौँमा रहेका मेयर उत्तम कुमार गौतमले पनि निमित्त प्रमुख प्रशासकीय अधिकृत चौधरीले लामो समयदेखि नियोजित रुपमा काम रोकेर राख्ने गरेको फोनमा प्रतिक्रिया दिए।
निमित्त प्रमुख प्रशासकीय अधिकृत चौधरीले भने प्रमुख प्रशासकीय अधिकृत हाजिर भइसकेको र आफूले आर्थिक कारोबार गर्ने अख्तियारी नपाएकाले काम रोकिएको बताए। जनप्रतिनिधिले कार्यालय प्रमुखको क्षेत्राधिकार मिचेपछि समस्या सुरु भएको उनको आरोप छ।
कार्यालयमा ताला लगाउने वनका फरार अभियुक्त
निमित्त प्रशासकीय अधिकृत चौधरीको कार्यकक्षमा तालाबन्दी गर्न पुगेका वडाध्यक्ष आचार्य डिभिजन वन कार्यालय सप्तरीले पक्राउ पुर्जी जारी गरेका फरार अभियुक्त हुन्।
राष्ट्रिय वन क्षेत्रबाट बालुवा–गिट्टी तस्करी गरेको आरोपमा वन कार्यालयले पुष ४ गते नै आचार्यका नाममा पक्राउ पुर्जी जारी गरेको छ।
सप्तकोसी नगरपालिका-१ स्थित अमाहा खोलाबाट बालुवा–गिट्टी तस्करीमा संलग्न आचार्यको ना ४ त १८४५ नम्बरको ट्याक्टर खोलाबाटै रंगेहात पक्राउ परेको थियो।
फरार सूचीमा रहेका आचार्यलाई वन कार्यालयले पक्राउ गर्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
