जनकपुर- मुख्यमन्त्री लालबाबु राउतले मुख्यमन्त्री राहत कोष र अन्य विविध कोषको चरम दुरुपयोग गरेका छन्। २ नम्बर प्रदेशको 'नागरिक राहत, क्षतिपूर्ति तथा आर्थिक सहायता निर्देशिका २०७५' को प्रावधानविपरीत व्यक्ति तथा संघसंस्थालाई जथाभावी रकम वितरण गरी कोषको चरम दुरुपयोग गरेका हुन्।
‘प्रदेशभित्र पिछडिएका क्षेत्र, वर्ग र समुदाय तथा चरम आर्थिक अभाव भोग्न बाध्य भई कठिन जीवनयापन गरिरहेका अपाङ्ग, असहाय, अशक्त, टुहुरा, बेसाहारा, विपन्न नागरिकलाई आर्थिक सहायता उपलब्ध गराई उनीहरूको जीवन रक्षा गरी सामाजिक सुरक्षा प्रदान गर्न प्रदेश सरकारले प्रदान गर्ने आर्थिक सहायतालाई पारदर्शी र व्यवस्थित बनाउने उद्देश्यले प्रदेश सरकार कार्यसम्पादन नियमावली बमोजिम प्रदेश मन्त्रिपरिषद्ले यो निर्देशिका बनाएको छ’, उक्त निर्देशिकाकाे प्रस्तावनामा लेखिएको छ।
असहाय, विपन्न, बेसाहारा, टुहुरा, अपाङ्गता भएका व्यक्तिलाई दिनुपर्ने आर्थिक सहायताको रकम धार्मिक, खेलकुद, सांस्कृतिक तथा नाटक कार्यक्रमका लागि प्रदान गरिएकाे छ। यसअलावा व्यक्ति, संघसंस्थालाई रकम निकासा गरिनुका साथै प्रदेश सांसदको आवास व्यवस्थापनका लागिसमेत गरी कूल ७९ लाख रुपैयाँ सहयाेगका नाममा वितरण गरिएको छ।
काेषबाट सबैभन्दा बढी १० लाख रुपैयाँ जनकपुरधाममा मैथिली विकास कोषले आयोजना गरेको अन्तर्राष्ट्रिय नाटक महोत्सवका लागि जीवनाथ चौधरीलाई प्रदान गरिएकाे छ। साेही कार्यक्रमका लागि भन्दै जनकपुरधाममा वरिष्ठ पत्रकार तथा साहित्यकार समेत रहेका रामभरोस कापडीलाई समेत ५ लाख रुपैयाँ बाँडिएकाे छ।
त्यस्तै प्रदेश सरकारका ६ जना राज्यमन्त्रीको आवास व्यवस्थापनका लागि ४–४ लाख रुपैयाँका दरले बाँडिएकाे छ। २०७५ कात्तिक ९ गतेको मन्त्रिपरिषद्को बैठकबाटै राज्यमन्त्रीहरुलाई रकम निकासा गर्ने निर्णय गरिएको थियाे।
खेलकुद क्षेत्रअन्तर्गत विभिन्न काेषहरुबाट कुशिन बुदो काई कराँते संघलाई ५ लाख, सिन क्योकुसन कराँते संघलाई ४ लाख, युनाइटेड क्रिकेट क्लब वीरगञ्जलाई ४ लाख र जनकपुरधाममा आयोजना भएको सहिद कप क्रिकेट प्रतियोगिताका लागि चैत्र १८ गते ७ लाख रुपैयाँ निकासा गरिएकाे छ।
धनुषाको लक्ष्मीनियाँ गाउँपालिकामा भगवानको २४औं अवतार एवं यज्ञका लागि भन्दै ५ लाख रुपैँया, सर्लाहीको कडेना गाउँपालिकामा आयोजना हुने धार्मिक कार्यक्रमका लागि १ लाख, चैत्र १६-१७ सम्म जनकपुरधाममा आयोजना गरिएको हिन्दी सम्मेलनका लागि हिन्दी प्रतिष्ठानका अध्यक्ष पत्रकार राजेश्वर नेपालीलाई ५ लाख रुपैयाँ वितरण गरिएको छ।
जनकपुरधाममै आयोजना भएको जेसिसको राष्ट्रिय सम्मेलनका लागि ५ लाख रुपैयाँ तथा वीरगञ्जमा आयोजना भएको ज्येष्ठ नागरिक सम्मेलनका लागि ३ लाख रुपैयाँ आर्थिक सहयोग प्रदान गरिएको छ।
काेषबाट रिपोर्टर्स् क्लब नेपालका अध्यक्ष ऋषि धमलालाई काठमाडौंमा क्लबको वार्षिकोत्सव कार्यक्रमका लागि भन्दै १ लाख रुपैयाँ दिइएकाे छ।
मधेश आन्दोलनमा मुक्तिनारायण यादवको ज३प २९९१ नम्बरको १ सय २५ सिसीको मोटरसाइकल जली नष्ट भएकाे भन्दै उनलाई १ लाख रुपैयाँ निकासा गरिएकाे छ।
प्रदेशकाे मुख्य पदमा रहेका व्यक्तिबाटै राज्यकाेषकाे चरम दुरुपयाेग भएकाे खुलेकाे हाे। सहायता वितरण सम्बन्धमा अन्य कुनै कानुनी प्रावधान र नियम नरहेको पनि मुख्यमन्त्री कार्यालय स्रोतको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
