काठमाडौं– कतारका लागि नेपाली राजदूत रमेश कोइरालालाई सरकारले फिर्ता बोलाउने भएको छ।
मन्त्रीपरिषद्को निर्णय सर्वाजनिक गर्न आयोजित पत्रकार सम्मेलनमा सरकारका प्रवक्ता गोकुल बाँस्कोटाले कतारका लागि नेपाली राजदूत काेइरालालाई फिर्ता बाेलाउने निर्णय भएकाे जानकारी दिएका हुन्। 'किन र केको लागि फिर्ता गरिएको नसोध्नुस्, सरकारले राम्रो कामको लागि निर्णय गरेको हो,' प्रवक्ता बाँस्कोटाले भने। राजदूत फिर्ता बोलाउने अधिकार सरकारलाई भएकाले सोही अनुसारको निर्णय गरिएको मन्त्री बाँस्कोटाको भनाइ छ।
कोइरालालाई तत्कालीन शेर बहादुर देउवा सरकारले कांग्रेसको कोटाबाट कतारका लागि नेपाली राजदूतमा नियुक्त गरेको थियो।
त्यसैगरी सरकारले खुलामञ्चको जग्गामा अस्थायी सटर बनाउने अनूमति नदिइएको पनि स्पष्ट पारेको छ। मन्त्री बास्कोटासँगै पत्रकार सम्मेलनमा सहभागी भएका संघीय मामिला तथा सामान्य प्रशासन मन्त्रालयका प्रवक्ता रुद्रसिंह तामाङले खुलामञ्चको जग्गा अतिक्रमण गरेर अस्थायी सटर बनाउने अनुमति नदिइएको प्रष्ट्याएका छन्।
तत्कालीन काठमाडौं महानगरपालिकाका प्रमुख कार्यकारी अधिकृत समेत रहेका उनले तीनकुनेको जग्गामा बसपार्क बनाउने निर्णय जग्गा विवादका कारण ढिलाई भएपछि खुलामञ्चको जग्गामा बसपार्क सञ्चालन गर्न अस्थायी रुपमा अनुमति दिइएको पनि स्मरण गराए। मन्त्री बाँस्कोटाले भने सो सम्बन्धमा आफूलाई कुनै जानकारी नभएको बताए।
स्थानीयबासीले खुलामञ्चको जग्गा अतिक्रमण गरी अस्थायी सटर बनाउन दिएको भन्दै विरोधमा बिहीबारदेखि आन्दोलन सुरु गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
