रसुवा– रसुवामा मतदाता शिक्षाको नाममा वाम गठबन्धनले विद्यालयमा कार्यक्रम सञ्चालन गरेको छ।
जिल्लाको उत्तरगया गाउँपालिका ३ ठूलोगाउँमा रहेको श्री भुमेदेवी माविमा मतदाता शिक्षाको नाममा मतदान गर्न सिकाएको हो। विद्यालय वरपर निर्वाचन सम्बन्धी गतिविधि सञ्चालन गर्न नमिल्ने भए पनि गठबन्धनले विद्यालयभित्रै कार्यक्रम गरेको छ।
गठबन्धनमा आबद्ध नेता तथा कार्यकर्ताले विद्यालयमा पुगेर कक्षा ७ देखि १० सम्मका विद्यार्थीलाई मतदान गर्ने तरिका सिकाएका छन्। नमुना मतपत्र बोकेर विद्यालय पसेका उनीहरुले आफ्नो चुनाव चिह्नमा मतदान गर्न आग्रह गरेका थिए।
मतदान गर्नका लागि उमेर नपुगेका विद्यार्थीसामु पुगेका गठबन्धनको अनेरास्ववियूका विद्यार्थीले विद्यार्थीमाझ अभिभावकलाई हँसिया–हथौडा र सूर्य चिह्नमा मतदान गर्ने तरिका सिकाउन आग्रह गरेका बताइएको छ।
विद्यालय स्रोतका अनुसार, प्रधानाध्यापक ऋषि अधिकारी काठमाडौं गएको समयमा उनीहरु निर्वाचन शिक्षा दिन विद्यालय पुगेका थिए।
नेकपा एमालेका प्रतिनिधिसभाका उम्मेदवार जनार्दन ढकालले अनेरास्ववियूमा आबद्ध विद्यार्थीलाई मतदान गर्ने तरिका सिकाइएको बताए।
उनले भने, ‘हामीले विद्यार्थीलाई मतदान गर्न सिकाएर आचारसंहिता उल्लंघन गरेका छैनौं। गाउँगाउँमा मतदाता शिक्षा पुगेको छैन। मत बदर नहोस भनेर सचेत गराएका मात्र हौं।’
निर्वाचन आचारसंहिता विपरीत विद्यालयमा कार्यक्रम गरेकोबारे जिल्लाका सरोकारवाला निकायहरु भने बेखबर रहेका छन्। विद्यालयमा निर्वाचन शिक्षा सञ्चालन भएकोबारे आफूलाई जानकारी नआएको रसुवाका प्रमुख जिल्ला अधिकारी हिरादेवी पौडेलले बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
