राजनीति गर्ने नेतालाई तिखो प्रश्न सोध्ने रवीन्द्र मिश्र अहिले आफैं राजनीति गर्न आइपुगेका छन्। राजनीतिमा उनको प्रवेशले एउटा पंक्तिमा केही आशाको सञ्चार गराइरहेको छ।
यसको एउटा कारण, उनले बारम्बार उठाउने गरेको इमान र नैतिकताको राजनीतिको बहस हो। अर्को हो, इमान र नैतिकताको राजनीतिबाटै देश बदल्ने उनको महत्वाकांक्षा।
अहिले उनीबारे यो लेख लेखिरहँदा म के कुरामा पनि सचेत छु भने, म उनको अल्पकालीन समर्थक मात्र हुँ। भोलि उनले राजनीतिमा अवलम्बन गर्ने नीति र प्रदर्शन गर्ने नैतिकताको आधारमा सजिलै उनको आलोचक बन्न पनि सक्ने सचेत नागरिक हुँ।
रवीन्द्र मिश्रलाई मैले बिबिसी नेपाली सेवा मार्फत, उनको फेसबुक ट्वीटर मार्फत र उनले लेखेका लेख तथा केही पुस्तकमार्फत धेरथोर चिन्न सकेको छु। बिबिसी मार्फत कडा पत्रकार, फेसबुक–ट्विटर मार्फत परोपकारी भावना र दार्शनिक चेत भएको मान्छे र उनका पुस्तक तथा लेख मार्फत देश समृद्ध भएको देख्न चाहने एक आम नेपाली र कविता लेख्न सिक्दै गरेका सिकारु कवि। मैले मोटामोटी रुपमा चिनेका मिश्र यिनै थिए।
तर, पछिल्लो समय राजनीतिमा उनको प्रवेश र उनका केही अन्तर्वार्ता हेर्दा मैले उनलाई इमान र नैतिकताको राजनीति मार्फत देश समृद्ध बनाएरै छाड्ने महत्वाकांक्षा बोकेको एक राजनीतिज्ञको रुपमा पनी चिन्न थालेको छु। उनलाई सधैं यसैगरी चिन्न पाइयोस् भन्ने मेरो चाहना पनि छ।
मिश्र देश समृद्ध बनाएरै छाड्ने सपना बाँड्ने पहिलो राजनीतिज्ञ होइनन्। समृद्धिको सपना देखाएर आफ्नै मात्र समृद्धिमा केन्द्रित भएका नेताहरुको सूची तयार पार्ने हो भने अहिले राजनीतिमा हालीमुहाली गरिरहेका प्रायः सबै नेताको नाम पर्नेछ।
देश समृद्ध बनाउन हिँडेको नेता मात्र होइन, उसको नातागोता, इष्टमित्र सबै समृद्ध बन्ने तर देश र जनता झन्–झन् कंगाल बन्दै जाने स्थिति कसरी बन्यो? यो प्रश्न हामीले आफैंलाई सोध्ने आँट गर्नुपर्छ। यो आँट गर्यौं भने जवाफ पनि अवश्य पाउनेछौं।
मैले आफूले आफैंलाई प्रश्न गर्दा पाएको जवाफ हो, नेपालका अधिकांश नेतामा राजनीतिक इमान र नैतिकता हुँदै नहुनु नै देश समृद्ध नहुनुको मुख्य कारण हो। विभिन्न वाद र तन्त्र मार्फत शासन चलाउँदा पनि देश समृद्ध हुन नसक्नुको कारण नेतृत्वकर्ताहरुमा भएको नैतिक पतन नै कारक हो। मिश्रको दल विवेकशील साझा पार्टीको कार्यकर्ता नभए पनि म उनको पक्षमा बोल्नुको कारण इमान र नैतिकताको राजनीति मार्फत देश समृद्ध बनाउँछौं भन्ने उनको कुराको प्रभाव नै हो।
मिश्र र उनको दल इमान र नैतिकताको राजनीतिमा लगातार लाग्नेछन् भनेर ढुक्क भइहाल्ने अवस्था भने छैन। यसको कारण विगतमा जनताले विश्वास गरेका नेता र पार्टीबाट खाएको धोका हो। यद्यपि मिश्र र उनको दलले त्यो सिलसिलालाई तोड्दै धनवाद र डनवादबाट हाम्रो राजनीतिलाई अलग गरी उदाहरणीय काम गर्नेछन् भन्ने आशा गर्ने ठाउँ भने छ।
देश समृद्ध बनाउँछु भनेर सपना बाँड्नेको पछाडि हिजोका दिनमा हामी सबै लागेका थियौं। तर, इमान र नैतिकता गुमाइसकेका नेताका कुरामा हामी अझै पनि अलमलिएर तिनकै पछि लाग्ने हो भने देशको यो हालत हुनुमा ती नेताभन्दा धेरै दोषी हामी नै हुनेछौं।
इमान र नैतिकताको राजनीति मार्फत देश समृद्ध पार्छौं भन्ने रवीन्द्र मिश्रलाई कम्तीमा यो पटक मौका दिएर हेरौं। उनको दललाई समानुपातिकतर्फ कम्तीमा ३५ मत दिएर हेरौं। देशको नेतृत्व गर्नेहरु पुरानै नैतिकहीन नेताहरु भएछन् भने पनि कम्तीमा संसदमा तिनलाई खबरदारी गर्ने केही थान सांसद त जिताऔं। पछि मिश्रले र अन्य पुराना नेताले फेरि पनि पहिलेकै तरिकाले देश चलाउन थालेछन् भने जनताले अर्को चुनावमा कारबाही गर्ने नै छन्।
अहिलेलाई भने भोट हाल्दा राजनीतिमा इमान र नैतिकताको वकालत गर्नेहरुको चुनावचिह्नमा छाप लगाउन आफूलाई तयार राखौं।
हाल- दक्षिण कोरिया
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791965585.png)
-1791964075.png)
-1786602170.png)
