सप्तरी मालपोतमा बैंकमार्फत राजश्व संकलनको व्यवस्था, प्रभु बैंकले खोल्यो काउन्टर

कर्पोरेट

दिनेश शर्मा बुधबार, वैशाख ४, २०७६ १४:०५

राजविराज– भूमिसुधार तथा मालपोत कार्यालय सप्तरीमा नगद कारोबारलाई अन्त्य गरी बैंकमार्फत राजश्व संकलनको व्यवस्था मिलाइएको छ।

प्रभु बैंकले कार्यालय हाताभित्रै राजश्व संकलन काउन्टर स्थापना गरी बुधबारदेखि सेवा सुरु गरेको छ। राजविराज नगरपालिकाका मेयर शम्भुप्रसाद यादवले काउन्टरको उद्घाटन गरेका हुन्।

प्रभु बैंकको राजविराज शाखाअन्तर्गत काउन्टर सञ्चालन हुने प्रभु बैंकको प्रदेश १ का 'भाइस विजनेस अफिसर' आकाश दाहालले बताए। सरकारी कामकाजमार्फत पनि सर्वसाधारणलाई बैंकिङ पद्धतिमा जोड्ने प्रयासअन्तर्गत राजश्व काउन्टरको अवधारणा सुरु गरिएको उनले बताए।

प्रभु बेंकले मुलुकका विभिन्न स्थानमा गरी ८ वटा सरकारी निकायमा राजश्व संकलन काउन्टर सञ्चालन गरी सेवा दिँदै आएको तथा २ साताभित्रै भन्सार कार्यालय राजविराजमा पनि काउन्टर सञ्चालनको तयारी भएको उनले जानकारी दिए। १ सय ७१ शाखा कार्यालयमार्फत करिब १२ लाख जनतालाई प्रभु बैंकले सेवा दिँदै आएको दाहालको भनाइ छ।

भूमिसुधार तथा मालपोत कार्यालय सप्तरीका प्रमुख सिकिन्द्रप्रसाद साहले ‘कार्यालयमा अतिरिक्त पैसा नलिई कर्मचारीले कामै गर्दैनन्’ भन्ने गुनासो कम गर्न काउन्टरले सहयोग गर्ने बताए। जनशक्ति अभावका कारण काम ढिलो हुने र कतिपयको कामै नहुने अवस्था आएपछि सेवाग्राहीले आर्थिक कुरा उठाएर लान्छित गर्ने गरेको उनको तर्क छ।

‘हाम्रो प्रयास भनेको कार्यालयलाई क्यासलेस बनाउने हो’, साहले भने, ‘पैसाको कारोबार नै नभएपछि लेनदेन गरेको जानकारी पाउनासाथ सम्वन्धित व्यक्तिलाई तत्कालै कारबाहीको दायरामा ल्याउन सकिन्छ। यसले सर्वसाधारणको गुनासो पनि कम गर्छ भन्ने लाग्छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।