अनुसन्धान

कृषि उद्यम केन्द्रको घोटालामा महालेखाले भन्यो- महासंघ अन्तर्गतका केन्द्रलाई बजेट दिँदा पुनर्विचार गर्नुपर्छ

उत्तम काप्री शुक्रबार, चैत २९, २०७५ १६:३४

काठमाडौं- उद्योग वाणिज्य महासंघ अन्तर्गतको कृषि उद्यम केन्द्रमा भएको रकम हिनामिना विषय महालेखाको ५६औं प्रतिवेदनमा समावेश गरिएको छ। महालेखाको ५६औं प्रतिवेदनमा उच्च मूल्य कृषि वस्तु, जीविकोपार्जन सुधार, आयस्तर वृद्धि, उन्नत बीउ बिजनलगायतका कार्यक्रममा मन्त्रालय मातहतका आयोजनाबाट समेत सञ्चालन भएको अवस्थामा केन्द्रलाई दिएको अनुदानबाट सञ्चालन हुने कार्यक्रममा उपलब्धि सुनिश्चितता नभएको उल्लेख गरेको छ।

राष्ट्रियस्तरमा सबल, सशक्त, दिगो र निजी क्षेत्र निर्देशित उच्च आर्थिक विकासमा योगदान पुर्‍याउन निर्यात योग्य उच्च मूल्यका कृषिजन्य वस्तुको उद्योग, व्यवसायको पहिचान, प्याकेजिङ तालिम, उद्यमशील तालिम, भण्डारण क्षमता विस्तारलगायतका कार्य गर्न ६ आयोजनाका लागि महासंघको कृषि उद्यम केन्द्रलाई २०७०/७१ देखि २०७४/७५ सम्म दिएको अनुदान रकमको काम नभएको प्रतिवेदनमा उल्लेख छ।

कृषि उद्यम केन्द्रका नाममा कृषि वस्तु कार्यक्रममा ८ करोड ४५ लाख २५ हजार, उच्च पहाडी कृषि व्यवसाय तथा जीविकोपार्जन सुधार कार्यक्रममा १३ करोड ९२ लाख ६८ हजार रकमको काम नभएको प्रतिवेदनमा उल्लेख छ।

साना तथा मझौला कृषक आयस्तर वृद्धि कार्यक्रममा ५ करोड ५३ लाख ९७ हजार, किसानका लागि उन्नत बीउ बिजन कार्यक्रममा १८ करोड ४७ लाख ६८ हजार, एक गाउँ एक उत्पादन कार्यक्रममा १९ करोड २४ लाख ४१ हजार, एक जिल्ला एक उत्पादन कार्यक्रममा २८ करोड १ लाख ४९ हजारसमेत ९३ करोड ६५ लाख ४८ हजार अनुदान उपलब्ध गराएको प्रतिवेदनमा उल्लेख छ।

अनुदान उपयोग र उपलब्धि सम्बन्धमा मन्त्रालयले अनुगमन तथा मूल्याङ्कन गरी अनुदानको निरन्तरतामा पुनरवलोकन गर्नुपर्ने प्रतिवेदनमा उल्लेख छ।