निर्मला घिमिरे/काठमाडौं– बिहान साढे ९ बजे ताहाचलस्थित श्रम कार्यालयबाहिर गेटमा उभिइरहेका २० जनाजति युवा भेटिए। उनीहरु श्रम स्विकृति तथा पुनः श्रम स्विकृतिका लागि आएका रहेछन्।
तिनैमध्ये ओखलढुंगाका दयावीर विश्वकर्मा वैदेशिक रोजगारीमा साउदीका लागि पुन: श्रम स्विकृति लिन उभिएका थिए। एक वर्षअगाडि साउदी जाँदा उनी बिहानै ५ बजेदेखि श्रम कार्यालयमा लाइन बसकेका थिए। दिनभरमा पनि पालो पाएका थिएनन्।
विगत सम्झँदै विश्वकर्माले भने, ‘दुई-तीन दिन धाउँदासमेत पालो पाउन मुस्किल हुन्थ्यो। १५ सय/२ हजार दिए १ डेढ घन्टामै काम बन्छ भन्दै बिचौलियाहरु पनि आउँथे। अहिले त्यस्तो कुनै समस्या देखिएन। सबै प्रदेशमा श्रम कार्यालय भएसँगै धेरै सजिलो भएछ।’
प्रदेश १ मा विराटनगरमा श्रम कार्यालय खोलिएको छ। तर ओखलढुंगाका उनलाई बाटो नपरेपछि पुनः श्रम स्विकृतिका लागि ताहाचल नै आएका हुन्। ‘विराटनगर जानभन्दा काठमाडौंमा नै सहज लाग्यो। सिधै काठमाडौं आयो, यतैबाट विदेश गयो,’ उनी भन्छन्।
ताहाचलमै कतारका लागि पुन: श्रम स्विकृति लिएर फर्कंदै गरेका मधु पोख्रेलले पनि विगतभन्दा धेरै सहजता महसुस गरेका छन्। एक घन्टामै सबै काम सकेर उनी फर्किए। पोख्रेलले खुसी हुँदै भने, ‘हेर्दै बिजोग देखिने श्रम कार्यालय निकै फेरिएछ।’
सेवा दिन सहज : कार्यालय
सेवाग्राहीको अत्यधिक चापका कारण श्रम कार्यालय ताहाचलले बिहान ७ बजेदेखि सेवा दिँदै आएको थियो। पुनः श्रम स्वीकृतिको काम प्रदेशस्तर बाँडफाँट भएसँगै अहिले कार्यालय १० बजेदेखि मात्रै खुल्छ।
कार्यालयका प्रमुख देवेन्द्र कार्कीले भने, ‘धेरै चाप हुँदा सेवाग्राहीको सहजताका लागि ७ बजेदेखि सेवा दिँदा पनि भ्याइनभ्याई थियो। अहिले १० बजेदेखि ५ बजेसम्म पनि सजिलै सेवा उपलब्ध गराउन सकिएको छ।’
यसअघि दिनमा १५ सयदेखि २ हजारसम्म सेवाग्राहीहरुलाई सेवा दिँदै आएको कार्यालयमा दिनमा ५ सयदेखि ७ सयसम्म मात्र सेवाग्राही आउने गरेको कार्यालयले जानकारी दिएको छ। यसअघि सबै सेवाग्राहीले एकै दिनमा सेवा पाउन समस्या हुँदा दुई-तीन दिन श्रम स्वीकृतिका लागि धाउनुपर्ने बाध्यता थियो।
कार्यालय प्रमुख कार्की भन्छन्, ‘आउनेजति सेवाग्राही कोही पनि रित्तै फर्कनुपर्ने अवस्था छैन, अहिले कार्यालय र सेवाग्राही दुवैलाई सहज भएको छ।’
बिचौलियाले दु:ख दिन छाडे
सेवाग्राहीको निकै चाप हुने हुँदा बिचौलियाहरुको बिगबिगी थियो। अहिले श्रम कार्यालय ताहाचलमा यो अवस्था निकै घटेको छ।
ओखलढुंगाका विश्वकर्मा यसअघि पनि ताहाचल नआएका होइनन्। यसअघि कार्यालयमा पटकपटक धाउँदा खेपेको सास्ती उनी अहिले पनि सम्झन्छन्। उनी वैदेशिक रोजगारीका लागि साउदी जान थालेको १० वर्ष भइसकेको छ।
विश्वकर्माले भने, ‘लाइनमा बस्न नपाउँदै बिचौलियाहरु आउँथे र 'दिनभरि लाइनमा के बस्नुहुन्छ, दुई हजार दिनुस्- एक-डेढ घन्टामा काम मिलाइदिन्छु' भन्थे। आज त लाइन पनि छैन, बिचौलिया पनि देखिएनन्।’
धादिङका खेमबहादुर मगरसँग पनि विश्वकर्माको जस्तै अनुभव छ। उनी पाँच वर्षदेखि कतारमा रोजगारीका लागि जाने गरेका छन्। मगरले भने, ‘बिचौलियाहरु पनि भेटिएनन् यो पटक त। काम सक्न एक घन्टा पनि लागेन।’
कार्यालय प्रमुख कार्की सेवाग्राहीलाई कुनै पनि समस्या आउन नदिने हिसाबले आफूले काम गरिरहेको बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
