जनकपुर- प्रदेश २ का मुख्यमन्त्री लालबाबु राउतले प्रदेशभित्र रहेका बन्द उद्योगधन्दालाई चाँडै सञ्चालनमा ल्याउने तयारी प्रदेश सरकारले गरिरहेको बताएका छन्।
महोत्तरीको बर्दिबासमा आजदेखि सुरु भएको दोश्रो बर्दिबास महोत्सवकाे उद्घाटन गर्दै मुख्यमन्त्री राउतले स्वदेशी विदेशी तथा स्थानीय लगानीकर्तालाई ढुक्क भएर उद्योगधन्दामा लगानी गर्न आग्रह गरे। उनले भने, ‘यदि प्रदेश २ मा कुनै लगानीकर्ताले उद्योग सञ्चालन गर्न चाहेमा ३ घण्टाभित्र सबै प्रकृया सरकारले पुरा गर्ने वातावरण तयार गरेको छ।’
मुख्यमन्त्री राउतले चैत्र ४ गते प्रदेश सरकारले प्रदेश २ मा लगानी गर्ने उद्योगीलाई २० वर्षसम्म कुनै कर नलाग्ने निर्णयको विधेयक ल्याउनुको साथै प्रदेश भित्र रहेका सबै ऐलानी र गुठीका जग्गाहरु सरकारको स्वमित्वमा रहने र उद्योगका लागि लगानी गर्ने उद्योगीलाई प्रदेश सरकारले जग्गा 'लिज'मा उपलब्ध गराउने स्पष्ट पारे।
देश संघीय संरचनामा गइसकेको हुनाले बर्दिबास मै नापी कार्यालयका कागजपत्र उपलब्ध गराई बर्दिबासबासीलाई सहजरुपमा सेवा लिन सक्ने गरी प्रदेश सरकारले पहल गर्ने उनकाे भनाइ थियाे।
उनले प्रदेश २ का छोरीहरु जन्मिने बित्तिकै अब लाखपति भएर जन्मिँदै गरेको बताउँदै मुख्यमन्त्री राउतले महिला सशक्तीकरणका लागि प्रदेश २ मा माघदेखि जन्मिने छोरीका लागि १ लाख २५ हजार रुपैयाँको शिक्षा बीमाको नीति सुरु गरिएको जानकारी दिए।
उनले भौतिक पूर्वाधारको विकासले मात्र समग्र विकास सम्भव नरहेकाले सामाजिक रुपान्तरणका लागि ‘बेटी पढाउ बेटी बचाउ’ अभियान आवश्यक रहेको जिकिर गरे। प्रदेश २ मा महिला शिक्षाको स्तर सबैभन्दा कमजोर रहेकाले स्तर उकास्नका लागि छोरीले पढ्ने वातावरण राम्रो बनाउन साइकल वितरण अभियान समेत सुरु गरिसकेको बताए।
आयाेजक बर्दिबास उद्याेग वाणिज्य संघका अध्यक्ष प्रहलाद क्षेत्रीले एक करोड रुपैयाँ भन्दा बढीकाे कारोबार हुने लक्ष्य लिएर महोत्सव आयोजना गरेको जानकारी दिए। उनले महोत्सवबाट प्राप्त आम्दानी बर्दिबासस्थित रेडक्रसको ब्लड बैंकलाई सहयोग गर्ने उद्घोषसमेत गरे।
महोत्सवममा २ नम्बर प्रदेशको विविधता झलकाउने सांस्कृति प्रदर्शन, जातिगत विविधतासहितको धार्मिक तथा सांस्कृतिक गीत, नृत्य तथा अन्य मनोरन्जनात्मक कार्यक्रम प्रदर्शनको तयारी गरिएको छ।
एक लाख बढीले अवलोकन गर्ने अपेक्षा गरिएको महोत्सवमा ब्यापारिक एवम् सेवामूलक गरी २ सय बढी स्टल राखिएका छन्। शुक्रबारदेखि सुरु भएको महोत्सव चैत्र १८ गतेसम्म चल्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
