काठमाडाैं- त्रिभुवन अन्तर्राष्ट्रिय विमानस्थलमा कुनै सयम उडान सञ्चालन गर्ने १७ विदेशी एयरलाइन्स कम्पनीले विमानस्थल सेवा शूल्क वापतको रकम नतिरी सम्पर्क बाहिर भएका छन्। विमानस्थल कार्यालयका अनुसार उडान बन्द गर्ने १७ एयरलाइन्स कम्पनीको बक्यौता मात्रै ४ करोड ८४ लाख २६ हजार रुपैयाँभन्दा बढी छ।
उडान बन्द गर्ने गल्फ एयरलाइन्सले विमानस्थल कार्यालयलाई सबैभन्दा बढी बक्यौता तिरेको छैन। गल्फ एयरले विमानस्थल कार्यालयलाई २ करोड २२ लाख १३ हजार रुपैयाँ भन्दा बढी रकम तिर्न बाँकी छ।
यसैगरी दोस्रो बढी रकम नतिर्ने कम्पनीमा किङ्फिसर एयरलाइन्स रहेको छ। किङ्फिसरले विमानस्थल कार्यालयलाई १ करोड १५ लाख ९७ हजार रुपैयाँ भन्दा बढी तिर्न बाँकि रहेकाे विमानस्थल कार्यालयले जनाएकाे छ।
यसैगरी एयर सहारा जेट लाइटले ३४ लाख ७८ हजार, अस्ट्रिन एयरलाइन्सले ४३ हजार, बहराइन एयरलाइन्सले २४ लाख ६३ हजार, काेलाेस्सुस एयरले ५७ हजार, जिएमजी एयरलाइन्सले १ लाख ५९ हजार र हङकङ एक्सप्रेसले १९ लाख ६२ हजार रुपैयाँ भन्दा बढी रकम तिर्न बाँकी रहेको विमानस्थल कार्यालयका प्रमुख राजकुमार क्षेत्रीले जानकारी दिए।
लुफ्थान्सा एयरले १० लाख ६३ हजार, ओरेन्टल थाई एयरलाइन्सले ५ लाख ८९ हजार, पाकिस्तान एयरलाइन्सले २६ लाख ८४ हजार र रक एयरवेजले पनि १ लाख ८३ हजार रुपैयाँभन्दा बढी रकम नतिरेको देखिएकाे छ।
साथै सिंगापुर एयरलाइन्सले ५ लाख ५८ हजार, स्पाइस जेट एयरलाइन्सले १ लाख १५ हजार, तुई एयरलाइन्सले ९ लाख ५८ हजार र युनाइटेड एयरवेजको एडिएफले १ लाख १० हजार रुपैयाँ भन्दा बढी रकम नतिरेको विमानस्थल कार्यालयले जनाएको छ।
कानुनअनुसार कालो सूचीमा राख्न किन ढिलाइ?
'विमानस्थल सेवा शुल्क नियमावली, २०६७' ले सयमै विमानस्थल सेवा शूल्क नतिर्ने कम्पनीको उडान बन्द गराउँदै कालो सूचीमा राख्ने अधिकार दिएको छ। तर, विमाननस्थल कार्यालयले अहिलेसम्म बक्यौता नतिर्ने कम्पनीलाई कुनै कारबाही गर्न सकेको छैन। 'विमानस्थल सेवा शुल्क नियमावली, २०६७' को नियम ३० मा विमानस्थल कार्यालय प्रमुखले वायुयान कम्पनीले समयमै रकम दाखिला नगरेको अवस्थामा कारोबार रोक्कादेखि तत्काल उडान बन्द गराउन सक्ने उल्लेख छ।
नियमावलीको नियम ३० को १ मा नियमावली बमोजिम बुझाउनुपर्ने शुल्क समयमा नबुझाउने व्यक्ति वा संस्थालाई विमानस्थलबाट जारी भएको अनुमतिपत्र, सम्झौतापत्र वा अन्य कुनै कारोबार गर्न दिएको अनुमति विमानस्थल प्रमुखले स्थगन गरी विमानस्थलमा रहेको निजको सम्पत्ति रोक्का राखी निजको कामकारबाही वा व्यवसायमा रोक लगाउन सक्ने उल्लेख छ। साथै त्यसरी रोक लगाएको सूचना अविलम्ब प्रधान कार्यालयमा पठाउनुपर्ने हुन्छ।
नियम २ मा कुनै व्यक्ति वा निकायले बिल जारी भएको मितिले ६० दिनसम्म पनि विमानस्थलसँग सम्बन्धित शुल्क नबुझाएमा विमानस्थलको प्रमुखले त्यस्तो व्यक्ति वा संस्थालाई विमानस्थलमा व्यवसाय गर्न रोक लगाउँदै वायुसेवाको हकमा उडानमा तत्काल रोक सक्ने उल्लेख छ।
नियम ३० को ३ मा प्राधिकरणले यस नियमावली बमोजिम बुझाउनुपर्ने शुल्क नबुझाएमा वा प्राधिकरणसँग भएको सम्झौता उल्लंघन गर्ने व्यक्ति तथा संस्थाका सञ्चालकलाई भविष्यमा हवाई सेवा, विमानस्थल तथा प्राधिकरणसँग सम्बद्ध कुनै किसिमको कामकारबाही तथा व्यापार व्यवसायमा सहभागी हुन नपाउने गरी कालोसूचीमा राख्न सक्नेसमेत नियमावलीमा उल्लेख छ।
नियमावलीका ४ मा समयमा शुल्क नबुझाउने व्यक्ति वा संस्थाउपर समयमै नियम बमोजिमको कारबाही प्रक्रया सुरु नगर्ने विमानस्थल प्रमुखउपर विभागीय कारबाही गरिने पनि उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
