काठमाडौं– राष्ट्रियसभाको दिगो विकास तथा सुशासन समितिले संसद सचिवालयकाे अनुगमनका क्रममा भूइँतला पुराना सामानले भरिएको पाइएको छ।
समितिकी सभापति तारादेवी भट्टको नेतृत्वमा गरिएको अनुगमनमा यस्तो देखिएपछि उचित व्यवस्थापनका लागि निर्देशन दिइएकाे छ।
सचिवालय, पुरानाे संसद भवनको भुइँतला पुराना फर्निचर, मेच, टेबुल, दराज, सोफा, कम्प्युटर र फोटोकपी मेसिनहरु अव्यवस्थित रुपमा राखिएको पाइएको हो। समितिको बैठक बसेर ती सामाग्रीको उचित व्यवस्थापन गर्न निर्देशन दिएको छ।
पुराना तर प्रयोग गर्न मिल्ने सामाग्री सचिवालयले नै प्रयोग गर्ने, सचिवालयले प्रयोग गर्न नसक्ने तर काम लाग्ने सामाग्री अन्य सरकारी कार्यालय, सरकारी विद्यालय र सामाजिक संघसंस्थालाई हस्तान्तरण गर्ने र हस्तान्तरण गर्न नसकिने सामानहरु ३ महिनाभित्र लिलाम गर्न निर्देशन दिइएको छ।
पुरातात्विक तथा ऐतिहासिक महत्वको ग्यालरी बैठक भवनलाई यथाशिघ्र मर्मतसम्भार गर्न पनि निर्देशन दिइएको छ। भूकम्पबाट क्षति पुगेको भवनलाई रेट्रोफिटिङ गर्ने निर्णय यसअघि नै भएपनि कार्यान्वयनमा ढिलाई भएको भन्दै संरक्षणका लागि पहल गर्न निर्देशन दिइएको हो।
यसैगरी सचिवालयअन्तर्गतका सवारीसाधनको यकिन संख्या र प्रयोग गर्ने व्यक्तिको विवरण १५ दिनभित्र समितिलाई बुझाउन पनि भनिएको छ। संसद सचिवालयको कर्मचारीको विवरणसमेत मागेर सवारीसाधनको उपयोग वा दुरुपयोग भइरहेको विषयमा पनि स्पष्ट हुन चाहेको छ।
क्यान्टिनकाे भान्सामा विजाेग
धेरै सांसदहरुले नियमित खाजा खाने सचिवालयसँगै रहेको चमेना गृहको समेत अनुगमन गरिएको छ। अनुगमनका क्रममा कुहिएका गोलभेंडा, बन्दालगायतका तरकारी असरल्ल अवस्थामा भेटिएको छ। यसैगरी भान्सामा समेत फोहाेर रहेको पाइएकाे छ। यसलाई सुधार गर्न सांसदहरुले मौखिक निर्देशन दिएका छन्।
आज संसद सचिवालयकाे कार्यालय, सँगै रहेकाे चमेना गृह र पुरानाे संसद भवनमा अनुगमन गरिएकाे थियाे। आजबाट सुरु भएकाे याे अनुगमन संसदसँगै सिंहदरबार तथा अन्य सरकारी कार्यालयहरुमा पनि गरिने जनाइएकाे छ।
अनुगमनमा समिति सभापति तारादेवी भट्ट, सदस्यहरु दिनानाथ शर्मा, कालीबहादुर मल्ल, महेश महरा, प्रमिला कुमारी, भैरव सुन्दर श्रेष्ठ, चक्र स्नेही, कविता बाेगटी र समितिका सचिव मुरारी महतकाे सकभागीता थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
