राजविराज– सप्तरी सदरमुकाम राजविराजमा साढे २ महिनाअघि उद्घाटन गरिएको प्रदेश स्तरीय ‘माटो तथा मल परिक्षण प्रयोगशाला’ प्रयोगबिहीन भएको छ।
किसानलाई कृषि पेसामै आत्मनिर्भर बनाउने सरकारी नीतिअन्तर्गत गत पुष १३ गते प्रयोगशालाको उद्घाटन गरिएको थियो।
प्रदेश २ का ८ वटा जिल्लाका किसानलाई केन्द्रमार्फत् सेवा दिने लक्ष्य राखिएको छ। माटो तथा मल परीक्षण गर्ने र माटो अनुसारको कृषि बालीका लागि सिफारिस गर्ने उदेश्य राखिएको कार्यालयले जनाएको छ।
तर, बजेट, दरबन्दीअनुसारका कर्मचारी तथा उपकरण अभावका कारण प्रयोगशालाको काम हालसम्म पनि पूर्ण क्षमतामा सञ्चालन हुन सकेको छैन। भएका कर्मचारी समेत कार्यालय आउने, दिनभर बस्ने र साँझ परेपछि घर फर्कने मै सीमित भएका छन्।
माटो तथा मल परीक्षणका उपकरण नहुँदा प्रयोगशाला सञ्चालनमा आउन नसकेको कार्यालय प्रमुख तथा माटो विज्ञ सुनिलकुमार सिंहले जानकारी दिए।
‘कार्यालय उद्घाटन त भयो, तर अहिलेसम्म उपकरण आएका छैनन्,’ सिंहले भने, ‘कर्मचारी र बजेट अभावका कारण पनि उदेश्य अनुसारको काम हुन सकेको छैन।’
कार्यालय सञ्चालनसम्मको खर्च नहुँदा समस्या परिरहेको सिंहले गुनासो गरे। करिब ५० लाख मूल्य बराबरको उपकरण ल्याउन सके तत्कालका लागि प्रयोगशाला सञ्चालनमा ल्याउन सकिने सिंहको भनाइ छ।
स्थानीय तह र कृषि ज्ञान केन्द्रको असहयोग
सरकारले स्वायल किट बक्स वितरण तथा माटो शिविर सञ्चालनका लागि १७ लाख रुपैयाँको कार्यक्रम पठाए पनि हालसम्म काम अघि बढेको छैन।
५० थान किट बक्स वितरणका लागि ५ लाख र १२ वटा शिविर सञ्चालनका लागि १२ लाख रुपैयाँको कार्यक्रम आएको सिंहले बताए।
‘हामीले आठ वटै प्रदेशका स्थानीय तह र कृषि ज्ञान केन्द्रलाई पत्राचार गरेर शिविरका लागि वातावरण बनाइदिन भनेका छौं,’ सिंहले भने, ‘तर न त्यसको जवाफ आयो, न त कुनै कार्यक्रम गर्न सकियो।’
स्थानीय तहले माटो परीक्षण र कृषि पेसालाई महत्व नदिँदा केन्द्रको काम अघि बढ्न नसकेको उनको बुझाइ छ।
केन्द्रले साढे २ महिनाको अवधिमा एउटा मात्रै शिविर सञ्चालन गरेको छ। सप्तरीकै अग्निसाइर कृष्णासवरण गाउँपालिका–२, सितापुपरका ८७ जना किसानको माटो परीक्षण गरिएको कार्यालयले जनाएको छ।
बस पनि प्रयोगबिहीन
प्रयोगशालाको उच्च प्रविधियुक्त घुम्ति बससमेत प्रयोगबिहीन भएको छ। जिल्ला समन्वय समिति सप्तरी स्थित केन्द्रको कार्यालय अगाडि बस थन्क्याइएको छ।
कृषि, भूमि व्यवस्था तथा सहकारी मन्त्रालय अन्तर्गतको प्रधानमन्त्री कृषि आधुनिकिकरण परियोजनामार्फत् बस उपलब्ध भएको हो।
घुम्ति बसमा ३० देखि ४० किसिमका माटो परीक्षण गर्न सक्ने करिब १ करोड रुपैयाँ बराबरका उपकरण जडान गरिएको कार्यालय प्रमुख सिंहले जानकारी दिए।
आठ ओटा जिल्लाका विभिन्न स्थानीय तहमा पुगेर जमिनको माटो परीक्षण, माटोअनुसार मलको प्रयोग र कृषि बाली सिफारिस गर्ने उदेश्यले बस सञ्चालनमा ल्याइए पनि प्रयोगमा नआएको उनले बताए।
‘स्थानीय तह, कृषि ज्ञान केन्द्र र एनजिओहरूले शिविरका लागि वातावरण बनाइदिए हामी गएर काम गर्ने हो,’ सिंहले भने, ‘तर सोचअनुसार सहयोग पाएका छैनौं। हामी कहाँ भौतारिनु?'
यस्ताे छ कर्मचारीकाे विवरण:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
