काठमाडौं- राष्ट्रिय ध्वजाबाहक नेपाल वायुसेवा निगमको चिनियाँ वाई–१२ विमानले ४४ दिनपछि उडान सुरु गरेको छ।
निगमसँग रहेको ४ वटा वाई–१२ जहाज ३१ जनवरीबाट ग्राउन्डेड भएको थियो। निगमका कार्यकारी अध्यक्ष मदन खरेलकै मनपरीका कारण ग्राउन्डेड भएको जहाजले आज शुक्रबारबाट उडान थालेको हो।
४ वटा वाई–१२ जहाज मध्ये तीनवटा जहाज उडान योग्य भए पनि उडानका लागि पाइलट भने एक जना मात्रै रहेका छन्।
वाई–१२ जहाज उडानमा ४ जना पाइलट भए पनि सिनियर पाइलट सन्जय बादे विरामी बीदामा छन भने आङनुरी शेर्पाको पिपिसी नवीकरण हुन सकेको छैन। एकएक पाइलट उद्धव घिमिरे भने कही समय अगाडी मात्रै ए३२०को को–पाइलटमा बढुवा भइसकेका छन्।
४४ दिनपछि निगकको एउटा वाई–१२ जहाजले काठमाडौं–दाङ र दाङ–काठमाडौं उडन लागेको निगम स्रोतले जानकारी दियो।
तीन वटा जहाज भए पनि आजको लागि एउटा मात्रै उडान सेड्युल तय भएको छ।
एउटा वाई–१२ जहाज भने डेढ वर्षदेखि ग्राउन्डेड भएर बसेको छ। लामो सयमदेखि ग्राउन्डेड भएको जहाज भने तत्काल मर्मत हुने अवस्थामा पनि छैन।
निगमका कार्यकारी खरेलले वाई–१२ जहाज उडान गरिरहेका पाइलट उद्धव घिमिरेलाई ए–३२० जहाज उडानका लागि प्रशिक्षणमा पठाउने निर्णय गरेसँगै चारैवटा चिनियाँ जहाज वाई–१२ ग्राउन्डेड भएका थिए।
साथै मासिक १० लाख रुपैयाँभन्दा बढी तलब लिने आङनुरी शेर्पाको पनि पिपिसी नवीकरण हुन नसक्दा ३१ जनवरीबाट वाई–१२ जहाज ग्राउन्डेड भएको थियो।
वाई–१२ जहाज उडान सन्जय बादे, नेपेन्द्र भट्टराई, उद्धव घिमिरे र आङनुरी शेर्पाले गर्दै आएका थिए।
तर, खरेलले गरेको सो निर्णयमा निगमका सिनियर पाइलट बादे र भट्टराई सन्तुष्ट हुन सकेनन्। आफूहरुलाई ए–३२० को प्रशिक्षणमा नपठाएको भन्दै उनीहरू बिरामी बिदामा बसे। यसपछि सबै चिनियाँ जहाज ग्राउन्डेड हुन पुगे। तर, भट्टराईले फेब्रुअरी २५ मा उडानका लागि तयारी भएको सूचना दिँदा पनि निगम व्यवस्थापनले १६ दिनदेखि जहाज उडान गर्न दिएको छैन।
निगमले भट्टराईलाई २७ फेब्रुअरीमा काठमाडौं–दाङ, दाङ–काठमाडौं उडान गर्ने सेड्युलमा राखेको थियो। तर, उक्त दिन मौसम प्रतिकूलताका कारण जहाजले उडान भर्न सकेको थिएन। त्यसपछि भने निगम व्यवस्थापनले भट्टराईसँग मेडिकल रिपोर्ट मागेर जहाज उडानका रोक लगाउँदै आएको थियो।
यता २८ फेब्रुअरीमा बिरामी बिदामा बसेका पाइलट बादे पनि जहाज उडानका लागि निगम फर्केका थिए। तर, उनलाई पनि जहाज उडान गर्न दिइएन। फेरि केही दिनपछि उनी बिरामी बिदामा बसेको निगम स्रोतले बतायो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
