भैरहवा- भैरहवास्थित सिद्धार्थ रंगशालामा जारी नेपाल टेलिकम जिल्लास्तरीय सुपरलिग क्रिकेट प्रतियोगितामा शनिबार भएको खेलमा बुद्ध स्पोट्स् क्लब, भैरहवालाई १ सय ८७ रनको फराकिलो अन्तरले पराजित गर्दै बुटवल-११ क्रिकेट क्लब, बुटवल डिभिजन ‘ए’ मा उक्लिएको छ।
डिभिजन ‘बी’को आफ्नो अन्तिम खेलमा बुटवलले बुद्धमाथि सानदार जित निकालेको हो। यस्तै, आइतबार हुने भनिएको तिरुपति र गोलपार्कबीचको खेल भने स्वतः तिरुपतिको पोल्टामा गएको छ।
यसअघि विजयी गोलपार्क क्रिकेट क्लब र पराजित बुटवल युथ स्पोट्स् क्लबविरुद्ध संघको नियमविपरीत २ भन्दा बढी बाह्य जिल्लाका खेलाडी खेलाएको उजुरी परेपछि छानबिनका क्रममा दुबै टीम दोषी देखिएकाले तिरुपति स्वतः विजयी भएको हो। गोलपार्कविरुद्ध बुटवल युथ र बुटवल युथविरुद्ध गोलपार्कले क्रिकेट संघमा उजुरी गरेका थिए।
छानबिनपछि दुबै टिम दोषी पाइएकाले बाँकी खेलबाट वञ्चित हुनेगरी तिरुपतिलाई विजयी घोषणा गरिएको रुपन्देही क्रिकेट संघका अध्यक्ष प्रशान्तविक्रम मल्लले जानकारी दिए।
टस हारेर ब्याटिङको निम्तो पाएको बुटवल-११ ले निर्धारित ५० ओभरको खेलमा ९ विकेटको क्षतिमा २ सय ३७ रन बनायो। जसमा अमित श्रेष्ठले ७२, प्रकाश केसीले ६५ र तौसिफ आलमले ३० रनको योगदान गरे। बलिङमा बुद्धका रिजन पर्जुले ६ विकेट लिए। यस्तै, रुपेश कुर्मी, राहात हुसेन र प्रवेज आलमले समान १/१ विकेट हात पारे।
२ सय ३८ रनको लक्ष्यसहित मैदान प्रवे गरेको बुद्धको ब्याटिङ निकै फितलो रह्यो। १७ ओभर ५ बलमा सबै विकेट गुमाएर उसले जम्मा ५० रन मात्रै बनायो। जसमा जमाल अहम्मदले १६ रन बनाउनु बाहेक अन्य कुनै पनि ब्याट्सम्यानले दोहोरो अंकमा रन जोड्न सकेनन्। उसलाई सस्तैमा समेट्न बुटवल-११ का देवेन्द्र सोमरे र सुदन श्रेष्ठ नायक बने। उनीहरुले क्रमशः महत्वपूर्ण ५ र ४ विकेट हात पारे। यस्तै, विशाल भुसालले १ विकेट लिए।
देवेन्द्र खेलमा म्यान अफ द म्याचसमेत घोषित भएको आयोजक संस्था रुपन्देही क्रिकेट संघका अध्यक्ष मल्लले बताए।
प्रतियोगितामा विजेताले ७५ हजार र उपविजेताले ३५ हजार रुपैयाँ प्राप्त गर्नेछन्। यस्तै, म्यान अफ द सिरिजले १५, वेष्ट ब्याट्सम्यान र वेष्ट बलरले नगद ५/५ हजार तथा प्रत्येक दिनको म्यान अफ द म्याचले एक हजार रुपैयाँ प्राप्त गर्ने आयोजकले जनाएकाे छ।
लिग चैत ६ गतेसम्म चल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
