भैरहवा– नेपाल टेलिकम जिल्लास्तरीय सुपरलिग क्रिकेट प्रतियोगितामा शुक्रबार भएको डिभिजन ‘बि’अन्तर्गतको खेलमा दीप क्रिकेट क्लब, बुटवल ३३ रनले विजयी भएको छ।
भैरहवा स्थित सिद्धार्थ रंगशालामा भएको खेलमा लुम्बिनी कासाई क्रिकेट क्लब, लुम्बिनीलाई पराजित गर्दै दीप विजयी भएको हो।
टस जितेर पहिला ब्याटिङ गरेको दीपले निर्धारित ५० ओभरको खेलमा २५ ओभर ३ बलमा सबै विकेट गुमाइ ९४ रनको सामान्य योगफल बनाएको थियो।
उसका लागि स्विकोट दिवसले २५, सुवास विकले १६ र अजय अहम्मदले १२ रन बनाए। बलिङमा लुम्बिनी कासाईका प्रदीप जैसवाल र प्रदीप कुमारले समान ४/४ विकेट लिए।
प्रतिउत्तरमा ९५ रनको सामान्य लक्ष्य पछ्याएको लुम्बिनी कासाईले १६ ओभर ४ बलमा सबै विकेट गुमाई ६१ रनमै समेटियो।
उसका लागि सुनिल धवलले १८ र प्रदीप जैसवालले १५ रन बनाए पनि अन्य ब्याट्सम्यानले दोहोरो अंक बटुल्न नसक्दा सामान्य स्कोर समेत नभेट्टाई टिमले हार व्यहोर्यो। लुम्बिनी कासाईलाई सस्तैमा समेट्न दीपका शिवकुमार मौर्यले ४, अजय अहम्मदले ३, सुगम हमालले २ तथा अर्जुन गिरीले १ विकेट लिए।
खेलमा दीपका शिवकुमार मौर्य म्यान अफ द म्याच घोषित भएको आयोजक संस्था रुपन्देही क्रिकेट संघका अध्यक्ष प्रशान्त विक्रम मल्लले बताए।
शुक्रबारको खेलसँगै डिभिजन ‘बि’ अन्तर्गत पहिलो चरणको खेल समीकरण सकिएको छ। शनिबारबाट डिभिजन ‘बि’अन्तर्गत दोस्रो चरणको खेल सुरु हुनेछ। शनिबार बुद्ध स्पोट्र्स क्लब, भैरहवा र बुटवल ११ क्रिकेट क्लब, बुटवलबीच प्रतिस्पर्धा हुनेछ।
दोस्रो चरणअन्तर्गत विजयी टिम डिभिजन ‘ए’मा उक्लिने अध्यक्ष मल्लले बताए। प्रतियोगितामा विजेताले ७५ हजार र उपविजेताले ३५ हजार रुपैयाँ प्राप्त गर्नेछन्। यस्तै, म्यान अफ द सिरिजले १५, वेष्ट ब्याट्सम्यान र बेष्ट बलरले नगद ५/५ हजार तथा प्रत्येक दिनको म्यान अफ द म्याचले एक हजार रुपैयाँ प्राप्त गर्ने आयोजकले जनाएका छन्।
प्रतियोगितालाई नेपाल टेलिकमले मुख्य प्रायोजन गरेको छ भने विके ज्वेलर्स, सगरमाथा इन्स्योरेन्स, सुगम आवास र ह्याप्पी आवर ग्यामिङ क्लब भैरहवाले सहप्रायोजन गरेका छन्। यस्तै, प्रत्येक दिनको म्यान अफ द म्याचलाई रोटरी क्लब अफ लुम्बिनी सिद्धार्थनगरले प्रायोजन गरेको ।
लिग चैत ६ गतेसम्म चल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772261485.png)
-1764146706.png)
