काठमाडौं- एक सय ४ वर्षको जहानियाँ राणाशासन अन्त्य भई देशमा प्रजातन्त्र बहाली भएको दिन २००७ फागुन ७ को स्मरणमा आज ६९औँ प्रजातन्त्र दिवस देशभर विविध कार्यक्रम गरी मनाइँदैछ।
जनक्रान्तिका माध्यमबाट राणाशासन अन्त्य गरी देशमा प्रजातन्त्र घोषणा भएको यस दिनको गौरवलाई सम्मान गर्दै सरकारले फागुन ७ गते औपचारिक समारोहका साथ दिवस मनाउँदै आएको छ। प्रजातन्त्रकै जगमा लोकतन्त्र हुँदै अहिले हामीले सङ्घीय लोकतान्त्रिक गणतन्त्रात्मक नेपाल पाएका छौँ।
यस वर्ष पनि दिवस ३ दिनसम्म विविध कार्यक्रम गरी मनाइँदैछ। प्रजातन्त्र दिवस मूल समारोह समितिले मङ्गलबार ८ बजे सैनिक मञ्च टुँडिखेलमा औपचारिक समारोहको आयोजना गर्दैछ। समारोहमा राष्ट्रपति, उपराष्ट्रपति, प्रधानमन्त्री, प्रधानन्यायाधीश, सभामुख, उपसभामुखलगायतको उपस्थिति रहनेछ।
साे क्रममा सेनाद्वारा ताेप तथा बन्दुककाे बडाइँ (स्याल्भाे र भली फायर) गर्नुका साथै ६९औं प्रजातन्त दिवस अंकित ब्यानरले सुसिज्जत नेपाली सेनाकाे हेलिकाेप्टरबाट पुष्पवृष्टि र बेलुन उडाइने छ। ज्ञात-अज्ञात सहिदहरुप्रति श्रद्धाञ्जली अर्पण गरिने साे कार्यक्रममा नेपाली सेनाका जवानहरुले शान्तिकाे प्रतिककाे रुपमा परेवासमेत उडाउनेछन्।
साेही विशेष समाराेहमा प्रधानमन्त्री केपी शर्मा ओलीले प्रजातन्त्र दिवशका अवसरमा शुभकामना सन्देश दिने कार्यतालिका रहेकाे गृह मन्त्रालयले जनाएकाे छ।
प्रजातन्त्र दिवस मनाउन प्रधानमन्त्री केपी शर्मा ओलीको अध्यक्षतामा मूल समारोह समिति र सञ्चार तथा सूचना प्रविधिमन्त्री गोकुलप्रसाद बाँस्कोटाको संयोजकत्वमा प्रचारप्रसार उपसमिति गठन भएको छ। दिवसकै अवसरमा सञ्चार मन्त्रालयले देशभर सञ्चालनमा रहेका सरकारी तथा निजी छापा माध्यम, एफएम रेडियो, टेलिभिजनलगायत अन्य सञ्चारमाध्यमलाई प्रजातन्त्र दिवसको विषयलाई उच्च प्राथमिकता दिई समाचार प्रसारण, बुलेटिन, परिसंवाद, अन्तरक्रिया आदि कार्यक्रम सञ्चालन गर्न आह्वान गरेको छ।
प्रजातन्त्र दिवस मनाउने सम्बन्धमा गठित प्रचारप्रसार उपसमितिको सञ्चार मन्त्रालयका सचिव महेन्द्रमान गुरुङको अध्यक्षतामा आइतबार बसेको बैठकले नेपाल टेलिभिजन र रेडियो नेपालबाट फागुन ७ गते सैनिक मञ्च, टुँडिखेलमा आयोजना हुने कार्यक्रमको प्रत्यक्ष प्रसारण गर्ने र अन्य टेलिभिजनले त्यसलाई लिनसक्ने व्यवस्था मिलाउन निर्णय गरेको थियो। साेही अवसरमा देशभरका अन्य सञ्चार माध्यम तथा छापालाई पनि प्रजातन्त्र दिवस सम्बन्धी सामाग्री प्रशारण प्रकाशन गर्न अनुराेध गरिएकाे थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
