काठमाडौं- विशेष अदालतले जिल्ला अदालत काठमाडौका नायव सुब्बा भोलानाथ चालिसेलाई घुससहित पक्राउ परेको रकम बराबर नै धरौटी माग गरेको छ।
सवारी ज्यान मुद्दा मिलाइदिने भन्दै निजामती कर्मचारी संगठनका काठमाडौं उपाध्यक्ष चालिसे जिल्ला अदालत परिसरबाटै ५ लाख सहित पक्राउ परेका थिए।
बुधबार अख्तियार दुरुपयोग अनुसन्धान आयोगले चालिसेमाथि भ्रष्टाचार मुद्दा दायर गरेको थियो। विहिबार उनको मुद्दामा थुनछेक आदेश गर्दै घुस रकम बराबर नै धरौटी माग गरेको हो। आजै न्याय परिषद्ले उक्त प्रकरणमा जोडिएका जिल्ला न्यायाधीश बाबुकाजी बानियाँमाथि छानबिन गर्न समिति गठन गरेको छ।
५ लाख घुस प्रकरणमा जिल्ला न्यायाधीश बानियाँमाथि छानबिन गर्न सर्वोच्चका न्यायाधीश हरिकृष्ण कार्कीको नेतृत्वमा समिति गठन भएको थियो।
उक्त बयानपछि न्याय परिषदले बानियाँलाई माघ २५ गते छानबिनका लागि काज सरुवा गरेको थियो।
माघ १७ गते अख्तियार दुरुपयोग अनुसन्धान आयोगले नायब सुब्बा भोलानाथ चालिसेलाइ पक्राउ गरेको थियो।
उनी नेपाल निजामती संगठनका काठमाडौं शाखाका उपाध्यक्ष हुन्।
कर्मचारीकै नेताले मुद्दा मिलाउने भनेर घुस मागेको जानकारी पाएपछि अख्तियारको टोलीले 'स्ट्रिङ अप्रेसन' गरेको थियो।
सवारी ज्यान मुद्दा मिलाइदिने भन्दै सेवाग्राहीसँग घूस मागेको भन्ने सूचनाका आधारमा चालिसेलाई अदालत परिषरबाट नियन्त्रणमा लिएको थियो।
अख्तियारमा बयानका क्रममा चालिसेले न्यायाधीश बानियाको आग्रहमा आफूले सो रकम लिएको बताएका थिए।
घूस प्रकरणको सूचना पाएपछि प्रधानन्यायाधीश चोलेन्द्र शमशेर राणाले चासो लिएर प्रमाण जुटाउन निर्देशन दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
