बोक्सी आरोपमा निर्घात कुटपिट गरी जिउँदै जलाउने प्रयास

अजय शाह | २०७५ माघ २६ शनिबार | Saturday, February 09, 2019 १२:२७:०० मा प्रकाशित

जनकपुर- सिरहामा एक महिलामाथि बोक्सीको आरोपमा निर्घात कुटपिट गर्नुको साथै जिउँदै जलाउने प्रयास गरिएको घटना सार्वजनिक भएको छ। 

नरहा गाउँपालिका–३ चन्द्र अयोध्यापुर खोरिया टोलकी ४५ वर्षीया बौवावती महतोमाथि बोक्सी आरोपमा निर्घात कुटपिट भएको खुलासा भएको हो। छिमेकी युवकलाई बोक्सी मन्त्र र टुनामुना गरी बिरामी बनाएको भन्दै उनी कुटिएकी हुन्। 

घरमा गाईबस्तुलाई घाँसपानी गरिरहेका बेला बिहीबार अपराह्न हुल बाँधर आएका छिमेकीले लछारपछार गर्दै कुटपिट गरेको पीडित बौवावतीले बताइन्। कुटपिटबाट उनको शरीरका विभिन्न ठाउँमा निलडाम पर्नुका साथै चोटपटक लागेको छ। 

घटनाबारे जानकारी पाएर पनि इलाका प्रहरी कार्यालय मिर्चैयाले दोषीलाई पक्राउ गरेको छैन। लिखित जाहेरी नआएको कार्यालको जिकिर छ।

स्थानीय अमिरी सदायका १९ वर्षीय छोरा सुजितकुमार सदायलाई भूतप्रेत लगाएको आरोप लगाउँदै सुजितकी आमा, दिदीबहिनी लगायतले लछारपछार पार्दै चौतारामा पुर्‍याई कुटपिट गरेको बौवावतीले सुनाइन्।

‘घरबाट घिसार्दै चौतारोमा पुर्‍याएर बोक्सी हुँ भन्न दबाब दिए,’ उनले भनिन्, ‘बोक्सी नस्विकारे नजिकै रहेको उखुबारीबाट पत्कर ल्याएर जिउँदै जलाउँछौँ भन्दै कुटपिट गरे।’

कुटपिटबाट अचेत भएपछि बौवावतीलाई छाडिएको थियो।

‘म बोक्सी होइन, भन्दै हात जोडेर बिलौना गर्दा पनि कसैले सुनेनन्,’ उनले आँसु झार्दै भनिन्, ‘उखुको लाथ्राले निरन्तर कुटिइरहे।’

बौवावतीका पति रामलोचन महतो काम गर्न गाउँबाहिर गएका बेला उक्त घटना भएको हो।

‘घरमा पाँच जना स–साना छोराछोरी मात्र थिए। म पनि काम गर्न गाउँबाहिर रहेको मौका छोपेर मरणासन्न हुने गरी कुटेछन्,’ रामलोचनाले भने।

बेलाबेला बेहोस हुने र काम्ने सुजितलाई बौवावतीले नै टुनामुना गरेको भन्दै धामी सुकना मण्डलले सदाय परिवारलाई उक्साएको स्थानीय गाउँलेले बताए।