काठमाडौं- प्रधानमन्त्री केपी शर्मा ओलीले भेनेजुएला प्रकरणमा विज्ञप्ति जारी गर्दा नेपाल कम्युनिस्ट पार्टी (नेकपा) का अर्का अध्यक्ष पुष्पकमल दाहाल ‘प्रचण्ड’ चिप्लिएको बताएका छन्।
नेपाल टेलिभिजनबाट प्रसारण हुने कार्यक्रम ‘जनतासँग प्रधानमन्त्री’मा बोल्दै प्रधानमन्त्री ओलीले भेनेजुएला प्रकरणमा प्रचण्ड चिप्लिएको बताएका हुन्। यसअघि गत माघ ११ गते नेकपाका प्रचण्डले भेनेजुएलाको राजनीतिक परिवर्तनमा अमेरिकाले हस्तक्षेप गरेको भन्दै अमेरिकाकी साम्राज्यवादी प्रवृत्तिको कडा शब्दमा विरोध गरेका थिए। उनको विज्ञप्तिपछि कूटनीतिक क्षेत्रका विज्ञहरूले नेपालले अनावश्यक ठाउँमा र विषयमा प्रतिक्रिया दिएको बताउँदै आएका छन्।
प्रधानमन्त्री ओलीले आफू नेपालमा नभएको अवस्थामा पार्टीका तर्फबाट यस्तो वक्तव्य आएको बताउँदै आफू नेपालमा भएको भए यस्तो नहुने दाबी गरे। प्रधानमन्त्री ओलीले प्रचण्ड चिप्लिएको बताए पनि नेपाल सरकार र नेकपा सचिवालयको तर्फबाट प्रकाशित छुट्टाछुटै वक्तव्यमा प्रचण्डकै वक्तव्यलाई मान्यता दिँदै तर भद्र भाषामा भेनेजुएलाको राजनीतिक परिवर्तनमा अमेरिकाले हस्तक्षेपको विरोध गरिएको छ।
प्रधानमन्त्री ओलीले नेकपाका अध्यक्ष प्रचण्ड बहकिएको बताए पनि गत मे महिनामा भएको भेनेजुएलाको राष्ट्रपति निर्वाचनमा निकालोस मडुरो निर्वाचित भएपछि नेपालले मडुरोलाई बधाई सन्देश पठाएको थियो।
राष्ट्रपतिय निर्वाचनमा धाँधली भएको भन्दै भेनेजुएलाका विपक्षी दल, अमेरिका र समर्थित देशले निर्वाचनको विरोध गरेका थिए।
नेपालले भने राष्ट्रपति विद्यादेवी भण्डारीको नाममा मडुरो भेनेजुएलाको राष्ट्रपतिमा पुनःनिर्वाचित भएकोमा बधाई सन्देश पठाएको थियो।
नेकपाका युवा नेता युवराज चौलागाई नेपालले समर्थन गरेको राष्ट्रपतिलाई हस्तक्षेप गरी बहिर्गमन गर्ने प्रक्रियाको नेपालले विरोध गर्नु स्वाभाविक प्रक्रिया भएको बताउँछन्।
भेनेजुएला प्रकरणमा यदि पार्टी अध्यक्ष प्रचण्ड चिप्लिएकै हो भने त्यसको सुरुवातमा राष्ट्रपतिको बधाई सन्देशबाटै सुरु भएको प्रचण्ड निकट व्यक्तिहरूको बुझाइ छ।
अन्तर्राष्ट्रिय कानुनका अनुसार पनि कुनै पनि स्वतन्त्र राष्ट्रले अर्को स्वतन्त्र राष्ट्रको निर्वाचनका माध्यमबाट आएको सरकारलाई स्वीकार गरिसकेको अवस्थामा सोही सरकारलाई वैधानिक मार्नुपर्ने व्यवस्था भएको जिकिर पूर्वमाओवादीका केही नेताको छ। यदि गल्ती भएकै हो भने नेपालले अमेरिका लगायत देशले धाँधलीपूर्ण भएको भन्दै विरोध गरेको निर्वाचनका माध्यमबाट निर्वाचित भेनेजुएलाका राष्ट्रपतिलाई मडुरोलाई स्वीकार गर्नु नै नेपालको गल्ती भएको उनीहरू दाबी गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
