काठमाडौं– नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले भेनेजुएला संकटबारेमा पार्टी सचिवालय बैठक बसेरै हस्तक्षेपको विरोधमा वक्तव्य जारी गरिएको बताएका छन्।
आज भरतपुर विमानस्थालमा पत्रकारहरुसँग बोल्दै अध्यक्ष प्रचण्डले भने, ‘भेनेजुयला संकटबारे पार्टी सचिवालयको बैठकपछि नै वक्तव्य आएको हो। अब अरु कुराले केही अर्थ राख्दैन।’
प्रचण्डले पार्टी सचिवालय र परराष्ट्र मन्त्रालयको आसयसमेत आफ्नो विज्ञप्तिसँग मेल खाएकाले कसले के भन्छ भन्ने कुराको कुनै अर्थ नरहने जिकिर गरे।
पछिल्लो समय सरकार र नेकपा कुटनीतिक मामिलामा चुकेको हो? भन्ने पत्रकारको प्रश्नमा अध्यक्ष प्रचण्डले हाल केही समस्या भएपनि सम्बन्ध भने यथाअवस्थामै रहेको दाबी गरे।
यसअघि बुधबार बेलुका मात्रै नेपाल टेलिभिजनबाट प्रशारण भएको ‘जनतासँग प्रधानमन्त्री’ कार्यक्रममा प्रधानमन्त्री केपी शर्मा ओलीले 'केही शब्दमा प्रचण्ड चिप्लिएको' अभिव्यक्ति दिएका थिए।
फरक प्रसंगमा प्रचण्डले पार्टीको एकतामा ढिलाइ भएको स्वीकार्दै आजै एकता कार्यदलले प्रतिवेदन बुझाउने खुलाए। उनले छिट्टै नै एकता प्रकृयालाई टुंग्याएर फागुन र चैतभरमा पार्टी एकजुट अभियान पुरा गर्ने दाबी गरे।
उनले सरकारले विकासको गति पक्डिएको दाबीसमेत गरे। ‘सरकारको तर्फबाट दिनप्रतिदिन जनताको पक्षमा कार्यक्रमहरु घोषणा भएका छन्। विकास निर्माणका काममा गति पक्रिन थालेको छ’, उनले भने।
उनले शान्ति प्रकृयाका बाँकी काम सक्नका लागि पनि कुनै समस्या नरहेको स्पष्ट पारे। ‘नेपालमा शान्ति प्रक्रियाको बाँकी कामलाई अगाडि बढाउन कुनै समस्या नै छैन। सबै राजनीतिक दलहरु बीचमा सहमति नै छ। ऐन संशोधनका निम्ती सबैसँग कुरा भएको छ।’, उनले भने, ‘शान्ति प्रक्रियासँग सम्बन्धित विषयमा सत्ता पक्ष र प्रतिपक्षबीच एकै धारणा छ।’
उनले नेपालको शान्ति प्रक्रियाको बारेमा विभिन्न राजदूतहरुको वक्तव्य नेपालको आन्तरिक मामिलामा अनावश्यक चासोको अभिव्यक्ति भएको टिप्पणी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
