काठमाडौं– गृहमन्त्री रामबहादुर थापा बादलले निर्मला पन्त प्रकरणमा अनुसन्धान जारी रहेको बताएका छन्। बुधबार संसदमा उठेको प्रश्नको जवाफ दिँदै उनले अनुसन्धानमा सरकारको गम्भी भएको बताए।
'निर्मला पन्तको हत्यारालाई पक्राउ गरी किन मुद्दा चलाइएको छैन?' भन्दै कांग्रेस सांसद डिला संग्रौलाले सोधेको प्रश्नको जवाफ दिँदै गृहमन्त्री थापाले निर्मला हत्या प्रकरण जघन्य अपराध भएको बताए।
'अनुसन्धानमा लागेका प्रहरीलाई लापरबाहीका निम्ति कारबाही गरिसकिएको छ', उनले भने, अपराधसँग सम्बन्धित व्यक्तिलाई राज्यले छुट दिन सक्दैन। कानुनको दायरामा ल्याउँछ।'
उनले अनुसन्धान कार्यलाई तीव्र गतिमा अगाडि बढाइएको दाबी पनि गरे।
संग्रौलाकै पुरक प्रश्नको जवाफ दिँदै गृहमन्त्रीले सरकारले महिलासँग सम्बन्धित अपराधीहरुमध्ये ९६ प्रतिशत अपराधीलाई कानुनको कठघारमा ल्याएको जानकारी दिए।
'निर्मला पन्त प्रकरणले पनि समय लिएको छ', उनले भने, 'अपराधीलाई पनि कानुनको कठघरामा ल्याउन प्रयत्नशील छ।'
संग्रौलाको अपराधी सिंहदरबार र बालुवाटारमै रहेको भन्ने आशयको प्रश्नमाथि जवाफ दिँदै थापाले भने, 'अपराधी जहाँ भए पनि सरकारले कानुनको कठघरामा ल्याउँछ।'
कांग्रेस सांसद गगन थापाले रक्षामन्त्री ईश्वर पोखरेलले अपराधी ५ दिनभित्र सार्वजनिक हुन्छ भनेर बताएका र सो विषयमा जानकारी भएको वा नभएको भन्दै गृहमन्त्रीलाई पुरक प्रश्न सोधेका थिए।
'रक्षामन्त्रीले सार्वजनिक रुपमा भनेको ठोस कुरा मलाई जानकारी छैन', गृहमन्त्री थापाले जवाफ दिए, 'उहाँले त्यसो भन्नुभएको हो भने छिटै कारबाहीमा ल्याउने स्पिरिटमा भन्नुभएको होला भन्ने मलाई लाग्छ।'
पोखरेलको धारणा सरकार र गृह मन्त्रालयको आधिकारिक धारणा नभएको उनले प्रस्ट्याए।
राप्रपा नेपालका सांसद राजेन्द्र लिङ्देनले रक्षामन्त्रीले मात्रै होइन, गृहमन्त्रीले संसदमा नै हत्यारा पत्ता लागिसकेको बताएको प्रसंग उठाएका थिए। 'शंकास्पद व्यक्तिलाई पक्रिँदैमा हत्यारा पत्ता लागिसकेको भनियो', उनले भने, 'कच्चा सूचना राज्यको तर्फबाट आयो।'
'गृह मन्त्रालयलाई प्राप्त सूचना अवगत गराएको थिएँ', गृहमन्त्रीले जवाफमा भने, 'दुई जनालाई पक्राउ गरिएको र उनीहरुले साबिती बयान दिएका थिए।'
नेकपा सांसद महेश बस्नेतले भने निर्मला पन्तको विषय मानवअधिकारवादी र मिडियाका लागि गरिखाने भाँडो भएको बताए। 'प्रतिपक्षीका लागि राजनीति गर्ने विषय भयो', उनले भने।
'तत्कालीन एसपी विष्टलाई बर्खास्त गरेर अनुसन्धानको प्रक्रिया अगाडि बढाएको छ', बस्नेतले भने, 'अनुसन्धानको दायरा विष्टलाई एसपी बनाएर त्यहाँ राखिराख्ने तत्कालीन नेतृत्वका साथीहरु कोको हुन्, उतातिर पनि केन्द्रित हुन पनि अनुरोध गर्छु।'
मन्त्री थापाले आफूहरु त्यही दिशामा नै अगाडि बढिरहेको जवाफ दिएका थिए। विष्टसँग सम्बन्धित विषयमा सरकार अवगत र गम्भीर भएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
