हालै सम्पन्न एनआरएनको आठौं सम्मेलनमा निकै गर्मागर्मी चल्यो । यो सामाजिक संस्था भए पनि पछिल्लो सम्मेलनले राजनीतिक माहौल पनि तताएको धेरैले महसुस गरे । चुनावी माहौल हेर्दा सम्मेलनमा वामपन्थीभन्दा कांग्रेसीहरुको चलखेल हेर्न लायक देखिन्थ्यो ।
उम्मेदवारहरु राजनीतिक दलका नेताहरु घरदैलोमा पुगेको राम्रैसँग देखिएको थियो । सम्मेलन स्थलमा पनि फलानो उम्मेदवारलाई यो पार्टी वा त्यो पार्टीको समर्थन आयो रे भन्ने चर्चा चलिरह्यो।
केही गर्नुपर्छ भन्ने इच्छाशक्ति भएका भवन भट्टको नेतृत्वमा नयाँ कार्यसमिति आएसँगै एनआरएनबाट धेरै अपेक्षा गरिएको छ । यसैले नेतृत्वसामु चुनौतीको पहाड छ । आजसम्म जे-जति सम्भावना र सपनाहरु देखाइएको छ, एनआरएनको नयाँ नेतृत्वले तिनको कार्यान्वयन गर्नु मुख्य चुनौती हो।
हामीले जुन तामझामका साथ काठमाडौंमा सम्मेलन गर्यौं , त्यही अनुसार काम गरेर देखाउनुपर्ने आवश्यकता छ । अन्यथा नेपालमा बस्ने हाम्रा दाजुभाइ–दिदीबहिनीले यिनीहरु यहाँ आएर अनावश्यक हल्ला मात्र गर्ने हुन् भन्ने दृष्टिकोण बदल्न सकिँदैन । यसका लागि एनआरएनले गर्नुपर्ने महत्वपूर्ण काम नेपालमा रोजगारी सिर्जना गर्नु नै हो । साथै, सम्मेलन गर्दा हामीले पारदर्शी हुन पनि जरुरी छ । सरकारले एनआरएनलाई सम्मेलन गर्न सहयोग गर्छ वा गरेको छ भने अब विधान नै संशोधन गरी डेलिगेट्स दर्ताबाट नै सम्मेलन खर्च उठाउनु जरुरी छ । यति गरेमा गैरआवासीय नेपालीहरुले गर्वसाथ म एनआरएन हुँ भन्न सक्ने वातावरण बन्नेछ।
आजसम्म जे-जति सम्भावना र सपनाहरु देखाइएको छ, एनआरएनको नयाँ नेतृत्वले तिनको कार्यान्वयन गर्नु मुख्य चुनौती हो।
आठौं सम्मेलनको अनुभवबाट सिकेर अबको सम्मेलनलाई भद्रगोल र अव्यवस्थित हुन नदिन पनि नेतृत्वले सोच्नु जरुरी छ । यसको उपाय भनेको डेलिगेट्स आउने प्रक्रिया नै परिवर्तन गर्नुपर्ने देखिन्छ । सुरुवातमा संस्था सानो र धेरै देशमा फैलिनसकेकाले एउटै देशबाट धेरै डेलिगेट्स आउँदा फरक पर्दैनथ्यो । तर, अहिले एनआरएन ८८ देशमा फैलिसकेकाले अब डेलिगेट्स आउँदा सम्बन्धित देशबाट जम्मा सदस्यबाट सीधै चुनाव गरी छाँटेर आउनु जरुरी छ । यति गर्न सकियो भने आगामी सम्मेलन न अव्यवस्थित हुनेछ, न त उम्मेदवारको चुनाव खर्च नै धेरै हुनेछ । यदि हामीले ५०० बराबर १ डेलिगेट्स गर्यौं भने सम्मेलन सभ्य र भव्य हुनेछ।
विदेशमा हुँदा हामी नेपालका नेताले चुनावमा भोट किन्छन्, रक्सी-मासुको खोला बगाउँछन् भनेर गाली गर्दै बस्छौं । हामी पनि नेपाल आएर त्यही गर्ने हो भने उनीहरु र हामीमा के नै फरक भयो र ? भीडभाड र चर्को हल्लाखल्लाले हाम्रो सभ्यताको कस्तो परिचय दियो?
यो पटक सबै संस्थापन एकै ठाउँमा उभिएर प्यानल नै जितेको अवस्थामा यो संस्थालाई कस्तो बनाउने भनेर स्पष्ट कार्यदिशा दिनु पनि नयाँ नेतृत्वको चुनौती हुनेछ । अध्यक्ष र उपाध्यक्षमा अत्यधिक मतको अन्तरले जितेसँगै संस्थाले सबैलाई समेट्नु पनि जरुरी छ । नेपाली राजनीति जस्तै एनआरएनलाई गुट-उपगुटमा फस्न नदिनु पनि ठूलो चुनौती हुनेछ । आठौं सम्मेलनले एनआरएन अभियानलाई अलिकति जातीयताको रङ दिएको पाटोलाई नजरअन्दाज नगरी अगाडि बढ्न पनि नेतृत्वले चनाखो हुनुपर्छ।
नवनिर्वाचित अध्यक्षसँग केही संगत गर्ने मौका पाएकाले केही गर्नुपर्छ भन्ने उहाँको भावनालाई यो पंक्तिकारले नजिकबाट बुझ्न पाएको छ । उक्त भावनालाई सम्पूर्ण कार्यसमितिले साथ दिएमा यसले धेरै काम गर्न सक्नेछ।
एनआरएनमा सुनिँदै आएको पूर्व अध्यक्षज्यूहरुको हस्तक्षेप यदि साँच्चै हो भने त्यसलाई रोक्नु नयाँ अध्यक्षको अर्को चुनौती हो । अध्यक्षज्यू जुन जोश-जाँगरका साथ यो अभियानमा हुनुहुन्छ, त्यसलाई कायम राख्न उहाँले धेरै बोल्ड निर्णय गर्नुपर्ने देखिन्छ।
यो एउटा अभियान हो । विगतमा कार्यसमितिमा सँगै काम गरेका साथीहरुको अनुभव र सहकार्यलाई निरन्तरता दिँदै अगाडि बढेमा यो अभियान सफल हुनेछ । दुई वर्षको अवधिलाई यो कार्यसमितिले सफल या असफल बनाउने कुरा उहाँहरुले गर्ने सही या गलत निर्णयले यकिन गर्नेछ।
पक्कै पनि अध्यक्षज्यूले भनेजस्तो एनआरएन स्थापनको १४ वर्षमा नयाँ कार्यदिशा प्रदान गर्ने बेला आएको छ । सबैलाई समेट्दै राम्रो र हामी सबैको एनआरएन बनाउनुहुनु हामी सबै एनआरएनको तर्फबाट यो नयाँ कार्यसमितिलाई शुभकामना दिन्छु । आगामी अधिवेशनमा हामी सबैले गर्व गरेर भन्न सकौं- सबैको हात, एकैसाथ।
(गिरी नेपाली जनसम्पर्क समिति जापानका प्रवक्ता हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791965585.png)
-1791964075.png)
-1786602170.png)
