काठमाडौं– सरकारले नेपालस्थित विदेशी नियोगका प्रतिनिधिसँगको भेटवार्ताका क्रममा शान्ति प्रक्रियाका बाँकी काम पूरा गर्न नेपाल आफै सक्षम रहेको जनाएको छ। परराष्ट्रमन्त्री प्रदीप ज्ञवालीले प्रधानमन्त्री केपी शर्मा ओलीको उपस्थितिमा नेपालमा रहेका कूटनीतिक नियोगका प्रतिनिधिसँग भेटवार्ता गरेका हुन्।
भेटवार्तामा परराष्ट्रमन्त्री ज्ञवालीले नेपालले आफ्नै मौलिकताको आधारमा नेपालको शान्ति प्रक्रियाका बाँकी कामलाई पूर्णता दिने स्पष्ट पारेका हुन्। गत बिहीबार नेपालस्थित पश्चिमा देशका राजदूतावास र संयुक्त राष्ट्रसंघलगायतले नेपालको शान्ति प्रक्रियाका बाँकी कामका विषयमा सरकारको ध्यानाकर्षण गराएका थिए। संयुक्त विज्ञप्तिमा उनीहरुले नेपालको द्वन्द्वकालीन न्यायलाई टुङ्गोमा पुर्याउने विषयमा नेपाल सरकारको कार्ययोजनाका विषयमा चासो प्रकट गरेका थिए।
सरकारले आयोजना गरेको कूटनीतिक नियोगका प्रतिनिधिसँगको भेटवार्तामा नेपालस्थित अमेरिकी राजदूत र्याडी बेरी भने उपस्थित भएनन्। नेपाल लाइभसँग कुराकानी गर्दै भेटवार्तामा उपस्थित एक उच्च स्रोतले बेरी अनुपस्थितरहेको प्रष्टाएका हुन्। भेटघाटमा अमेरिकी राजदूतावासका उप–प्रमुख माइक गोन्जालोज उपस्थित भएको स्रोतले जानकारी दियो।
गत शुक्रबार मात्रै नेपाल कम्युनिष्ट पार्टी (नेकपा)का अध्यक्ष पुष्पकलम दाहाल ‘प्रचण्ड’ले दक्षिण अमेरिकी देश भेनेजुएलामा भएको राजनीतिक परिर्वतनमा अमेरिकाले हस्तक्षेप गरेको भन्दै आपत्ति जनाएका थिए। प्रचण्डले भेनेजुएला प्रकरणमा अमेरिकाको कडा शब्दमा आपत्ति जनाएपछि नेपालस्थित अमेरिकी दूतावासले सो सम्बन्धमा नेपाल सरकारको आधिकारीक धारणा माग गरेको थियो।
सरकारले भेनेजुएलामा भएको राजनीतिक परिर्वतनका सन्दर्भमा गत मंगलबार आफ्नो धारणा राखेको थियो। भेनेजुएलामा देखिएको राजनीतिक संकटलाई नेपालले नजिकबाट नियालेको बताउँदै सरकारले भेनेजुएलाको आन्तरिक समस्या समाधान त्यहाँकै संविधानअुनसार जनताको चाहना अनुरुप हुनुपर्ने बताएको थियो।
अमेरिकाले नेपाल सरकारको तर्फबाट आएको आधिकारीक धारणालाई सह–अध्यक्ष प्रचण्डकै वक्तव्यको सम्पादित अशंको रुपमा व्याख्या गरेको जनाइएको छ।
काठमाडौंमै रहेका राजदूत बेरी सरकारले आयोजना गरेको कार्यक्रममा उपस्थित नहुनलाई अर्थपूर्ण रुपमा हेरिएको छ। अमेरिकाका लागि नेपालका पूर्व राजदूत रहेका एक कूटनीतिज्ञले सरकारले आयोजना गरेको कार्यक्रममा नियोग प्रमुख नगएर दोस्रो दर्जाका व्यक्तिलाई पठाउनुले कूटनीतिक अर्थ राख्ने बताउँछन्। ‘नेपालसँग पछिल्लो समय सम्बन्ध विस्तारका लागि आफैं अग्रसर भएको अमेरिका र उसको कदमका विरुद्ध नेपाल सरकार र सत्तारुढ दलको धारणाले अमेरिका असन्तुष्ट भएको यो घटनाले थप पुष्टि गरेको छ’, उनले भने।
कूटनीतिक नियोगका प्रतिनिधिसँगको भेटवार्तामा परराष्ट्रमन्त्री ज्ञवालीले नेपालको विकासको प्राथमिकताको क्षेत्र र त्यसमा अन्तर्राष्ट्रिय समुदायको साथ, सहयोग र समर्थनको आवश्यकताबारेमा पनि आफ्नो धारणा सार्वजनिक गरेका परराष्ट्र मन्त्रालयबाट जारी गरिएको प्रेस विज्ञप्तिमा जनाइएको छ।
कार्यक्रममा बोल्दै मन्त्री ज्ञवालीले वर्तमान सरकारको परराष्ट्रनीति पञ्चशीलको सिद्धान्त, संयुक्त राष्ट्रसंघको बडापत्र, अन्तर्राष्ट्रिय कानुन, असंलग्नताको सिद्धान्तका आधारमा सञ्चालन भएको दोहोर्याएका छन्।
यस्तै आगामी चैत १५–१६ गते काठमाडौंमा आयोजना हुने नेपाल लगानी सम्मेलनमा सहभागी हुन पनि कूटनीतिक नियोगका प्रतिनिधिसँग आव्हान गरिएको विज्ञप्तिमा जनाइएको छ। भेटवार्ताका क्रममा नेपालले आयोजना गर्ने लगानी सम्मेलनका तयारीको विषयमा नियोगका प्रतिनिधिहरूले जिज्ञासा राखेका थिए।
पछिल्लो समय पश्चिमा केही देशको नेपालको शान्ति प्रक्रियाको नटुङ्गिएको विषय र भेनेजुएलामा भएको राजनीतिक परिर्वतनका सन्दर्भमा नेपालसँग दुरी बढिरहेको विश्लेषणबीच सरकारले कूटनीतिक नियोगका प्रतिनिधिसँग भेटवार्ता गरेको हो। तर, प्रधानमन्त्री ओलीका परराष्ट्र मामिला सल्लाकार डा राजन भट्टराई भने ती घटनासँग आज भएको कूटनीतिक भेटवार्ताको कुनै सम्बन्ध नभएको दाबी गर्छन्।
नेपाल लाइभसँग कुरा गर्दै परराष्ट्र मामिला सल्लाकार डा भट्टराईले भने, ‘यो निरन्तर हुने भेटवार्ता हो। यसलाई हालै भएका घटनासँग जोडेर व्याख्या गरिनु हुन्न।’ भट्टराईले थप भने,‘ सरकारले यो भन्दा अघि पनि कूटनीतिक समुदायसँग यस्तो किसिमको भेटवार्ता गरेको थियो।’
सरकार गठनपछि गत चैतमा पनि सरकारले बालुवाटारमा कूटनीतिक नियोगका प्रतिनिधिसँग छलफल गरेको थियो। यूरोपियन युनियनको निवार्चन परिर्वेक्षक केन्द्रले नेपालमा सम्पन्न भएको प्रतिनिधिसभा र स्थानीय तहको निर्वाचनलाई लिएर टिप्पणीसहितको प्रतिवेदन सार्वजनिक गरेको दुई दिनपछि सरकारले कूटनीतिक नियोगका प्रतिनिधिसँग प्रधानमन्त्री निवास बालुवाटारमा भेटवार्ता गरेको थियो। यस्तै, परराष्ट्रमन्त्री ज्ञवालीले पनि केही समयअघि कूटनीतिक नियोगका प्रतिनिधिसँग छुट्टै भेटवार्ता गरेका थिए।
शुक्रबार भएको सरकार र कूटनीतिक नियोगका प्रतिनिधिबीचको भेटवार्तामा प्रधानमन्त्री ओली, परराष्ट्रमन्त्री ज्ञवालीका साथै अर्थमन्त्री युवराज खतिवडाको पनि उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
