काठमाडाै - सरकारले नेपालस्थित विदेशी कूटनीतिक नियोगका प्रतिनिधिसँग शुक्रबार भेटवार्ता गर्दैछ। काठमाडौँको एक होटेलमा भेटवार्ता हुने प्रधानमन्त्री केपी शर्मा ओलीका परराष्ट्र मामिला सल्लाहकार राजन भट्टराईले जानकारी दिएका छन्।भेटवार्तामा प्रधानमन्त्री केपी ओली परराष्ट्मन्त्री प्रदीप ज्ञवालीलगायत परराष्ट्का उच्च अधिकारीपनि रहने बताइएकाे छ।
पछिल्लो समय प्रधानमन्त्री केपी ओलीले विश्व आर्थिक मञ्चको वार्षिक बैठकमा सहभागी हुन स्विट्जरल्यान्डमा रहँदा संयुक्त राष्ट्रसंघ, अमेरिका, बेलायत, स्विट्जरल्यान्डलगायतका देशले नेपालको सत्य निरुपण तथा मेलमिलाप आयोगका कामको विषयमा संयुक्त प्रेस विज्ञप्ति प्रकाशित गरेका थिए। दुई वर्षे म्यादसहित २०७१ मा स्थापना भएको सत्य निरुपण तथा मेलमिलाप आयोगको दुई पटक म्याद थपे पनि कामले पूर्णता नपाएको भन्दै केही पश्चिमा देशले त्यसमा सरकारको ध्यान आकर्षण गराएका थिए। आयोगको म्याद यही माघ २६ गते सकिदैछ।
विभिन्न देशले गरेको संयुक्त प्रेस विज्ञप्तिका विषयमा प्रधानमन्त्री ओलीले स्विट्जरल्यान्डमा रहदा नेपाली दूतावासले आयाेजना गरेकाे एक कार्यक्रमलाई सम्बोधन गर्दै असन्तुष्टि जाहेर गरेका थिए।
यस्तै पश्चिमा केही देशले सत्य निरुपण तथा मेलमिलाप आयोगको विषयमा संयुक्त प्रेस विज्ञप्तिजारी गरेको भाेलिपल्टै अर्थात गत शुक्रबार नेकपाका अर्का अध्यक्ष पुष्पकमल दाहल ‘प्रचण्ड’ ले भेनेजुएलामा भएको राजनीतिक परिर्वतनमा अमेरिका संलग्न भएकोमा आपत्ति जनाउँदै अमेरिकी कदमको कडा शब्दमा प्रतिवाद गरेका थिए। जसले गर्दा पछिल्लो समय नेपाल र अमेरिकाको बढ्दो सम्बन्धमा आघात पुगेको विश्लेषण गरिएको छ।
यसै शिलशिलामा नेपालस्थित अमेरिकी दूतावासले नेकपाको अध्यक्षको तर्फबाट आएको विज्ञप्तिमा सरकारको धारणा मागेको थियो। सरकारले गत मंगलबार भेनेजुएलामा भएको राजनीतिक परिर्वतनलाई नेपालले नजिकबाट नियालेको भन्दै यहाँको समस्या संविधान अनुसार यहाँकै जनताले समाधान गर्नुपर्ने आशयसहितको औपचारिक धारणा सार्वजनिक गरेपनि त्यसलाई नेकपाका अध्यक्ष प्रचण्डकै वक्तव्यको निरन्तरताका रुपमा व्याख्या गरिएको छ।प्रधानमन्त्री ओलीका परराष्ट्र मामिला सल्लाकार भट्टराई भने ती घटनासँग आज हुने कूटनीतिक भेटघाटको कुनै सम्बन्ध नरहेको दाबी गर्छन्। ‘यो निरन्तर हुने भेटघाट हो। यसलाई हालै भएका घटनासँग जोडेर व्याख्या गरिनु हुन्न,' भट्टराईले भने, 'सरकारले यो भन्दा अघि पनि कूटनीतिक समुदायसँग यस्तो किसिमको भेटघाट गरेको थियो।’
सरकार गठनपछि गत चैतमा पनि सरकारले बालुवाटारमा कूटनीतिक नियोगका प्रतिनिधिसँग छलफल गरेको थियो। यूरोपियन युनियनको निर्वाचन परिर्वेक्षक केन्द्रले नेपालको प्रतिनिधिसभा र स्थानीय तहको निर्वाचन समानुपातिक ढङ्गमा नभएको प्रतिवेदन सार्वजनिक गरेका दुई दिनपछि सरकारले कूटनीतिक नियोगका प्रतिनिधिसँग बालुवाटारमै छलफल गरेको थियो।
छलफलका क्रममा युरोपियन युनियनको निर्वाचन परिवेक्षण सम्बन्धि प्रसङ्ग ननिक्लिए पनि सरकारले सबै देशसँग मिलेर अघि जान तयार रहेको बताएको र सोही खालको सहयोग अन्य देशसँग पनि अपेक्षा गरेको बताएको थियो।
तत्कालीन समयमा भएको कूटनीतिक भेटघाटमा प्रधानमन्त्री ओली, परराष्ट्रमन्त्री प्रदीप ज्ञवालीसहित सरकारका अन्य मन्त्री उपस्थित थिए भने शुक्रबार हुने भेटवार्तामा पनि प्रधानमन्त्री ओली, परराष्ट्रमन्त्री ज्ञवाली सहित सरकारका अन्य प्रतिनिधिहरु सहभागी हुने भट्टराईले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
