काठमाडौं– संसदमा माघ ११ गते भएको बलजफ्तीको घटना, प्रमुख प्रतिपक्ष दल कांग्रेसले अनसनरत डा गोविन्द केसीको मागप्रति सरकार पूरै संवेदनहीन बनेको आरोप लगाएको छ।
कांग्रेसले बुधबार पत्रकार सम्मेलन गरी प्रधानमन्त्री स्वयंको अग्रसरतामा भएको सम्झौता विपरीत चिकित्सा शिक्षा विधेयक पारित गर्नुलाई असंवेदनशील कार्य भनेको छ।
सरकारले डा केसीका मागप्रति गरेको बेवास्ताले सरकार उत्तर कारियाली 'सरकार' जस्तै देखिएको प्रवक्ता विश्व प्रकाश शर्माले आरोप लगाए। उनले भने, ‘उत्तर कोरियाली सरकार टपक्क टिपेर राखिएजस्तो देखिएको छ।’
सरकारका पछिल्ला कदमबाट आक्रोशित बनेको कांग्रेसले २१ गते गर्ने भनिएको विरोध प्रर्दशनमा भ्रष्टाचारको मुद्धालाई समावेश गरेको थिएन।
वाइडबडी प्रकरणलाई कांग्रेसले विरोधको एजेण्डा नबनाएको प्रति कांग्रेसकै आलोचना भएपछि हतारमा पत्रकार सम्मेलन गरी कांग्रेसले आफ्नो धारणा सार्वजनिक गरेको हो।
उनले भने, ‘वाइडबडी जहाज खरिदमा भएको अर्बौंको घोटालाका बारे गम्भीर ढंगले गहिरो छानबिन गर्न हामीले संसदमा र सार्वजनिक रुपमा पनि आवाज उठाउँदै आएका छौँ। माघ २१ को विरोध प्रदर्शनमार्फत् यसका लागि थप दबाब सिर्जना गरिने छ।’
वाइडबडी प्रकरणसँग बुढीगण्डकी, ३३ किलो सुन प्रकरण र निर्मला पन्त बलात्कार घटनालाई विरोध प्रर्दशनमा व्यापक रुपमा उठाउने प्रवक्ता शर्माले बताए।
नेपाल देश आफैंले निर्माण गर्नु उपयुक्त हुने र गर्न सकिने ठहर गरिएको बुढीगण्डकी बहुउदेश्यीय परियोजनाका लागि नेपालीहरूबाट लगानी उठिरहेको समयमा ‘बिना प्रतिष्पर्धा विदेशी कम्पनीलाई सुम्पिनुका पछिल्तिर के रहस्य लुकेको छ?' कांग्रेसको प्रश्न छ।
गिरिजाप्रसाद कोइराला र सुशील कोइरालाका नाममा रहेका जी.पी. कोइराला राष्ट्रिय श्वासप्रश्वास उपचार केन्द्र, तनहुँ र सुशील कोइराला प्रखर क्यान्सर अस्पताल, बाँकेलाई नामेट गर्न सरकारले गरेको दुष्प्रयास असफल भएको कांग्रेसको बुझाइ छ।
सोमबारको मन्त्रिपरिषद् बैठकले ती दुर्ई अस्पताल संघीय सरकार मातहत ल्याएको औपचारिक जानकारी प्राप्त नभएको जनाएको छ। शर्माले भने, ‘निर्णय सच्याएको हो भने २१ गतेको विरोधको महत्व झन बढ्यो। सरकारले गरेका गल्ती दर्जनौं छन्।’
माघ ६ मा प्रमुख प्रतिपक्ष दलका नेता बिना संवैधानिक परिषद्ले निर्णय गरेको भन्दै कांग्रेसले पुनः विरोध जनाएको छ। ‘संवैधानिक परिषद्को बैठक राख्नु र नियुक्तिका केही निर्णय गर्नु लोकतान्त्रिक मूल्य र परम्परा विपरीतको घटना’ भएको कांग्रेसको निर्क्यौल छ।
कञ्चनपुरकी बालिका निर्मला पन्तको बलात्कारपछि हत्या भएको ६ महिना पुगिसक्दा पनि 'दोषी पत्ता लगाउन त परै जाओस्, निर्दोषलाई दोषी ठहर्याउने षडयन्त्र' भएको कांग्रेसको ठहर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
