धौलागिरि क्षेत्रमा गुणस्तर सुधार्दै टेलिकम, दसैंसम्ममा फोरजी सेवा सुरु हुने

सूचना-प्रविधि

नेपाल लाइभ बुधबार, माघ ९, २०७५ १२:३८

बागलुङ- धौलागिरि क्षेत्रमा नेपाल टेलिकमको सेवा विस्तार र गुणस्तर सुधारको काम तीव्र बनेको छ।

पूर्वाधार र प्रविधिमा गरिएको सुधारले सेवा स्तरीय बन्दै गएको टेलिकम बागलुङ कार्यालयले जनाएको छ। कार्यालयले जिएसएम मोबाइल, सिडिएमए, ल्यान्डलाइन र इन्टरनेट सेवा प्रवाह गर्दै आएको छ।

पछिल्लो अवधिमा सेवा विस्तार र गुणस्तरमा उल्लेख्य सुधार आएको कार्यालयका वरिष्ठ इञ्जिनीयर केशव शर्माले बताए। उनका अनुसार धौलागिरिका एक सय २० ठाउँमा मोबाइल र इन्टरनेट सेवाका लागि जिएसएम बिटिएस टावर सञ्चालित छन्। गत दुई वर्षमा मात्र ४४ नयाँ टावर बनेका थिए।

'यो वर्ष मात्रै दश नयाँ टावर सञ्चालनमा आएका छन्', इञ्जिनीयर शर्माले भने, 'पुराना अस्थायी संरचनामा बनेका टावरको पनि स्तरवृद्धि भइरहेको छ।' अहिले अस्थायी प्रकृतिले चलेका १५ वटा टावरको स्थायी संरचना बनाउने काम भइरहेको छ। अर्को चरणमा थप १२ वटा टावरको स्तर सुधार गरिने याेजना रहेकाे उनले सुनाए।

स्थायी संरचना बन्दा टावर हाल भएका भन्दा अग्लो हुने र त्यसले सेवाको पहुँच बढाउने जनाइएको छ। मुस्ताङको कोरला, म्याग्दीको बरङ्जा, बागलुङको अमरभूमि, छिस्ती र खुङ्गामा नयाँ टावर निर्माणाधीन छन्। थ्रिजी सेवाको लागि बागलुङको बुर्तिबाङ, म्याग्दीको सिङ्गा तातोपानी र पोखरेबगरमा पनि जिएसएम बिटिएस टावर निर्माणको लागि अध्ययन भइरहेको छ।

'धौलागिरिभर मोबाइल सेवा विस्तार हुँदैछ', इञ्जिनीयर शर्माले भने, 'इन्टरनेटको पनि सेवा र गुणस्तर बढ्दै गएको छ।' बागलुङ, पर्वत, म्याग्दी र मुस्ताङमा गरी हाल ८१ ठाउँमा थ्रिजी सेवा छ। आगामी चैतभित्र बढाएर ९१ ठाउँमा थ्रिजी सेवा पुर्‍याउने लक्ष्य कार्यालयको छ। छिट्टै फोरजी सञ्चालनको तयारी पनि अघि बढ्ने जनाइएको छ। आउँदो दसैंसम्ममा धौलागिरिका मुख्य बजार क्षेत्रमा फोरजी सेवा सुरु हुने बताइएकाे छ।

गाउँ-गाउँमा जिएसएम मोबाइल पुगेपछि इन्टरनेट डाटा खपत पनि उल्लेख्यरूपमा बढेको छ। दुई वर्षअघिसम्म प्रतिदिन ६६ जिबी खपत हुने गरेकामा अहिले बढेर डाटा खपत दुई हजार ४ सय जिबी पुगेको छ। ल्यान्डलाइन टेलिफोन सेवा पनि विस्तार हुँदै गएको कार्यालयका अर्का इञ्जिनीयर अमृत नेपालले बताए।

धौलागिरिका १६ ठाउँमा ल्यान्डलाइन सेवा र २५ ठाउँमा सिडिएमए सेवा पुगेको छ। 'सेवा विस्तार नै हाम्रो मुख्य लक्ष्य हो', इञ्जिनीयर नेपालले भने, 'सेवाका बारेमा आउने गुनासाको तत्काल सम्बोधन हुन्छ।' जिएसएम मोबाइल पुगेपछि सिडिएमएका प्रयोगकर्ता भने घट्दै गएको पाइएको छ।

गुणस्तरीय डाटा र भ्वाइस सेवाका लागि तामाको तार हटाएर फाइबर प्रविधिसमेत राख्न सुरु गरिएको छ। आउँदो चैतभित्र बागलुङ बजारका सबै घरमा फाइबर विस्तार हुने कार्यालयले जनाएको छ। बागलुङपछि म्याग्दीको बेनी र पर्वतको कुश्मा बजारमा फाइबर पुर्‍याउने कार्यालयले लक्ष्य लिएकाे छ।

टेलिकमले म्याग्दीको गुर्जा बाहेक धौलागिरिका अन्य ठाउँमा रहेका ‘स्याटेलाइट’ प्रविधि हटाएर ‘माइक्रोवेभ रेडियो लिङ्क’ सञ्चालनमा ल्याएको छ। ‘माइक्रोवेभ रेडियो लिङ्क’ प्रविधिले भ्वाइस र डाटाको गुणस्तरमा सुधार आउने जनाइएको छ। (रामबहादुर थापा/रासस)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

स्व नरहरि देवकोटा स्मृति समाजसेवा पुरस्कार मानव सेवा आश्रमलाई

सवारी साधनबाट गैरकानूनी कर नउठाउन स्थानीय तहहरुलाई सरकारको निर्देशन

हङकङ सिक्सेस: लगातार दुई खेल हार्दै इंगल्यान्ड बाहिरियो, नेपाल क्वाटरफाइनलमा