जनकपुर– दाइजोको निहुँमा सीमालाई विष खुवाएर हत्या गरिएको माइती पक्षले आरोप लगाएका छन्। आफ्नै बुहारी सीमा र नातिनीको हत्या गरेको आरोपमा प्रहरीले सासु–ससुरालाई पक्राउ गरेको थियो।
आइतबार माइती पक्षले पत्रकार सम्मेलन गर्दै जनकपुर उपमहानगरपालिका–४ बस्ने समिर मिश्रका २५ वर्षीय श्रीमती सीमा शर्मा र २ वर्षीय छोरी गौरी मिश्रलाई घर पक्षले विष खुवाएर हत्या गरेकोे आरोप लगाए।
सीमाको भाइ सुजित शर्माले पटक–पटक दाइजोको कारण शारीरिक र मानसिक यातना दिँदै गरेको स्मरण गर्दै भने, ‘बहिनीले विवाह बन्धनमा बाँधिएको ५ वर्षसम्म निकै पीडादायी जिवन यापन गर्दै आएकी थिइन्।’
विगतमा बहिनीलाई दिएको यातनाबाट आजित भएकी सीमाका भाइ सुजितले उजुरी गर्नभन्दा बहिनीले सामाजिक दबाबको कारण उजुरी गर्न नमानेको सुजितको नातेदार सरिता शर्माले बताइन्।
सीमाको मृत्युपश्चात् सीमाका श्रीमान समिर मिश्र फरार भएपछि सीमाका सासु किरण मिश्र र ससुरा श्यामसुन्दर मिश्रलाई प्रहरीले पक्राउ गरी अनुसन्धान थालिएको छ।
प्रहरी उपरीक्षक गोविन्द थपलियाले घटनाको अनुसन्धान भइरहेको र घटनाका विषयमा प्रहरीलाई केही प्रमाण फेला नपरेको बताए। प्रहरी उपरीक्षक थपलियाका अनुसार हत्या र आत्महत्या गर्न उक्साउनेलाई पनि ज्यान मार्ने उद्योग मुद्दा दर्ता हुन्छ।
प्रहरीले सीमाका हत्यारालाई पक्राउ गर्न नसकेको भन्दै माइती पक्षले क्षतिपूर्तिसहित दोषीलाई कारबाहीको माग गरेका छन्।
घर पक्षले दाइजोका लागि सीमालाई दुःख दिने गरेको माइती पक्षको आरोप छ। घटनापछि सीमाका पति समिर मिश्र फरार छन्।
सीमा र गौरीलाई विष खुवाएर समिर फरार भएको माइती पक्षको आरोप छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
