काठमाडौं– एभरेस्ट प्रिमियर लिग (इपिएल) क्रिकेट प्रतियोगितामा सहभागी हुन आफ्नो नाम दर्ता गराएका केही चर्चित खेलाडी बिक्री हुन असफल भएका छन्।
सोमबार भएको अक्सन (बोलकबोल) मा ६ टिमले १०–१० जना गरी ६० खेलाडी आफ्नो टिममा आबद्ध गरेका थिए। इपिएलमा सहभागी हुन हुन १ सय ६० खेलाडीले नाम दर्ता गराएका थिए। यीमध्ये ९० जनालाई मात्र अक्सनमा सहभागी गराइएको थियो । अक्सनमा उपलब्ध भएर पनि ३० जना खेलाडीलाई कुनै पनि टिमले किन्न चासो नदेखाएका हुन्।
अक्सनपछि गरिएको पत्रकार सम्मेलनमा इपिएलका कार्यकारी निर्देशक आमिर अख्तरले अक्सनमा केही चर्चित खेलाडी ब्रिकी हुन नसकेको बताए। उनले टिमको बाध्यता र खेलाडीको तीव्र प्रतिस्पर्धाका कारण चर्चित खेलाडीले इपिएलमा सहभागी हुन नपाउने बताए।
बिक्री नभएका सबैभन्दा चर्चित खेलाडी हुन्, अनिल मण्डल। राष्ट्रिय टिमबाट ओपनिङको जिम्मेवारी सम्हालिसकेका अनिलले नेपालका लागि एकदिवसीय खेलमा २ अन्तर्राष्ट्रिय शतक प्रहार गरिसकेका छन्।
यस्तै राष्ट्रिय खेलाडीहरु सन्जम रेग्मी, राहुल विक र मन्जीत श्रेष्ठलाई पनि आबद्ध गर्न कुनै टिमले बोली लगाएन्।
यो पनि: इपिएलमा चार खेलाडी बने महँगा, ६ टिमका लागि ६० खेलाडी बिक्री
गत वैशाखमा भएको प्रधानमन्त्री कप एकदिवसीय क्रिकेट प्रतियोगितामा एक मात्र शतक बनाउने खेलाडी हसिम अन्सारी पनि बिकेनन्। नेपाल यू–१९ टिमका पूर्व खेलाडी हसिमले यसअघि एनपिएल (जगदम्बा राइनोज), इपिएल (जगदम्बा राइनोज) र डिपिएल (कञ्चनपुर आइकोनिक) बाट खेलेका थिए। उनी नेपाली राष्ट्रिय टिमको २५ जनाको बन्द प्रशिक्षणमा परिसकेका खेलाडी हुन् । यस्तै यू–१९ टिमबाट खेलिसकेका प्रेम तामाङमाथि पनि इपिएलका कुनै टिमले आँखा लगाएनन्।
यसअघि सोमबार भएको अक्सनमा अलराउन्डर आरिफ शेख, तीव्र गतिका बलर करण केसी, युवा स्पिनर सन्दीप लामिछाने र विकेटकिपर ब्याट्सम्यान विनोद भण्डारी बढी मूल्यमा ब्रिक्री भएका थिए। पहिलो श्रेणीका चारै खेलाडी १ लाख ७५ हजार रुपैयाँमा बिक्री भएका हुन्। आरिफलाई भैरहवा ग्लाडिएटरले भित्र्याउँदा करणलाई विराटनगर वारियर्सले आफ्नो टिममा राख्यो। सन्दीप ललितपुर पाट्रिओट्समा उच्चतम मूल्यमा बिक्री भएका छन् भने विनोद पोखरा राइनोजमा आबद्ध भए।
इपिएल खेल्ने टोलीमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज र चितवन टाइगर्स छन्।
काठमाडौंमा सोमपाल कामी, ललितपुरमा ज्ञानेन्द्र मल्ल, विराटनगरमा पारस खड्का, भैरहवामा शरद भेषावकर, पोखरामा शक्ति गौचन र चितवनमा दीपेन्द्रसिंह ऐरी ‘मार्की’ खेलाडीका रुपमा आबद्ध भएका थिए। ‘मार्की’ खेलाडीको न्यूनतम पारिश्रमिक २ लाख रुपैयाँ रहेको इपिएलले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
