काठमाडौं– संसारबाट आएका भोटको आधारमा अघि रहँदै स्पेनिस क्लब रियल म्याड्रिडका पोर्चुगिज स्ट्राइकर क्रिस्टियानो रोनाल्डोले लगातार दोस्रो पटक फिफा पुरुष वर्ष खेलाडीको अवार्ड जितेका छन्।
रोनाल्डोले अन्तिम मनोनयनमा परेका बार्सिलोनाका अर्जेन्टायन फरवार्ड लिओनल मेसी र फ्रेन्च क्लब पेरिस सेन्ट जर्मेनका ब्राजिलियन फरवार्ड नेइमारलाई पछि पारेर अवार्ड जितेका हुन्।
अवार्डका लागि चार समूहमा भोटिङ भएको थियो। जसमा फिफा सदस्य राष्ट्रका राष्ट्रिय प्रशिक्षक र कप्तानले भोट गरेका थिए। यस्तै विश्वभरबाट छानिएका फुटबल पत्रकार र फ्यानले पनि आफूलाई मन पर्ने खेलाडी तथा प्रशिक्षकलाई मत दिएका थिए।
भोटिङमा विश्वभरका २ सय फुटबल पत्रकारले सहभागिता जनाएका थिए। यस्तै अनलाइनमार्फत लाखौं फ्यानले भोट गरेका थिए। फिफाको अनलाइनमा फ्यानले एक पटक मात्र भोट गर्ने व्यवस्था गरिएको थियो। सबैले मनोनयनमा परेका खेलाडी तथा प्रशिक्षकलाई पहिलो, दोस्रो र तेस्रो तहमा राखेर भोट गरेका थिए। चारै समूहको भोट २५–२५ प्रतिशतको आधारमा हिसाब गरिएको छ।
यो पनि – मेसी र नेइमारलाई पछि पार्दै रोनाल्डोले जिते फिफा वर्ष खेलाडीको अवार्ड
कप्तान, प्रशिक्षक र पत्रकारले तीन जनालाई तहगत रुपमा भोटिङ गर्ने व्यवस्था गरिएको थियो। जसमा पहिलो नम्बरमा भोट पाउनेले ५ अंक तथा दोस्रो नम्बरमा भोट पाउनेलाई ३ अंक दिने व्यवस्था गरिएको थियो। तेस्रो नम्बरमा भोट पाउनेले १ अंक पाएका थिए।
फिफा अवार्डमा नेपालबाट तीन जनाले भोट गरेका थिए। प्रशिक्षक ग्योतोकु कोजी, कप्तान विराज महर्जन र पत्रकार रितेश रिजालले भोट गरेका हुन्। बेलायती पत्रिका डेली मिररले संसारभरबाट भएको मतदान सार्वजनिक गरेको छ। जसअनुसार नेपालका प्रशिक्षक कोजीले पहिलो नम्बरमा क्रिस्टियानो रोनाल्डोलाई मत दिएका छन्। कोजीले दोस्रो नम्बरमा मेसी र तेस्रो नम्बरमा नेइमारले भोट दिए।
कप्तान महर्जनले पहिलो नम्बरमा स्विडेनका फरवार्ड ज्लाटन इब्राहिमोभिक, दोस्रो नम्बरमा फ्रान्सका इन्टोनी ग्रिजम्यान र तेस्रो नम्बरमा रोनाल्डोलाई भोट दिएका थिए। पत्रकार रिजालले पहिलो नम्बरमा रोनाल्डो, दोस्रो नम्बरमा मेसी र तेस्रो नम्बरमा नेइमारलाई भोट दिए।
रोनाल्डो र मेसीले पनि भोट गरेका थिए। तर दुवैले एक अर्कालाई भोट दिएनन्। रोनाल्डोले पहिलो नम्बरमा लुका मोड्रिक, दोस्रो नम्बरमा सर्जियो रामोस र तेस्रो नम्बरमा मार्सेलोलाई मतदान गरे। मेसीले पहिलो नम्बरमा लुइस सुआरेज, दोस्रो नम्बरमा आन्द्रेस इनिष्टा र तेस्रो नम्बरमा नेइमारलाई मत दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
