जनकपुर- प्रदेश २ सरकारले अतिथि सत्कार र भोजभतेरमा मात्रै ४ करोडभन्दा बढी खर्च गरेको छ।
मंसिर २६ गते भारतको उत्तर प्रदेशका मुख्यमन्त्री योगी आदित्यनाथको स्वागत सत्कारमा मात्रै सरकारले ७३ लाखभन्दा बढी खर्च गरेको देखिएको छ। योगीको सत्कारमा मुख्यमन्त्री राउतले भण्डारा (भोज) को आयोजनासमेत गरेका थिए।
स्वागत सत्कार र भण्डाराको आयोजनामा सरकारले ७३ लाख ८ हजार १ सय ४५ रुपैयाँ खर्चेको मुख्यमन्त्री तथा मन्त्रिपरिषद्को कार्यालयले जनाएको छ। मन्त्रिपरिषद् कार्यालयबाट प्राप्त खर्च विवरण अनुसार योगीको स्वागतका लागि बनाइएका गेट, टेन्ट निर्माण, फूलमाला, कुर्सी तथा साउन्ड सिस्टमको व्यवस्थापनमा ३८ लाख ८४ हजार ७ सय ८९ रुपैयाँ खर्चिएको छ।
त्यसैगरी, भण्डाराका निम्ति २६ लाख ५१ हजार ३ सय, अतिथिलाई उपहार दिन ५७ हजार ५ सय र कार्ड छपाइ, फ्लेक्स बोर्ड, प्रचारप्रसार लगायत खर्चमा ७ लाख १४ हजार ५ सय ५६ गरी जम्मा ७३ लाखभन्दा बढी खर्चिएको छ।
यता, विवाहपञ्चमी महोत्सवकै लागि जानकी मन्दिरका तर्फबाट अढाई करोडभन्दा बढी खर्च भएको मन्दिर व्यवस्थापक पक्षले जनाएको छ।
यसअघि बैसाखमा भारतीय प्रधानमन्त्री नरेन्द्र मोदी जनकपुर भ्रमणमा आएका बेला प्रदेश सरकारले स्वागत सत्कारको नाममा ३ करोड १२ लाख रुपैयाँ खर्च गरेको थियो।
मन्त्रिपरिषद् कार्यालयबाट प्राप्त विवरण अनुसार सो बेला प्रदेश सरकार मातहत रहेका ६ वटा मन्त्रालयमार्फत विभिन्न शीर्षकमा सो रकम खर्चिएको थियो।
भारतीय प्रधानमन्त्रीको तीन घन्टाको जनकपुर बसाइका लागि प्रदेश सरकार र उपमहानगरपालिकाबाट विभिन्न शीर्षकमा ५ करोड जति खर्चिएको दाबी गरिएको थियो।
आर्थिक मामिलामन्त्री विजय यादवले भने खर्च अपारदर्शी रुपमा नदेखिएको बताएका छन्। यद्यपि प्रदेश सरकारले मोदी भ्रमणको खर्च हालसम्म सदनमा पारदर्शी गर्न सकेको छैन।
त्यसैगरी भदौ २ गते प्रधानमन्त्री केपी ओलीले प्रदेशसभालाई विशेष सम्बोधन गरेका थिए। प्रधानमन्त्री ओलीको स्वागत सम्मानमा प्रदेशसभाले आयोजना गरेको दिवाभोजमा ६ लाख ४७ हजार ७ सय ६० रुपैयाँ खर्च भएको जनाएको छ।
त्यसैगरी, तिहार र छठको अवसरमा कात्तिक १८ गते प्रदेश सरकारको सचिवालय मधेस भवनमा मुख्यमन्त्री राउतले आयोजना गरेको शुभकामना आदानप्रदान कार्यक्रममा ११ लाख ८२ हजार ५ सय रुपैयाँ खर्च भएको छ।
बढी खर्चको विषयलाई लिएर प्रतिपक्ष दलका नेताहरुले प्रदेश सरकारबाट जनतालाई ठग्ने काम भइरहेको आरोप लगाएका छन्। उनीहरुले सरकारबाट जनताले गर्नुपर्ने परिवर्तनको अनुभूति अहिलेसम्म केही हुन नसकेको भन्दै तामझाम र देखावटीमा मात्र बजेट सखाप पार्ने काम भइरहेको बताए।
नेकपा सांसद रामचन्द्र मण्डलले मधेसी जनतालाई अधिकार सम्पन्न बनाउने नारा दिएर सत्तामा पुगेको सरकार अहिले सोही जनतालाई मूर्ख बनाउने काममा लागेको बताए।
त्यसैगरी प्रदेशसभामा प्रतिपक्षी दल कांग्रेस सांसद शिवचन्द्र चौधरीले सरकारले जनताले प्रत्यक्ष अनुभूति गर्ने काम अहिलेसम्म नगरेको आरोप लगाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
