काठमाडौं- नेपाल क्रिकेट संघ (क्यान) को निर्वाचित समितिले सर्वोच्च अदालतमा दायर गरेको मुद्दा फिर्ता लिन निवेदन दिएको छ।
क्यानका उपाध्यक्ष दिवाकर घलेले २०७२ पुस २८ गते दायर गरिएको मुद्दा फिर्ता लिन गत शुक्रबार सर्वोच्चमा निवेदन दिएका थिए। सो निवेदनको आइतबार सुनुवाई रहेको छ। न्यायाधिशद्वय डा आनन्दमोहन भट्टराई र डम्बरबहादुर शाहीको इजलासमा मुद्दा रहेको छ।
यसअघि २०७२ मा पुसमा निर्वाचित क्यानका अध्यक्ष चुतरबहादुर चन्दले नेपाल सरकार, खेलकुद मन्त्रालय र खेलकुद परिषद गरी २३ जनालाई बिपक्षी बनाएर मुद्दा दायर गरेका थिए। उनले आफूहरु आधिकारिक क्यान भएको भन्दै दायर गरेको मुद्दा विचाराधिन थियो।
यसअघि गत कार्तिकमा कानुनी र ब्यवहारिक प्रकृयाबारे छलफल गरी मुद्दा फिर्ता लिने सम्बन्धमा निर्णय गर्न क्यान निर्वाचित समितिको बैठकले मुद्दा फिर्ता लिन प्रकिया बढाउन ५ जना पदाधिकारीलाई जिम्मा दिने निर्णय गरेको थियो। जसमा अध्यक्ष चतुरबहादुर चन्द, उपाध्य दिवाकर घले, शैलेस कुमार चौधरी, संजय सिंह र महासचिव असोकनाथ प्याकुरेल थिए।
यसअघि २०७२ मंसिरमा भएको क्यानको निर्वाचनलाई राष्ट्रिय खेलकुद परिषदले मान्यता नदिएपछि क्रिकेट विवाद सुरु भएको थियो। परिषदले निर्वाचित समितिलाई मान्यता नदिएर तदर्थ समिति गठन गरेको थियो। त्यसपछि निर्वाचित समितिले सर्वोच्चमा मुद्दा दायर गरेको थियो। सर्वोच्चले अन्तरिम आदेश दिएपछि तदर्थ समितिले काम गर्न पाएको थिएन।
यसबीचमा आन्तरिक विवाद र सरकारी हस्तक्षेप भएको भन्दै आइसिसीले क्यानलाई ०७३ बैशाखमा निलम्बन गरेको थियो । त्यसपछि आइसिसीले नै नेपाली क्रिकेटको व्यवस्थापन हेर्दै आएको छ।
विवाद समाधानका लागि आइसिसीले सल्लाहकार समिति गठन गरेको थियो। सल्लाहकार समितिमा निर्वाचित क्यानसहित सरोकारवाला व्यक्ति सदस्य दिए। समितिले क्यानको नयाँ विधान बनाएको थियो। सो विधानलाई निर्वाचित क्यानले परिमार्जित सहित पारित गरेको थियो। तर आइसिसीले हुबहु पारित गर्नु पर्ने भनेपछि गत वैशाखमा हुबहु पारित भएको थियो।
नयाँ विधानअनुसार गठन भएको पाँच सदस्यीय मोनिटरीङ कमिटीले क्यान जिल्ला निर्वाचनको अध्ययन गरेको थियो। मोनिटरीङ समितिले आफ्नो प्रतिवेदन बुझाइ सकेको छ। आइसिसीले मुद्दा फिर्ता लिएपछि बाँकी प्रक्रिया अघि बढाउने बताएको थियो। अब मुद्दा फिर्ता भएपछि आइसिसीले टाइमलाइन दिनेछ। त्यसपछि सम्पन्न हुने प्रदेश र केन्द्रको निर्वाचनसँगै आईसीसीले क्यान माथिको निलम्बन फुकुवा गर्ने विश्वास गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772726043.png)
-1764146706.png)
