वालिङ– स्याङ्जाको वालिङमा अन्तराष्ट्रिय साइकल दौड प्रतियोगिता हुने भएको छ। साइक्लिङ प्रतियोगिता एक सय किलोमिटर दूरी तय गरिएको छ।
प्रतियोगिता वालिङ नगरपालिका र उद्योग वाणिज्य संघले संयुक्त आयोजना गर्न लागेका हुन्। प्रतियोगिताको संयोजन ‘वण्डरफूल वालिङ समूह’ले गरेको छ। एकदिवसीय अन्तर्राष्ट्रिय साइक्लिङ प्रतियोगिता सातौं वालिङ महोत्सवको अवसरमा गर्न लागिएको हो। प्रतियोगिता माघ १८ गते हुनेछ। विहान सात बजे सुरु हुने खेलको दुरी प्रतिस्पर्धीले १० घण्टामा पूरा गर्नु पर्नेछ।
नेपाल साइक्लिङका लागि उत्कृष्ट गन्तव्य भएको जनाउँदै प्रतियोगिताका संयोजक दिनकर नेपालले भने ‘उत्कृष्ट गन्तव्यमा आकर्षित गर्नका लागि रचनात्मक कार्यक्रम गर्न लागिएको हो।' एक सय किलोमिटर पहाडी बाटोमा पार गर्नु कठिन कार्य भएकोले साहसिक खेलबाट पहिचान गराउन प्रतियोगिता राखिएको उनले जानकारी गराए। उनले थपे ‘प्याराग्लाडिङमा उत्कृष्ट गन्तव्य स्थान स्याङ्जा भएकाले साइक्लिङ खेल पनि थप्न लागिएको हो।’
प्रतियोगिको लागि बुधबार देखि अनलाइन दर्ता शुरु गरिएको छ। प्रतियोगितामा सहभागी हुनका लागि नेपाल एमटिबी डटकम लग इन गरि रजिष्ट्रेसन गर्नुपर्नेछ। रजिष्ट्रेसनका लागि अन्तिम म्याद जनवरी २५ सम्म तोकिएको छ। त्यसपछिका तिन दिनमा डबल शुल्क चुक्ता गरि रजिष्ट्रेसन गर्न सकिनेछ। स्वदेशी तथा विदेशी सहभागी हुने खेलमा टाइटल पुरस्कार पाँच लाख रहेको छ। महिला प्रतिस्पर्धीबाट प्रथम हुनेले तिन लाख र पुरुषतर्फबाट प्रथम हुनेले एक लाख ५० हजार रुपैयाँ प्राप्त गर्नेछन्। प्रतियोगीले खेलका लागि नेपालीले पाँच हजार रुपैयाँ र विदेशीले एक सय ५० डलर शुल्क बुझाउनुपर्नेछ।
खेलको दुरीलाई चार चरण गरि ‘कट अफ’ मा विभाजन गरिएको छ। प्रतिस्पर्धीका लागि २५ किमी, ५० किमी, ७५ किमी र एकसय किमि दुरी निर्धारण गरिएको छ। सात बजे शुरु हुने खेलमा प्रतिस्पर्धीले १२ बजे भित्र २५ किमी दुरी पार गर्नैपर्नेछ। साइक्लिङका लागि गति सुस्त हुनेहरुका ध्यानमा राखि २५ किमी, ५० किमी, ७५ किमी गरि विभाजन गरिएको संयोजक नेपालले जानकारी गराए। उनले भने ‘कुनै प्रतिस्पर्धीले ५० किमि दुरी पार गरेपछि अघि बढ्न नसके ५० किमि दुरी पार गरेको प्रमाणपत्र प्रदान गरिनेछ।’
वालिङ खेल मैदानबाट प्रतियोगिता सुरु हुनेछ। प्रतिस्पर्धीका लागि साइक्लिङ रुट वालिङ खेल मैदान– मिर्दी–जगत भञ्ज्याङ–केवरे–गह्रौंसुर–बराहकोट–करादी– बायँटारी– अकला– डुम्रे भञ्ज्याङ– शीरकोट –अमले तय गरिएको छ। निर्धारित रुट सकिदा एक सय किलोमिटरको पूरा हुनेछ। एकदिवसीय साइकल म्याराथनमा पहिलो प्रतिस्पर्धा भएको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772726043.png)
-1764146706.png)
