काठमाडौं– अखिल नेपाल फुटबल संघ (एन्फा) ले नेपाली राष्ट्रिय फुटबल टिमका पूर्व कप्तान मणि विक्रम शाहको नाममा पुरस्कार स्थापन गरेको छ।
एन्फाले सहिद स्मारक 'ए' डिभिजन लिगमा उत्कृष्ट प्रदर्शन गर्ने युवा खेलाडीलाई 'मणि विक्रम शाह युवा खेलाडी अवार्ड' प्रदान गर्ने भएको हो। पुरस्कृत हुने खेलाडीले नगद १ लाख रुपैयाँ प्राप्त गर्ने एन्फाले जनाएको छ।
जारी लिगमा मनाङ मर्स्याङदी क्लबले २ खेल अघि उपाधि जितिसकेको छ। लिगको अन्तिम चरणको खेल शनिबारदेखि सुरु हुँदैछ।
नेपाली फुटबलमा म्याराडोनाका उपनाम पाएका शाहको ७ महिनाअघि निधन भएको थियो।
असीको दशक जतिबेला अर्जेन्टिनाका महान् फुटबलर डिएगो म्याराडोनाकै शैलीमा फुटबल खेलेका कारण शाहलाई नेपाली म्याराडोनाको उपमा थिइएको थियो। उस्तै उचाइ। लामो र कर्ली परेको ‘हेयर कट’। देब्रे खुट्टाले प्रहार गर्न सक्ने गजबको समानता। फेरि दुवै मैदानमा उत्रिन्थे, १० नम्बर जर्सी पहिरिएर। करिब एक दशक नेपालको राष्ट्रिय टोलीबाट खेल्दा मणि शाहको परिचय थियो, ‘नेपाली म्याराडोना’।
मणि शाह सन् १९८५ दोस्रो दक्षिण एसियाली खेलकुदमा पहिलोपल्ट राष्ट्रिय टोलीमा समावेश भएका थिए। यतिबेला उनको उमेर १७ वर्ष मात्र थियो। उनले सन् १९९८ मा थाइल्यान्डको बैंककमा आयोजित एसियाडमा देशको झन्डा बोक्दै इतिहास रचेका थिए। एसियाडमा राष्ट्रिय झन्डा बोक्ने उनी एक्ला फुटबल खेलाडी हुन्।
मणिको नेपाली फुटबलमा सम्झनलायक थुप्रै खेलहरू छन्। सन् १९९३ ढाकामा भएको छैटौं दक्षिण एसियाली खेलकुदमा नेपालले जितेको एक मात्र स्वर्ण फुटबलबाट प्राप्त भएको थियो। त्यतिबेला नेपाललाई स्वर्ण दिलाउन उनकै भूमिका निर्णायक थियो।
भारतविरुद्ध फाइनलमा खेल सकिन ३० सेकेन्ड बाँकी हुँदा पाएको फ्रि-किकलाई गोलमा परिणत गर्दै हारको संघारमा पुगेको नेपाललाई जोगाएका थिए। उनले गोल गर्नुअघि नेपाल २–१ गोलले पछाडि थियो। उनको ‘ट्रेडमार्क’ बायाँ खुट्टाको फ्रि-किक गोलपछि खेल अतिरिक्त समयमा धकेलिएको थियो। र, नेपालले अन्ततः पेनाल्टी सुटआउटमा भारतलाई ४–३ गोलले जित्यो। पेनाल्टीमा पनि उनले महत्वपूर्ण गोल गरे। फर्ममा रहेकै अवस्थामा उनले १९९७ मा फुटबलबाट संन्यास लिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
