काठमाडौं– खेलकुदको एक विधा पार्करबारे धैरैलाई जानकारी नहुन सक्छ। पार्कर जिम्न्याटिक खेलको परिस्कृत नाम हो। शरीरलाई हावामा उडाउँदै विभिन्न अवरोध पार गर्ने पार्कर कलाले धेरैलाई मोहित र अचम्मित पार्ने गरेको छ। शरीरलाई भनेझैं हावामा उडाएर कला देखाउन जो कोहीलाई भने मुस्किल पर्छ। कोही भने जन्मजात नै पार्करको गुण बोकेर आएका हुन्छन्।
त्यस्तै गुण भएका नेपाली पार्कर हुन्, दिनेश सुनार (२७)।
खोटाङका स्थायी बासिन्दा सुनारले पार्करमा २ वटा विश्व कीर्तिमान बनाइसकेका छन्। तर पनि उनी गुमनाम जस्तै छन्। निरन्तर प्रयास र लगनले विश्व कीर्तिमान बनाएका सुनारमा पार्करको गुण भने बाल्यकालदेखि नै थियो।
'हामी झुम्राको बल खेल्न जान्थ्यौं। तर किन हो किन मलाई खेल्नभन्दा शरीरलाई हावामा उडाउदै उल्टी हान्न औधी मन पर्थ्यो,' उनी सम्झन्छन्, '६-७ वर्षको उमेरमा मै घर नजिकैको खोलाको बालुवा खोज्दै हिँड्थे। जमेको बलुवा भेट्नेबित्तिकै जिम्न्यास्टिक गर्न थालिहाल्थेँ।' उनी बिनालक्ष्य निरन्तर उल्टी हानिरहन्थे।
उच्च शिक्षाका लागि काठमाडौं आए तर उनले आफूमा भएको जिम्न्यास्टिक कलालाई कतै प्रस्फुटन गर्ने मौका पाएनन्।
२०६८ मा सशस्त्र प्रहरी बलका तत्कालीन महानिरीक्षक सनतकुमार बस्नेत भलिबल प्रतियोगिता हेर्न गर्न जन्मथलो खोटाङ पुगेका थिए। खोटाङको सापातेलमा भलिबलसँगै अन्य खेलकुदको प्रतिभा पनि प्रस्तुत भए। त्यहाँ सुनारले जिम्न्यास्टिकका आकर्षक स्टन्ट देखाए। जुन स्टन्टबाट महानिरीक्षक बस्नेत मोहित मात्र भएनन् सशस्त्र प्रहरी बलको एपिएफ क्लबमा जिम्न्यास्टिक खेलाडीको रुपमा आबद्ध हुने मौका पनि जुराइदिए। जुन सुनारको खेल जीवनको टर्निङ प्वाइन्ट बन्यो।
क्लबमा आबद्ध भएपछि उनी केही नयाँ गर्ने सोच बनाइरहेका हुन्थे। यस्तैमा सुनारलाई युट्युबमा पार्कर सम्बन्धी भिडियोले आकर्षित गर्यो। बाल्यकालदेखि नै पार्करको गुण भएका उनमा भिडियोमा लगाव बढ्न थाल्यो। निरन्तर भिडियो हेरेर कला सिक्ने बानी नै पर्यो।
भिडियो हेर्दा जादा एकदिन उनले पार्करले बनाएका विश्व रेकर्ड पनि पनि देखे। ती मध्ये 'ट्विस्टिङ ब्याक' (भित्तामा उल्टी हान्ने) रेकर्ड उनको नजरमा पर्यो। रेकर्ड एक मिनेटमा १५ पटक भन्दा कम थियो। उनमा त्यो रेकर्डभन्दा कम समयमा ट्विस्टिङ ब्याक गर्न सक्ने आत्मविश्वास थियो। त्यसलै उनी गिनिज वर्ल्ड रेकर्ड राख्ने सक्ने आँटसहित तयारीमा लागे। खाने र सुत्नेबाहेक अधिकांश समय ट्विस्टिङ ब्याक फ्लिपमा बिताउन थाले।
उनलाई गिनिज वर्ल्ड रेकर्डमा आफ्नो नाम दर्ता गर्न आर्थिक रुपमा सहज थिएन। तर पनि नेपाल एपिएफ क्लब र क्यालिबर सुज नेपालको सहयोग पाए।
लगातार तालिमपछि उनले १ जुन २०१७ मा ट्विस्टिङ ब्याक फ्लिप पार्कर फ्रि स्टाइल विधामा १ मिनेटमा १८ पटक गरेर गिनिज वर्ल्ड रेकर्डमा आफ्नो नाम लेखाउन सफल भए।
पहिलो रेकर्ड राख्न सफल भएपछि उनी हौसिए। पहिलो रेकर्ड बनाएको एक वर्षपछि उनले ब्याक फ्लिप विधामा नयाँ रेकर्ड कायम गर्ने सोच बनाए। पहिलाझैं दोस्रो रेकर्डका लागि पनि युट्युब भिजिट गरे। युट्युबमा सोचेभन्दा कम नै भेटे। १४ जनवरी २०१८ मा सुनारले ब्याक फ्लिप विधामा ३० सेकेन्डमा १६ पटक फ्लिप गरेर नयाँ रेकर्ड कायम गर्दै गिनिज वर्ल्ड रेकर्डमा दोस्रोपटक आफ्नो नाम लेखाउन सफल भए।
गिनिज वर्ल्ड रेकर्डमा नाम लेखाउनुबाहेक उनले आफ्नो खेल जीवनमा पनि धेरै सफलता हात पारेका छन्। २०७० मा राष्ट्रिय जिम्न्यास्टिक प्रतियोगितामा फ्लोर एक्सरसाइज विद्यामा स्वर्ण पदक हात पारेका थिए। २०७३ को सातौं राष्ट्रिय खेलकुदमा जिम्न्यास्टिक खेलको टिम विधामा स्वर्ण पदक हात पारे भने व्याक्तिगत विधामा रजत पदक हात पार्न सफल भए।
२०१८ मा अमेरिकामा सम्पन्न पार्कर विश्वकपमा सहभागी भएका उनी उत्कृष्ट १० मा पर्न सफल भए। नेपाली खेलाडी उत्कृष्ट १० मा परेको यो पहिलो पटक हो। सुनार नेपालको पहिलो अन्तर्राष्ट्रिय मान्यता प्राप्त पार्कर प्रशिक्षक हुन्।
सुनार अहिले तेस्रो गिनिज वर्ल्ड रेकर्डको तयारीमा छन्।
उनी ‘द मोस्ट ट्वीस्टिङ व्याक फ्लिप अफ वाल इन थर्टी सेकेन्ड’ मा रेकर्ड राख्ने तयारीमा जुटेका हुन्। जसका लागि सरकारबाट सहयोग चाहन्छन्। तर आशा गर्ने अवस्था नभएको उनको भनाइ छ।
'सरकारको आस गर्दिनँ। किनकि दुईपटक मुलुकको नाम संसारमा चिनाए। तर केही भएन। बरु भारतमा नेपाली युवाले यस्तो गर्यो भनेर चार्च भयो। तर नेपालमा के भएको थियो भन्नेसम्म पनि थाहा छैन,' उनको गुनासो छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
